ދިވެހި ފުލުހުންގެ ހިދުމަތުގެ ބިލުން، ފުލުހުންގެ ގާނޫނު ބަދަލު ކުރުމާ ދެކޮޅަށް ރައްޔިތުންގެ މަޖިލީސް ކައިރީ އިދިކޮޅު ފަރާތްތަކުން އަޑުއުފުލާ އިހުތިޖާޖު ކޮށްފިއެވެ.
ފުލުހުންގެ ގާނޫނަށް ބަދަލު ގެނައުމާ ދެކޮޅަށް ގޮވާލާ މަޖިލީސް ކައިރީގައި އަޑުއުފުލާފައި ވަނީ މިއަދު ހެނދުނު 10:00 ގައެވެ. އެގޮތުން އެ ފަރާތްތަކުން ވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ފުލުހުންނަށް ސިޔާސީ ނުފޫޒު ނުފޯރުވުމަށް ވެސް ގޮވާލާފައެވެ.
އަދި ފުލުހުންގެ ބިލުން ރައްޔިތުންގެ މަޖިލީހަށް ބޮޑެތި ބާރުތަކެއް ލިބޭތީ އިހުތިޖާޖުގެ ބައިވެރިން ވަނީ އެކަން އެގޮތަށް ނުކުރުމަށް ވެސް ގޮވާލާފައެވެ.
ފުލުހުންގެ ބިލުގައި މިހާރުވާ ގޮތުން ފުލުހުންގެ ހިދުމަތަށް ގެންނަން ޖެހޭ ބަދަލުތައް ގެންނަން ހޯމް މިނިސްޓަރަށާއި ޕޮލިސް ކޮމިޝަނަރަށް އެންގުމުގެ ބާރު ކޮމިޓީ އަށް ލިބިދީފައި ވެއެވެ. އޭގެ ސަބަބުން ފުލުހުންގެ މުއައްސަސާގެ ތެރެއަށް ސިޔާސީ ނުފޫޒު ވަނުމުގެ ފުރުސަތު ވަރަށް ބޮޑަށް އޮންނާނެ ކަމަށް އިދިކޮޅުން އަންނަނީ ބުނަމުންނެވެ.
އިދިކޮޅުގެ ފާޑުކިއުން އެ ބިލަށް އަމާޒުވެފައި ވާއިރު، އެ ބިލުގެ އިބްތިދާއީ ބަހުސް މަރުހަލާގައި އެމްޑީޕީގެ މެންބަރުން ފުލުހުންނަށް ވަރަށް ބޮޑަށް ފާޑު ވިދާޅުވެ ވަނީ ވާހަކަ ދައްކަވާފައެވެ. އެގޮތުން ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދު ވިދާޅުވެފައި ވަނީ ފުލުހުން މަގުމައްޗަށް ނެރެންވީ ސަރުދާރުންގެ ގޮތުގައި އަތަށް ކުދި ދަނޑިބުރި ދީފައި ކަމަށެވެ.
މީގެ އިތުރުން ކުރީގެ ރައީސް، އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވީ މޯލްޑިވްސް ޕޮލިސް ސާވިސް ޒަމާނީ މުއައްސަސާއަކަށް ބަދަލުކުރަން ބޭނުންވާ އެންމެހާ މައުލޫމާތާއި އިޖުރާއަތުތައް ބިލުގައި ފުރިހަމަވާ ކަމަށާއި އެގޮތުން ބިލުގައި ފުލުހުންގެ މުއައްސަސާގައި މަސައްކަތް ކުރާ ފުލުހުންނަށް އޮތް ހިމާޔަތާއި ރައްކާތެރިކަން ބަޔާންކުރާ ބާބަކީ ދުވަހަކުވެސް ފުލުހުންނަށް އެ މިންވަރަށް ހިމާޔަތާއި ރައްކާތެރިކަން ނުދޭ މިންވަރަށް ކަންކަން ފޯރުކޮށްދީފައި އޮތް ބާބެއް ކަމަށާއި ފުލުހުންގެ އޮފިސަރަކަށް ވުމުގެ ފުރުސަތު ހޯދުމާއި، އެކަންކަން އިންސާފުވެރިކޮށް ގެންދިއުމަށާއި ޕްރޮމޯޝަންގެ ކަންކަން ކުރިއަށް ގެންދާނެ ގޮތްތައް ވެސް ބިލުގައި ވަރަށް ސަރީހަ އިބާރާތުން ބަޔާންކޮށްފައި ވާ ކަމަށެވެ.
މި ކަމާ ގުޅިގެން އަޑުއުފުލުގައި އިސްކޮށް ތިބީ އިދިކޮޅު ޕީޕީއެމް އަދި ޕީއެންސީގެ އެކްޓިވިސްޓުންނެވެ.
