ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް ފަސޭހައިން ދެނެގަތުމަށް އިންޑިއާއިން ޓްރޭސިންގް އެޕްލިކޭޝަނެއްގެ ގޮތުގައި ފުޅާދާއިރާއެއްގައި ބޭނުން ކުރަމުން އަންނަ "އަރޯގްޔާ ސޭތޫ"އާ ގުޅިގެން ކަންބޮޑުވުންތަކެއް އުފެދިއްޖެއެވެ.
އިންޑިއާގެ އިންފޮމޭޝަން ޓެކްނޮލޮޖީ ވުޒާރާގެ ރެކޯޑްތައް ދައްކާ ގޮތުން، މީގެ 6 ވަރަކަށް ހަފުތާ ކުރިން ތައާރަފު ކުރި މި އެޕްލިކޭޝަން 100 މިލިއަން ފަހަރު ވަނީ ޑައުންލޯޑްކޮށްފައެވެ.
މި އެޕްލިކޭޝަން ފަރުމާކޮށްފައިވަނީ މޯބައިލް ފޯނުގެ ބްލޫޓުގެ އެހީގައި އޮޕަރޭޓްކުރާ ގޮތަށެވެ. އެގޮތުން ކޮވިޑް-19 ޖެހިފައިވާ މީހަކާ އެކީ އެއްތާވި ކަމުގެ ނޯޓިފިކޭޝަން ފޮނުވުން ފަދަ ކަންކަން މި އެޕްލިކޭޝަންއިން ކޮށްދެއެވެ. މި މައުލޫމާތަކީ އިންޑިއާގެ ސަރުކާރާ ހިއްސާކުރެވެމުންދާ މައުލޫމާތުތަކެކެވެ.
ނަމާ ފޯނު ނަމްބަރު ނުނެގިއެއް ކަމަކު ޖިންސު، ދަތުރު ކުރި ގޮތުގެ ތަފްސީލު އަދި ސިނގިރޭޓް ބޯ މީހެއްތޯ ބެލުން ފަދަ މައުލޫމާތުތައް މި އެޕްލިކޭޝަންގައި ރައްކާ ކުރެއެވެ.
މި އެޕްލިކޭޝަން ޑައުންލޯޑްކުރުމަށް ބޮޑުވަޒީރު ނަރޭންދްރާ މޯދީ ބާރު އަޅުއްވާފައިވާއިރު، ނޮއިޑާ ފަދަ ސަރަހައްދުތަކުގައި މި އެޕްލިކޭޝަން ބޭނުންކުރުމަކީ މަޖުބޫރުކަމެކެވެ. މި އުސޫލަށް ނުކިޔަމަންތެރިވާ ކޮންމެ މީހަކު 6 މަހަށް ޖަލަށް ލުމުގެ ބާރު، ކަމާ ބެހޭ ފަރާތްތަކަށް އޮންނަނީ ދީފައެވެ.
ކަންމިހެން އޮތްއިރު މި އެޕްލިކޭޝަންއާ ގުޅޭ ބޮޑެތި ކަންބޮޑުވުންތަކެއްވެސް އެބަހުއްޓެވެ. އެގޮތުން އެޕްލިކޭޝަން ރަން ކުރުމަށްޓަކައި އަބަދު ބްލޫޓޫތް އޮންކޮށްފައި ބާއްވަންޖެހޭއިރު، މިއީ ފޯނުގެ ސެކިއުރިޓީއާއި ޕްރައިވަސީގެ ނަޒަރުން ބަލާއިރު މާ ރައްކާތެރި ކަމެއް ނޫނެވެ.
އެޕް ފަރުމާކުރި ފަރާތުން ބުނަމުންދަނީ ފޯނު ބޭނުން ކުރާ ފަރާތުގެ ޒާތީ އެއްވެސް މައުލޫމާތެއް އެހެން ފަރާތަކަށް ހާމަ ނުވާނެ ކަމަށެވެ. ކޮންމެ ފޯނަކަށްވެސް ދެވިފައިވާނީ ކާކުކަން ނޭނގޭ ވަރުގެ އައިޑީއެއް ކަމަށާ، ޒާތީ އެއްވެސް މައުލޫމާތެއް ބަދަލު ކުރެވެމުން ނުދާނެކަމަށްވެސް އެ ފަރާތުން ބުނެއެވެ.
ނަމަވެސް، އެމީހަކު ހުންނަތަނެއް ތާއަބަދު ޓްރެކް ކުރަމުން ދިއުމަކީ ސިއްރު ހިފެހެއްޓުމަށް ލިބިފައި އޮންނަ ހައްގަށް ދެވޭ އުނިކަމެއް ކަމަށް އިންޓަނެޓް ވޮޗްޑޯގް މީޑިއާނާމާގެ އެޑިޓަރު ނިކީލް ޕައްވާ ވަނީ ފާހަގަކޮށްފައެވެ. ހަމަ މިފަދައިން ބްލޫޓުތް އަކީ ފާރު ފޫއަޅުވާފައިވާ ޓްރެކް ކުރާ އެއްޗެއް ކަމަށާ، އެއް ގެއެއްގެ ދެ ފަންގިފިލާއެއްގައި އުޅޭ ދެމީހަކުވެސް އެކީ އެއްތާވި ކަމަށް މި އެޕްލިކޭޝަނުނ ދައްކަފާނެ ކަމަށް އޭނާ ވަނީ ފާހަގަކޮށްފައެވެ.
ދެން އޮތް ކަންބޮޑުވުމަކީ އިނގިރޭސިވިލާތުގައި ބޭނުން ކުރަމުންދާ އެޕްލިކޭޝަންއާ ހިލާފަށް އަރޯގްޔާ ސޭތޫ އެޕްލިކޭޝަންއަކީ އޯޕަން ސޯސް އެޕަކަށް ނުވާކަމެވެ. މިއާއެކު މިނިވަން ކޯޑަރުންނާ ދިރާސާ ޓީމުތަކަށް މި އެޕްލިކޭޝަންގެ ދިރާސާތައް ކުރުން، މިސާލަކަށް ސެކިއުރިޓީ ފީޗާތައް ވިލަރެސް ކުރުމަށް ހުރަސް އެޅެއެވެ.
ކަންމިހެން އޮތްއިރު އިންޑިއާގެ ސޮފްޓްވެއާ އިންޖޭރަކު މި އެޕްލިކޭޝަން ހެކްކުރި ކަމުގެ ވާހަކަތެކެއްވެސް ވަނީ ފެންމަތިވެފައެވެ.
ނަމަވެސް އިންޑިއާގެ ކަމާބެހޭ ފަރާތްތަކުން ދަނީ މިފަދަ ތުހުމަތުތަކަށް އިންކާރު ކުރަމުންނެވެ.
