އެމެރިކާގައި ކޮރޯނާވައިރަސް ޑިޒީޒް (ކޮވިޑް-19)ގެ ނުރައްކާ އެންމެ ބޮޑުވެގެންދިޔަ ނިއު ޔޯކް ސިޓީގެ ގަވަރުނަރު އެންޑްރޫ ކުއޯމޯއަށް އެން-95 މާސްކެއް ފޮނުވި ކުރީގެ ދަނޑުވެރިޔާއަށް ޝަރަފުގެ ޑިގްރީ ސަނަދެއް ހަވާލުކޮށްފިއެވެ.
ކަންސާސްގައި ކުރި ދަނޑުވެރި ކަމުގެ މަސައްކަތުން ރިޓާޔާކޮށްފައިވާ ޑެނީސް ރޫންކީ ފޮނުވި ސިޓީއަކާ އެން-95 މާސްކެއް ހިފައިގެން ހުންނަވާ، ގަވަރުނަރު ކުއޯމޯ ވިދާޅުވީ، މިއީ އިންސާނިއްޔަތު ކަމުގެ އެންމެ ފުރިހަމަ ރަމްޒެއް ކަމަށެވެ.
ޑެނީސް ރޫންކީ، ކުއޯމޯއަށް ފޮނުވި ސިޓީގައި އޭނަވަނީ، އެ ސްޓޭޓްގައި މާސްކްއަކަށް ބޭނުން ޖެހިފައިވާ ނަރުހެއް ނުވަތަ ޑޮކްޓަރަކަށް އެ މާސްކު ފޯރުކޮށްދެވިދާނެތޯ ގަވަރުނަރު ކުރެ ސުވާލުކޮށްފައެވެ.
ކުއޯމޯ ވިދާޅުވި ގޮތުގައި މިއީ ރޫންކީ އަތުގައި އޮތް އެން-95 މޮޑެލްގެ 5 މާސްކުގެ ތެރެއިން 1 މާސްކްއެވެ. މި މާސްކުތަކަކީ ދަނޑުވެރިކަން ކުރި ދުވަސްވަރު އޭނާ އަތުގައި ހުރި މާސްކުތަކެއްކަމަށްވެސް ރޫންކީ ވަނީ ބުނެފައެވެ. މިއާއެކު، އެތައް ބައެއްގެ ސަމާލުކަން ރޫންކީއަށް ހުއްޓުނެވެ.
ކަންސާސްގެ ގަވަރުނަރު ލޯރާ ކެލީ ވިދާލުވީ، ޑެނީ ރޫންކީގެ އޯގާތެރިކަމާ، އުމުރު ދުވަހު ދަނޑުވެރި ކަމަށް އޭނާ ކުރި ހިދުމަތަކީ، ޑިގްރީ ސަނަދެއް އޭނާއަށް ހައްގުވާ ކަމެއް ކަމަށެވެ.
ކެލީއާއި ކަންސާސް ޔުނިވާސިޓީގެ ރައީސް ރިޗާޑް މަޔާޒް، ރޫންކީއަށް ޝަރަފުގެ ބެޗެލާޒް ޑިގްރީއެއް ހަވާލުކުރީ އަންގާރަ ދުވަހުއެވެ.
ރޫންކީއަކީ އޭނާގެ ޒުވާން އުމުރުގައި މަތީ ސަނަދެއްގެ ފޮނި އުއްމީދުތަކެއް ދެކި، އެކަމަށް މަސައްކަތް ކުރި މީހެކެވެ. ނަމަވެސް ސަނަދު ފުރިހަމަވާން 2 ކްރެޑިޓް ޕޮއިންޓްއަށް ވެފައިވަނިކޮށް ކިއެވުން މެދުކަނޑާލަންޖެހުނީ ރޫންކީގެ ބައްޔަ ނިޔާވި ހިސާބުން، 1971 ވަނަ އަހަރުއެވެ. އެހާ ހިސާބުން އޭނާ ނިންމީ، މަންމައާއި އާއިލާގެ ދަނޑު ބެލެހެއްޓުމަށްޓަކައި ކިޔެވުން ހުއްޓާލާށެވެ.
ރޫންކީއާއި އޭނާގެ އަނބިމީހާއަކީ މިހާރު އުމުރުން 70ގެ އަހަރުތައް ގުނަމުންދާ ދެމަފިރިންނެވެ. މިފަދަ ހާލެއްގައި، ކުއޯމޯއަށް މާސްކު ފޮނުވަން ނިންމީ، ކޮވިޑް-19ގެ ނުރައްކާ ބޮޑުވެ، ސިއްހީ ހިދުމަތްތެރިންނަށް އެކަށީގެންވާ މިންވަރަށް ސަޕްލައި ނެތުމުގެ ވާހަކަތައް ފެންމަތިވާން ފެށި ހިސާބުންނެވެ.
