ވަގުތީ ގޮތުން ވީމީޑިއާ ހުއްޓާލަން ޖެހިދާނެ ކަމަށް އެ ޓީވީ ހިންގާ ކުންފުނި އައިލެންޑް ބްރޯޑްކާސްޓިން ކޮމްޕެނީ އިން ބުނެފިއެވެ.
ވީމީޑިއާ ހިންގާ ކުންފުނިން މިއަދު މުވައްޒަފުންނަށް ފޮނުވާފައިވާ ސާކިއުލާއެއްގައި ބުނީ ކޮވިޑް19 ގެ ސަބަބުން އެކުންފުނީގެ މައި ކުންފުނި ވިލާ ގްރޫޕަށް ވަންނަމުން ދިޔަ އާމްދަނީ އެއްކޮށް ހުއްޓިފައިވާ ކަމަށެވެ. ވިލާ ގްރޫޕަށް އެންމެ ބޮޑު އާމްދަނީއެއް ވަންނަމުން ދަނީ ފަތުރުވެރިކަމުގެ ސިނާއަތުންނެވެ. ކޮވިޑް19 ގެ ސަބަބުން ރާއްޖޭގެ ބޯޑަރު ބަންދުކޮށް އޮން އެރައިވަލް ވިސާ ދިނުން ހުއްޓާލާ ފަތުރުވެރިން އައުން ވަނީ މަނާކޮށްފައެވެ.
ވީމީޑިއާ ހިންގާ ކުންފުނިން އައިލެންޑް ބްރޯޑްކާސްޓިން ކޮމްޕެނީ އިން ބުނީ އެކަމުގެ ސަބަބުން މިވަގުތު އެކުންފުނީގެ ހުރިހާ އޮޕަރޭޝަނެއް ހުއްޓާލަން ޖެހިފައިވާ ހާލަތަކަށް ގޮސްފައިވާ ކަމަށެވެ.
އެހާލަތުގައި އެ ކުންފުނި ދެމެހެއްޓުމަށް ކުރެވުނު މަސައްކަތުން، އާމްދަނީ އިތުރުކުރެވޭނެ އެއްވެސް އަލި މަގެއް މިހާތަނަށް ފެނިފައި ނުވާ ކަމަށްވެސް ސާކިއުލާގައި ބުނެފައިވެއެވެ. އަދި އެ ކުންފުނީގެ އޮޕަރޭޝަންސް ވަގުތީގޮތުން ހުއްޓާލަން ޖެހޭ ދަރަޖައަށް ކަންކަން ގޮސްފައިވާކަން ހިތާމައާއެކު މުވައްޒަފުންނަށް ދަންނަވާ ކަމަށް ސާކިއުލާގައިވެއެވެ.
ކުންފުނީގެ މުވައްޒަފުންގެ މުސާރަ ވަކި ވަރަކަށް އުނިކޮށްގެން ވެސް މުވައްޒަފުންނަށް އޭޕްރީލް މަހުގެ މުސާރަ ދެވޭނެ އެއްވެސް ގޮތެއް ނެތުމާއި އަދި މެއި ޖޫން މަހުގެ މުސާރައިގެ ގޮތުގައިވެސް ކޮންމެ މުވައްޒަފަކަށް ދެވޭނެ ކަމަށް ބެލެވެނީ 2،222 ރުފިޔާ ކަމަށްވެސް ސާކިއުލާގައިވެއެވެ. ކުންފުނީގެ ހިންގުން ވަގުތީ ގޮތުން ހުއްޓާލަން ޖެހުނު ނަމަވެސް އެ އަދަދަށް މުސާރަ އަދި ރޯދަ އިނާޔަތް މުވައްޒަފުންނަށް ލިބޭނެ ކަމަށް މުވައްޒަފުންނަށް ފޮނުވާފައިވާ ސާކިއުލާގައިވެއެވެ.
އެކަން އެގޮތަށް ކުރުމަށް ނިންމީވެސް އެ ހާލަތުގައި އެއްވެސް މުވައްޒަފަކު ވަޒީފާއިން ދޫކޮށްލަން ބޭނުން ނުވާތީ އާއި ކުންފުންޏަށް އެއްވެސް ފައިސާއެއް ހޯދުނަސް، އެ ފައިސާ ހަމަހަމައަށް ހުރިހާ މުވައްޒަފުންގެ މެދުގައި ހިއްސާ ކުރުމުގެ މަގްސަދުގައި ކަމަށް ސާކިއުލާގައި ބުންޏެވެ.
އައިލެންޑު ބްރޯޑްކާސްޓިން ކޮމްޕެނީ އިން ބުނީ މިވަގުތު މުވައްޒަފުން މަދު ކުރަން ނިންމާފައި ނުވާ ކަމަށެވެ. ނަމަވެސް ޖޫން މަހުގެ ނިޔަލަށް އިގްތިސާދީ މިހާލަތުން އަރައިނުގަނެވި، އާމްދަނީ ލިބޭނެ ގޮތެއް ނުފެނިއްޖެ ނަމަ، މުވައްޒަފުންގެ ވަޒީފާއާ މެދު ގޮތެއް ނިންމާނެ ކަމަށެވެ.
ކޮވިޑް19 ގެ ސަބަބުން މީޑިއާތަކަށް ވެސް ވަނީ ބޮޑެތި އަސަރުތަކެއް ކޮށްފައެވެ. އެގޮތުން ގިނަ މީޑިއާތަކުން ވަނީ މުވައްޒަފުންގެ މުސާރައަށް ބޮޑު ބަދަލުތަކެއް ގެނެސްފައެވެ. އެކަމުގެ ސަބަބުން ސަރުކާރުން ވަނީ މީޑިއާތަކަށް ރިލީފް ޕެކޭޖެއް ތައާރަފުކޮށްފައެވެ.
