ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުން އަރައިގަންނައިރު، އެހެން ހުރިހާ ކަމަކަށްވުރެ ބޮޑު ސަމާލުކަމަކާ އިސްކަމެއް ދޭންޖެހޭ ކަމަކީ، ގުދުރަތީ ގޮތުން ދުނިޔެއަށް ލިބިފައިވާ ތިމާވެއްޓާ، އެ ވެށީގައިވާ އެންމެހާ ދިރުންތައް ހިމާޔަތްކޮށް، މިކަމަކީ ދިރިއުޅުމުގެ ކަންކަން އަލުން ފަށައިގަންނެ އާރާސްތު ކުރުމުގެ ސިފައެއް ކަމުގައި ހެދުމަށް ކަމަށް ދިވެހިރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު މިހެން ވިދާޅުވީ، ބައިނަލްއަގުވާމީ ފެންވަރުގައި މިއަދު ފާހަގަކުރަމުންދާ ދުނިޔޭގެ ތިމާވެށީގެ ދުވަހުގެ މުނާސަބާއާއި ގުޅުވައިގެން މިއަދު މެންދުރު ފަހު ކުރެއްވި ޓްވީޓްއެއްގައެވެ.
ގުދުރަތީ ގޮތުން ދުނިޔެއަށް ލިބިފައިވާ ވެއްޓަކީ ކޮންމެ މީހެއްގެވެސް މުސްތަގުބަލާ ގުޅިފައިވާ އެއްޗެއްކަން ފާހަގަކުރައްވަމުން ރައީސް ސޯލިހު ވަނީ، ތިމާވެށި ހިމާޔަތް ކުރުމަށް ދިވެހިރާއްޖެއިން ދެމުންދާ އެއްބާރުލުން، ރާއްޖޭގެ އަދުގެ ސަރުކާރުން ދެމުން ގެންދަވާނެ ކަމުގެ ޔަގީންކަންވެސް ދެއްވާފައެވެ.
ދުނިޔޭގެ ތިމާވެށީގެ ދުވަހާ އަދު މުޅި ދުނިޔެވެސް ކުރިމަތިލާފައި މިވަނީ ތާރީޚު ނުދެކޭ ވަރުގެ ނުރައްކާތެރި ބަލިމަޑުކަމެއްގެ ތެރޭގައި ވަނިކޮށެވެ. ކޮރޯނާވައިރަސް ޑިޒީޒް (ކޮވިޑް-19)ގައި މުޅި ދުނިޔެ އިނދަޖެހިފައިވާ މި ދަނޑިވަޅަކީ، ތިމާވެށީގެ މުހިންމު ސިގްނަލްތަކެއްވެސް ދުނިޔެއަށް ދެމުންދާ ވަގުތެކެވެ. ކޮވިޑް-19ގެ ބަލިމަޑުކަން އަންގައިދިން އެންމެ ބޮޑު އެއް މެސެޖަކީ ފާއިތުވީ ދުވަސްތަކުގައި އިންސާނީ ހަޟާރާތުން ބައޯޑައިވާސިޓީ ނުވަތަ ވެށީގެ ދިރުންތަކަށް ގެއްލުންދީ، ނެތިކުރަމުން ދިޔަކަމަވެ. އަދި މި ދިރުންތަކަކީ އިންސާނީ ދިރިހުރުމާ ގުޅިފައި އޮތް ނިޒާމެއްކަމެވެ.
ކޮވިޑް-19 ވެސް ނިސްބަތްވާ ކޮރޯނާވައިރަސް އާއިލާއިން އުފެދިގެން އަންނަ އެކި ބަލިމަޑުކަމުގެ ޝިކާރައަކަށް ކޮންމެ އަހަރަކުވެސް އެތައް ބިލިއަން ދިރުމެއްވެ، އެ ބަލީގައި އެތައް މިލިއަން ދިރުމެއް މަރުވެދާކަމަށް އދއިން ލަފާކުރެއެވެ. އަދި މިފަހަކަށް އައި އުފެދެމުން އަންނަ، ގައިންގައަށް އަރާ ބަލިތަކުގެ 75 ޕަސެންޓް ހިއްސާކުރަނީ ޒޫނޮޓިކް ކޭސް ނުވަތަ ޖަނަވާރުންގެ ކިބައިން އިންސާނުންނަށް ފެތުރޭ ބަލިތަކެއްކަންވެސް އދއިން ވަނީ ފާހަގަކޮށްފައެވެ.
