ދުނިޔޭގެ އެކި ކަންކޮޅުތަކުގައި ކޮރޯނާވައިރަސް ޑިޒީޒް (ކޮވިޑް-19) ގެ ކޭސްތައް ރެކޯޑް މިންވަރަކަށް އިތުރުވަމުންދާއިރު، މިއަދު ކުރިމަތިލާންޖެހިފައިވާ އެންމެ ބޮޑު ނުރައްކަލަކީ މި ހަނގުރާމަ ކުރަން އެކަށީގެންވާ ލީޑާޝިޕެއް ނެތުން ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ އިސްވެރިޔާ ޑރ ޓެޑްރޯޒް އެޑަނޮމް ގެބްރިޔޭސޫސް ވިދާޅުވެއްޖެއެވެ.
ސުވިޓްޒަލަންޑްގެ ޖެނީވާގައި ދެއްވި ތަގުރީރެއްގައި ޑރ ޓެޑްރޯޒް ވިދާޅުވީ މިއަދު ކުރިމަތިލާންޖެހިފައިވާ އެންމެ ބޮޑު ނުރައްކަލަކީ ހަމައެކަނި ކޮވިޑް-19 ޖައްސާ ވައިރަސް ނޫންކަމަށެވެ. ނަމަވެސް އެއީ މި ބައްޔާ ދެކޮޅަށް ހަނގުރާމަ ކުރުމަށް ބައިނަލްއަގުވާމީ ފެންވަރުގައާއި ގައުމީ ފެންވަރުގައި އެކަށީގެންވާ ލީޑާޝިޕެއް ނެތުމާ، އެއްބައިވަންތަކަން ނެތުން ކަމަށްވެސް ޑރ ޓެޑްރޯޒް ވަނީ ފާހަގަ ކުރައްވާފައެވެ.
ޑރ ޓެޑްރޯޒްގެ މި ބަސްފުޅަކީ، ކޮވިޑް-19ގެ ބަލިމަޑުކަން އެންމެ ނުތަނަވަސްވެފައިވާ މި ދަނޑިވަޅުގައި އެންމެ ގިނަ އަދަދަކަށް ކޭސް ރިޕޯޓް ކޮށްފައިވާ އެމެރިކާއިން، ޑަބްލިއުއެޗްއޯގެ މެމްބަރުކަން ދޫކޮށްލުމުގެ އެންމެ ފަހުގެ މަސައްކަތްތައް ފަށާފައިވާތީ، އެމެރިކާގެ ރައީސް ޑޮނާލްޑް ޓްރަމްޕަށް ދެއްވި ބަހުގެ ހަމަލާއެއްގެ ގޮތުގައިވެސް ބައެއް ފަރާތްތަކުން ދަނީ ސިފަކުރަމުންނެވެ.
ޑަބްލިއުއެޗްއޯގެ ބައްދަލުވުމެއްގައި ވާހަކަދައްކަވަމުން ޑރ ޓެޑްރޯޒް ވަނީ މުޅި އިންސާނިއްޔާތަށް ހަމަލާ ދެމުންދާ އާންމު ދުޝްމަނު ދެނެގަތުމަށް އިންސާނުން އެކަތިގަނޑަކަށް ވުމަކީ އެހާ އުނދަގޫ ކަމެއްތޯ ސުވާލު ކުރައްވާފައެވެ. އަދި އެންމެނަށް އާންމު ދުޝްމަނެއް އުޅޭކަން ދެނެގަތުމުގެ ގާބިލިއްޔަތުކަން ނޭތީތޯވެސް ޑރ ޓެޑްރޯޒް ވަނީ ސުވާލު ކުރައްވާފައެވެ.
މިމޭރުމުން ވާހަކަ ކުރިއަށް ގެންދަވަމުން ޑރ ޓެޑްރޯޒް ވަނީ، ކޮވިޑް-19ގެ ބަލިމަޑުކަމަކީ ބައިނަލްއަގުވާމީ އެއްބައިވަންތަކަމާ ލީޑާޝިޕްގެ އިމްތިހާނެއްގެ ގޮތުގައި ސިފަކުރައްވާފައެވެ.
ދުނިޔޭގެ އަދުގެ ހާލަތަށް ބަލާއިރު 12.6 މިލިއަން މީހުން ވަނީ ކޮވިޑް-19އަށް ޕޮޒިޓިވްވެފައެވެ. މި ބަލި ޖެހުނު މީހުންގެ ތެރެއިން 7.3 މިލިއަން މީހުންނަށް ޝިފާ ލިބި، ބަލިން ރަނގަޅުވެފައިވެއެވެ. އަދި މި ބަލީގައި މިހާތަނަށް 563137 މީހެއްގެ ފުރާނަ ގެއްލިފައިވާކަމަށް ރެކޯޑްތަކުން ދައްކައެވެ.
