ކޮރޯނާވައިރަސް ޑިޒީޒް (ކޮވިޑް-19) ޖައްސާ ސިވިއާ އެކިއުޓް ރެސްޕިރޭޓަރީ ސިންޑްރޯމް ކޮރޯނާވައިރަސް 2 (ސާސް-ކޯވް-2) އަކީ، ބަލިޖެހި ރަނގަޅުވަމުން އަންނަ ފިރިހެނުންގެ ދަރިފަނީގައި ދެމި ހުރުމުގެ ގާބިލުކަން ލިބިފައިވާ ވައިރަހެއް ކަމަށް ހޯދުންތަކުން ދައްކާފައިވާކަމަށާ، މިއީ ޖިންސީ ގުޅުމުގެ ޒަރިއްޔާއިންވެސް ބަލި ފެތުރިގެން ދިއުމުގެ ނުރައްކާ އޮތްކަން އަންގައިދޭ ކަމެއް ކަމަށް ޗައިނާގެ ދިރާސާ ޓީމަކުން ބުނެފިއެވެ.
ޗައިނާގެ ޝަންގްޗާއޯ މުނިސިޕަލް ހޮސްޕިޓަލުގައި މި ދިރާސާ ކުރިއަށް ގެންގޮސްފައިވަނީ މިއަހަރު ޖަނަވަރީ މަހަރާ ފެބުރުވަރީ މަހު، އެ ހޮސްޕިޓަލުގައި ކޮވިޑް-19އަށް ފަރުވާ ހޯދަމުންދިޔަ 38 ފިރިހެނެއްގެ ހަށިގަނޑުން ސާމްޕަލް ނަގައިގެންނެވެ.
ސިއްހީ ދާއިރާގެ ހޯދުންތައް ޝާއިއު ކުރަމުން އަންނަ ޖާމާ ނެޓްވާކް އޯޕަންގައި އާންމުކޮށްފައިވާ މި ދިރާސާ ބުނާ ގޮތުގައި، ދިރާސާގައި ބައިވެރިވި ފިރިހެނުންގެ ތެރެއިން 16 ޕަސެންޓް މީހުންގެ ހަށިގަނޑުން ނެގި ދަރިފަނީގެ ސާމްޕަލްގައި ކޮރޯނާވައިރަހުގެ އަސަރު ހުރި ކަމަށް ވަނީ ދައްކާފައެވެ. މީގެ ތެރެއިން 9 ޕަސެންޓް މީހުންނަކީ ބަލިން ރަނގަޅުވާ އަތަށް އަޅާފައި ތިބި މީހުން ކަމަށްވެސް ދިރާސާ ޓީމުން ވަނީ ރިޕޯޓްކޮށްފައެވެ.
ޗައިނާގެ ވެރިރަށް ބެއިޖީންގްގައި ހިންގާ ޗައިނީޒް ޕީޕަލް ލިބަރޭޝަން އާމީ ޖެނެރަލް ހޮސްޕިޓަލުގައި މަސައްކަތް ކުރައްވާ ޑައަންޖެންޖް ލީ އާއި އޭނާގެ ޓީމުން ބުނީ، ފިރިހެނުންގެ ދަރިފަނީގައި ސާސް-ކޯވް-2ގެ އަސަރު ހުންނަކަން އެނގިފައިވާކަމަށެވެ. ނަމަވެސް ދަރިފަނި އުފައްދާ ގުނަވަނުގައި ވައިރަސް ނަކަލުވަމުން ނުދާކަންވެސް އެ ޓީމުން ވަނީ ފާހަގަކޮށްފައެވެ.
މިއީ އާދަޔާ ހިލާފު ހޯދުމަކަށް ނުވަނީ ކީއްވެ؟
ފަހުގެ ތާރީހުގައި ފެތުރިގެންދިޔަ ޒިކާއާއި އެބޯލާ ރޯގާ ޖައްސާ ވައިރަސްވެސް ފިރިހެނާގެ ދަރިފަނީގައި ހުރިކަން ވަނީ ހޯދިފައެވެ.
ކަންމިހެން އޮތްނަމަވެސް، މި ޒަރިއްޔާއިން ކޮރޯނާވައިރަސް ފެތުރިދާނެކަން ނުވަތަ ނޫންކަން އަދި ކަށަވަރުކުރެވިފައެއް ނުވެއެވެ. ވައިރަހުގެ އަސަރު ފެނުމަކީ، އޭގެ ޒަރިއްޔާއިން އިންފެކްޝަން ފެތުރުން ނޫންކަމަށްވެސް ބުނެއެވެ. ނަމަވެސް، ޖިންސީ ގުޅުމުން ބަލި ފެތުރިދާނެ ކަމުގެ ބިރު އޮތުމުން، މިފަދަ ކަންކަމާ ދުރުގައި ޕޭޝަންޓުން އުޅުން ބުއްދިވެރިކަމަށް ދިރާސާ ޓީމުން ވަނީ ފާހަގަކޮށްފައެވެ. އެހެންކަމުން، ދުރުވާންވީ ކޮވިޑް-19ގެ ޕޭޝަންޓުންގެ ލެޔާ، ކުޅުން އެކަނި ނޫންކަން ފާހަގަކޮށް، މި ރޮނގުން އިތުރު ދިރާސާތައް ހެދުމަށްވެސް ދިރާސާ ޓީމުންވަނީ ގޮވާލާފައެވެ.
