ރައީސް އިބްރާހީމް މުހައްމަދު ސޯލިހް، މޯލްޑިވްސް ބްރޯޑްކާސްޓިން ކޮމިޝަންގެ މެންބަރުކަމަށް، ހައްދުންމަތީ ކުނަހަންދޫ ހަނދުވަރީގެ، އާމިނަތު އަމީނާ މިއަދު އައްޔަން ކުރައްވައިފިއެވެ.
އަމީނާ މި މަގާމަށް އައްޔަން ކުރައްވައި މަގާމުގެ ލިއުން ހަވާލު ކުރެއްވުމުގެ ރަސްމިއްޔާތު ބާއްވާފައި ވަނީ މިއަދު ހެނދުނު ރައީސް އޮފީހުގައެވެ.
ބްރޯޑްކޮމްގެ މެންބަރު ކަމަށް އައްޔަން ކުރެއްވި، އަމީނާ މާސްޓާސް ޑިގްރީ ހާސިލުކުރައްވާފައި ވަނީ ޖާނަލިޒަމް އެންޑް މީޑިއާ ކޮމިއުނިކޭޝަން ދާއިރާއިން ދިވެހިރާއްޖޭގެ އިސްލާމީ ޔުނިވާސިޓީންނެވެ. މީގެ އިތުރުން އަމީނާ ވަނީ ގައުމީ ޔުނިވާސިޓީން ޖާނަލިޒަމް ދާއިރާއިން ފުރަތަމަ ޑިގްރީ ހާސިލު ކުރައްވާފައެވެ.
އަމީނާ އެންމެ ފަހުން އަދާކުރެއްވީ ވީމީޑިޔާގެ ސީނިއާ އެޑިޓަރެއްގެ މަގާމެވެ. މީޑިއާ ދާއިރާގެ ގިނަ ތަމްރީނުތަކެއް ފުރިހަމަ ކުރެއްވުމުގެ އިތުރުން އަމީނާ ވަނީ މޯލްޑިވްސް މީޑިއާ ކައުންސިލުން ދެމުން އަންނަ ނޫސްވެރިކަމުގެ ދާއިރާގެ އެވޯޑް ދެފަހަރެއްގެ މަތިން ހާސިލު ކުރައްވާފައެވެ.
ބްރޮޑްކާސްޓިން ކޮމިޝަންގެ ހުސްވެފައިވާ މެންބަރު ކަމަށް އަނާ އައްޔަން ކުރުމަސް މަޖިލީހުން ފާސްކުރީ މިދިޔަ އަންގާރަ ދުވަހެވެ. އަނާ އެ މަގާމަށް ހޮވުމަށް 63 މެންބަރުން ވޯޓު ދެއްވާފައި ވާއިރު އަނާ އެ މަގާމަށް ހޮވުމާ ދެކޮޅަށް އެއްވެސް މެންބަރަކު ވޯޓު ދެއްވާފަ އެއް ނުވެއެވެ.
