ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ޕޭޝަންޓުންނަށް ކުއްލި ހާލަތުގައި ފަރުވާ ދިނުމަށް، ޖިލިއަޑް ސައެންސަސް އިންކޯޕަރޭޝަންގެ އެންޓިވައިރަލް ޑްރަގް 'ރެމްޑެސިވިއާ' ބޭނުން ކުރުމަށް އިންޑިއާގެ ސަރުކާރުން ހުއްދަ ދީފިއެވެ.
ރެމްޑެސިވިއާއަކީ ކޮވިޑް-19ގެ ޕޭޝަންޓުންނަށް ފަރުވާ ދިނުމަށް ބޭނުން ކުރަމުން އަންނަ އެކި ބޭސްތަކުގެ ތެރެއިން، ކްލިނިކަލް ޓްރަޔަލް މަރުހަލާތަކުގައި މިހާތަނަށް އެންމެ އެދެވޭ ނަތީޖާއެއް ދައްކާފައިވާ ބޭހެވެ.
އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަންއިންވެސް ހުސްވި މަހު ވަނީ، ކޮވިޑް-19ގެ ޕޭޝަންޓުންނަށް ފަރުވާ ދިނުމަށް ކުއްލި ހާލަތުގައި ރެމްޑެސިވިއާ ބޭނުން ކުރަން ހުއްދަ ދީފައެވެ. މީގެ އިތުރުން، ޖަޕާނުގެ ސިއްހަތާ ބެހޭ ރެގިއުލޭޓަރުން ވަނީ މި ބޭސް ބަލައިގެންފައެވެ.
އިންޑިއާގެ ޑްރަގްސް ކޮންޓްރޯލާ ޖެނެރަލް ވިދާޅުވީ، ޖޫން 1 ވަނަ ދުވަހުން ފަށައިގެން ރެމްޑެސިވިއާ ބޭނުން ކުރަން ހުއްދަ ދީފައިވާކަމަށާ، ހުއްދަ ދޫކޮށްފައިވަނީ ކޮންމެ ޕޭޝަންޓްއަކަށްވެސް 5 ޑޯޒްގެ މަގުން ކަމަށެވެ. މިކަމާ ބެހޭ ގޮތުން ޖިލިއަޑްއިން އަދި ވަކި އެއްޗެއް ބުނެފައެއް ނުވެއެވެ.
އަދާ ހަމައަށް ބަލާއިރު އިންޑިއާއިން 199785 މީހަކު ވަނީ ކޮވިޑް-19އަށް ޕޮޒިޓިވްވެފައެވެ. އަދި މި ބަލީގައި 5612 މީހެއްގެ ފުރާނަ ވަނީ ގެއްލިފައެވެ. އިންޑިއާއިން މިވަގުތު އެކްޓިވް ކޭހުގެ ގޮތުގައި ލޮގް ކޮށްފައިވަނީ 98298 ކޭހެވެ. މީގެ ތެރެއިން 8944 މީހެއްގެ ހާލު ސީރިއަސް/ކުރިޓިކަލް ކަމަށް މައުލޫމާތު ލިބެއެވެ.
