އެމެރިކާއިން ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވެފައިވާ މީހުންގެ އަދަދަކީ "ޝަރަފުގެ ބެޖެއް" ކަމަށް، އެ ގައުމުގެ ރައީސް ޑޮނާލްޑް ޓްރަމްޕް ސިފަކުރައްވައިފިއެވެ.
ދުނިޔޭގެ ނިސްބަތުން ބަލާއިރު ކޮވިޑް-19އަށް އެންމެ ގިނަ ބަޔަކު ޕޮޒިޓިވްވެފައިވަނީ އެމެރިކާއިން ކަމަށްވާއިރު، މިކަމާ ބެހޭ ގޮތުން ދެކެވޭ ވާހަކަތަކަށް ރައްދު ދެއްވަމުން ޓްރަމްޕް ވިދާޅުވީ، އެމެރިކާއިން ޕޮޒިޓިވްވާ މީހުންގެ އަދަދު އަންގައިދެނީ އެގައުމުން ފުޅާ ދާއިރާއެއްގައި ޓެސްޓު ކުރަމުންދާ މިންވަރު ކަމަށާ، އޭގެ މާނައަކީ ދުނިޔޭގެ އެހެން ގައުމުތަކަށްވުރެ އިތުރަށް އެމެރިކާއިން ޓެސްޓު ކުރުން ކަމަށެވެ.
އެމެރިކާއަކީ އެހެން ގައުމުތަކާ އަޅާ ބަލާއިރު ބޮޑު ގައުމެއް ކަމަށާ، ނަމްބަރުތަކަށް ބަލާއިރު އެއީ ގޯސްކަމެއްގެ ގޮތުގައި ދެކެވަޑައި ނުގަންނަވާ ކަމަށްވެސް ޓްރަމްޕް ވަނީ ވިދާޅުވެފައެވެ.
ކަންމިހެން އޮތްއިރު، އެމެރިކާއިން ކޮވިޑް-19އަށް ޕޮޒިޓިވްވި މީހުންގެ އަދަދު މިހާރު ވަނީ 1.5 މިލިއަނަށްވުރެ މައްޗަށް އަރާފައެވެ.
ތަފާސް ހިސާބުތަކަށް ބަލާއިރު ޓްރަމްޕްގެ ވާހަކަފުޅު ސާބިތު ހިފެއެވެ. ކޮވިޑް-19އަށް އެންމެ އަދަދަކަށް ޓެސްޓު ކޮށްފައިވަނީ އެމެރިކާއިންނެވެ. އެގޮތުން އެމެރިކާއިން މިހާތަނަށް 12645473 ސާމްޕަލްއެއް މި ބައްޔަށް ވަނީ ޓެސްޓު ކޮށްފައެވެ. މިއީ އާބާދީގެ ކޮންމެ 1 މިލިއަން މީހަކަށް ބަލާނަމަ 38229 ޓެސްޓްއެވެ. ކަންމިހެން އޮތްއިރު، ކޮވިޑް-19ގައި އެންމެ ގިނަ ބަޔަކު މަރުވެފައިވަނީވެސް އެމެރިކާއިންނެވެ. ރެކޯޑްތަކުން ދައްކާ ގޮތުގައި އެމެރިކާއިން މި ބަލީގައި މަރުވި މީހުންގެ އަދަދު ވަނީ 93533 އަށް އަރާފައެވެ. އެމެރިކާއާއި އެންމެ ގާތުން، އެންމެ ގިނަ ބަޔަކު މަރުވިކަމަށް ރިޕޯޓްކޮށްފައިވާ އިނގިރޭސިވިލާތުން މަރުވި ކަމަށް ރެކޯޑްކޮށްފައިވަނީ 35341 މީހުންނެވެ.
