ށ. ނަރުދޫއިން ކޮވިޑް19 އަށް މީހުންތަކެއް ޕޮޒިޓިވް ވެފައި ވާއިރު އެރަށުގެ ސިއްހީ ހާލަތު ރަނގަޅު ކުރެވިފައި ނުވާ ކަމަށް ބުނެ އިދިކޮޅު ޕްރޮގްރެސިވް ކޯލިޝަނުން ކަންބޮޑުވުން ފާޅުކޮށްފިއެވެ.

އިދިކޮޅުން މިއަދު ނެރެފައިވާ ނޫސްބަޔާނެއްގައި ބުނީ ރާއްޖޭގައި ހަލުވިކަމާއެކު ފެތުރެމުންދާ ކޮވިޑް19 ގެ އަސަރު ރާއްޖޭގެ ކަންކޮޅުތަކަށް ފެތުރިފައިވާއިރު، މާލެ ފިޔަވާ އެންމެ ބޮޑަށް ފެތުރި، އެންމެ ގިނަ ބަޔަކު ޕޮޒިޓިވް ވެފައިވާ އެއް ރަށަކީ ނަރުދޫ ކަމަށާއި ނަމަވެސް މާލެ ފިޔަވާ އެންމެ ބޮޑަށް އެ ބަލީގެ އަސަރުކޮށްފައިވާ ނަރުދޫގެ ސިއްހީ ހާލަތު ރަނގަޅު ކުރެވިފައި ނުވުމަކީ އެ ކޯލިޝަން ކަންބޮޑުވާ ކަމެއް ކަމަށެވެ.

އެރަށުގައި ކޮވިޑް19 އަށް ޓެސްޓު ކުރެވެން ނެތުމާއި، އަދި ޑޮކްޓަރުންނާއި ސިއްހީ ހިދުމަތް ދިނުމަށް އެކަށީގެންވާ ޓީމެއް ރަށުގައި ނެތްކަން ފާހަގަކޮށް އިދިކޮޅި ކޯލިޝަނުން ބުނީ ބަލި މީހުންނާއި ސީދާ ބައްދަލުވެފައިވާ އެތައް ބަޔަކު ތިބި އިރު، އެމީހުން ވަކިން ގެންގުޅެވޭނެ އައިސޮލޭޝަން ނުވަތަ ކަރަންޓީން ފެސިލިޓީއެއް މިހާތަނަށް އައިއިރުވެސް ގާއިމުވެފައި ނެތުމަކީ އެ ކޯލިޝަނުގެ ކަންބޮޑުވުން އިތުރުވާ ކަމެއް ކަމަށެވެ.

ނަރުދޫ އެއްކޮށް ބަންދުވެފައި އޮތުމާއެކު، ރަށުން ބޭސް ނުލިބުމާއި، ޒަރޫރީ ބޭނުންތައް ފުއްދުމަށް ބޭނުންވާ އެންމެ އާދައިގެ ތަކެތި ރަށުން ލިބެން ނެތުމާއި، ސިއްހީ ގޮތުން ރައްކާތެރިވުމަށް ބޭނުންވާ މާސްކާއި ސެނިޓައިޒާއާ އަންގި ފަދަ ތަކެތިވެސް ރަށުން ލިބެން ނެތުމަކީވެސް ރަށުގެ ރައްޔިތުން އިތުރު ހާސްކަމެއްގެ ތެރެއަށް ދާންޖެހިފައި އޮތް މައްސަލައެއް ކަމަށް އިދިކޮޅުން ބުނެއެވެ.

އެ ކޯލިޝަނުން ވަނީ ނަރުދޫ ފަދައިން ރާއްޖޭގެ ކޮންމެ ރަށަކަށްވެސް ބޭނުންވާ ޒަރޫރީ ތަކެތި ރަށްރަށަށް ފޯރުކޮށްދިނުމާއެކު، ސަރުކާރުގެ ފަރާތުން ދޭންޖެހޭ ހިދުމަތްތައް ފުރިހަމައަށް ދެވޭނެ އިންތިޒާމުތައް ހަމަޖެއްސުމަށް ގޮވާލައިފައެވެ. އަދި ނަރުދޫ ފަދައިން ބަލި ފެތުރިފައިވާ ރަށްރަށާއި، ބަލި ފެތުރުމުގެ ނުރައްކާ އޮތް ރަށްރަށަށް ސިއްހީ ހިދުމަތްތެރިންނާއި، ޑޮކްޓަރުން ފޮނުވުމުގެ އިތުރުން އެރަށްރަށުން ފަސޭހައިން ޓެސްޓް ކުރެވޭނެ އިންތިޒާމުތައް ހަމަޖައްސާ، ރައްޔިތުންގެ ރައްކާތެރިކަމަށް ބޭނުންވާ ވަސީލަތްތަކާއި ހިދުމަތްތައް އަވަސްކަމާއެކު ފޯރުކޮށްދެވޭނެ އިންތިޒާމުތައް ހަމަޖެއްސުމަށް ވެސް ވަނީ ގޮވާލައިފައެވެ.

ކޮވިޑް-19 ސިޔާސީ ޕީއެންސީ ޕީޕީއެމް