ކެންޔާގައި ހުވަފަތް ވެފައިވާ އަންހެނަކު، ބަނޑަށް ތިބި އޭނާގެ 8 ދަރިން ރުއްސޭތޯ ބެލުމަށް އުނދުންމައްޗަށް ގާތަކެއް އުދައިގެން ކައްކަމުން ދިޔަ މަންޒަރު އާންމުވުމާއެކު، ގިނަ ބަޔަކު އޭނާއަށް އެހީތެރިކަން ފޯރުކޮށްދޭން ފަށައިފިއެވެ.
ކެންޔާގެ މުމްބާސާއަށް ނިސްބަތްވާ ޕެނީނާ ބަހާތީ ކިތްސާއޯ މިކަން މި ގޮތަށް ކުރީ، ކާނެ އެއްޗެއް ލިބޭނެ ވަގުތެއްގެ އިންތިޒާރުގައި ތިއްބާ ދަރިންކޮޅަށް ނިދިދާނެ ކަމަށް އުއްމީދުކޮށްގެން ކަމަށްވެއެވެ.
ކިތްސާއޯ މީގެ ކުރިން އާމްދަނީ ހޯދާ އުޅުނީ ހިސާބުގަނޑުގައި އެއްޗެހި ދޮވުމުގެ މަސައްކަތް ކޮށްގެންނެވެ. ކަންމިހެން އޮތްއިރު، މިއަދު ކުރިމަތިލާންޖެހިފައިވާ ކޮރޯނާވައިރަސް (ކޮވިޑް-19)ގެ ބަލިމަޑުކަމާއެކު، މިފަދަ މަސައްކަތްތަކެއް ހޯދުމަކީ ކިތްސާއޯއަށް މާ ފަސޭހަކަމެއް ނޫނެވެ. ބަލިމަޑުކަން ފެތުރުން ކޮންޓްރޯލް ކުރުމަށް ތަންފީޒު ކުރަމުންދާ ހަރުކަށި ފިޔަވަޅުތަކާއެކު، މީހުންނާ ބައްދަލުވެ އުޅުން މިވަނީ މުޅިންހެން ހުއްޓުމަކަށް އައިސްފައެވެ.
ލިޔަންކިއަންވެސް ނުދަންނަ ކިތްސާއޯ ދިރިއުޅުމުންދިޔައީ 2 ކޮޓަރީގެ ގެއެއްގައެވެ. ކަރަންޓާ ފެނުގެ ހިދުމަތެއް އެ ގެއަކު ނުހުރެއެވެ.
ކިތްސާއޯ ދިރިއުޅެމުންދިޔަ ހާލު އެންމެ ފުރަތަމަ ފާހަގަވީ އޭނާގެ އަވަށްޓެރިއެއް ކަމަށްވާ ޕްރިސްކާ މޮމާންޔީއަށެވެ. ސިހުމެއްގައި ހުރި މޮމާންޔީ، މީޑިއާގެ ސަމާލުކަމަށް އެކަން ގެނެސްދިނެވެ.
ކެންޔާގެ އެންޓީވީއިން ކުރިއަށް ގެންދިޔަ އިންޓިވިއުއަކަށްފަހު އެކި ގޮތްގޮތުން ކިތްސާއޯއަށް އެހީ ލިބެން ފެށިއެވެ.
ކިތްސާއޯ މިހާރު ސިފަކުރާ ގޮތުގައި ކެންޔާގެ މީހުންނަކީ އެހާ ހިތްހެޔޮ ބައެއްކަމެއް ކުރިން އޭނާއަށް ގަބޫލުކުރެވިފައެއް ނެތެވެ. ކިތްސާއޯ ބުނި ގޮތުގައި، އެގައުމުގެ އެކި ހިސާބުތަކުން މިއަދު އޭނާއަށް ގުޅާ ހަދައެވެ. އަދި އެހީތެރިކަން ފޯރުކޮށްދެވޭނީ ކިހިނަކުންތޯ އޮޅުން ފިލުވާ ހަދާކަމަށް ކިތްސާއޯ ވަނީ ކެންޔާގެ މީޑިއާއަކަށް ކިޔައިދީފައެވެ.
އުނދުން މައްޗަށް ތެއްޔެއް އުދާ، އެއަށް ގާ އަޅައިގެން ކައްކަމުންދިޔަ ހާދިސާއާއި ބެހޭ ގޮތުން ކިތްސާއޯ ބުނީ، އޭނާގެ ދަރިންނަށްވެސް އެކަން އެނގުނު ކަމަށެވެ. މަންމަ އޮޅުވާލަނީކަން ދަރިންނަށް އެނގުނު ކަމަށާ، ނަމަވެސް އެކަމާ ކޮށްދެވޭނެ ވަކި އިތުރު ކަމެއް އޭރު ނެތް ކަމަށް ކިތްސާއޯ ބުންޏެވެ.
ކިތްސާއޯގެ ގޭގައި ހިނގަމުންދިޔަ ކަންތައްތައް މޮމާންޔީއަށް އެނގުނީ، ދަރިން ރޯއަޑު އިވިގެން ކަމެއް ގޯސްވީތޯ ބެލުމަށް އެގައަށް ދިޔަ ދިއުމުގައި ކަމަށްވެއެވެ.
ކޮވިޑް-19ގެ ސަބަބުން އެންމެ ބޮޑު އަސަރެއް ކުރަމުންދާނެ އެއް ބަޔަކީ މާލީ ތަނަވަސްކަން ނެތް ނާޒުކު ހާލުގައި ދިރިއުޅޭ އާއިލާތައް ކަމަށްވާއިރު، ކެންޔާގެ ސަރުކާރުންވަނީ މިފަދަ ފަރާތްތަކަށް ކާބޯތަކެތި ފޯރުކޮށްދިނުމުގެ މަޝްރޫއެއް ފަށާފައެވެ. ނަމަވެސް، މިދިޔަ އަހަރު ގޭންގަކުން ފިރިމީހާ މަރާލާފައިވާ ކިތްސާއޯގެ އާއިލާއާއި ހިސާބަށް އޭރު އަދި ސަރުކާރުގެ އެހީ ފޯރާފައެއް ނުވެއެވެ.
މޮމާންޔީގެ މަސައްކަތުން ކެންޔާގެ ކަމާބެހޭ ފަރާތްތަކާ، ކެންޔާގެ ރެޑް ކްރޮސްގެ އެހީ މިހާރު ވަނި ކިތްސާއޯއާއި ހިސާބަށް ފޯރާފައެވެ. މިކަމުގެ ފައިދާ، އެ ސަރަހައްދުގެ އެހެން އާއިލާތަކަށްވެސް މިހާރު ލިބެމުންދާނެ ކަމަށް ކަމާބެހޭ ފަރާތްތަކުން ބުނެއެވެ.
ކެންޔާގައި ކޮވިޑް-19 ފެތުރިފައިވާ ހާލަތަށް ބަލާއިރު އެގައުމުން 396 ކޭހެއް ވަނީ ރިޕޯޓްކޮށްފައެވެ. އަދި މި ބަލީގައި 17 މީހެއްގެ ފުރާނަ ގެއްލިފައިވާކަމަށް ރެކޯޑްތަކުން ދައްކައެވެ.
