އިންޑީއާގެ ބެންގަލޫރާއި ކޮޗިންގައި ތިބި 159 ދިވެހިން ރާއްޖެއަށް ގެނެސްފިއެވެ.
މޯލްޑިވިއަން އިން ބުނީ މިއަދު އިންޑިއާގެ ބެންގަލޫރު އަދި ކޮޗިންގައި ތިބި ދިވެހިން މޯލްޑިވިއަންގެ ފްލައިޓުގައި ރާއްޖެއަށް ގެނެސްފައިވާ ކަމަށެވެ. އެ ގޮތުން މިއަދު އައި ފްލައިޓުގައި ޖުމްލަ 159 ފަސިންޖަރުން ގެނެސްފައިވާ ކަމަށް މޯލްޑިވިއަނުން ބުނެއެވެ.
އެ ފްލައިޓު ރާއްޖޭގެ ވެލާނާ އިންޓަނޭޝަނަލް އެއާޕޯޓުގައި ޖައްސާފައިވަނީ ގާތްގަނޑަކަށް މިއަދު މެނދުރު 1:00 ހާއިރިކަމަށް މޯލްޑިވިއަނުން ބުނެއެވެ.
ރޭ ދަރުބާރު ގޭގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ އިންޑިއާގެ ބެންގަލޫރާއި ކޮޗިންގައި ތިބި 157 ދިވެހިން މިއަދު ރާއްޖެއަށް ގެންނާނެ ކަމަށެވެ. އެ ފްލައިޓުގައި ރާއްޖެއަށް ގެންނަ 157 ދިވެހިންނަކީ އާސަންދަ ސްކީމްގެ ދަށުން އިންޑިއާއަށް ބޭސްކުރުަން ގޮސް ތިބި ބަލި މީހުންނާއި ބަލި މީހާގެ އެހީތެރިންނެވެ.
ކޮވިޑް-19އާ ގުޅިގެން ރާއްޖެއިން ބޭރުގައި ތިބި ދިވެހިން ގެނައުމުގެ މަސައްކަތް ކުރަމުންދާ މި ދަނޑިވަޅުގައި ކޮންމެހެން އަންނަން ޖެހޭ މީހުން މެނުވީ ނައުމަކީ އެންމެ ރަނގަޅު ގޮތް ކަމަށް ވެސް މަބްރޫކް ވަނީ ވިދާޅުވެފައެވެ. އެގޮތުން މި ދަނޑިވަޅުގައި އެއާޕޯޓަށް އައުމަށް ވުރެ ބިރުވެރިކަމެއް ނެތް ކަމަށާއި ރާއްޖެއިން ބޭރުގައި ތިބެވޭ ހާލަތު އޮތް ފަރާތްތައް ގޭގައި ތިބުމަށް މަބްރޫކް ވަނީ ވިދާޅުވެފައެވެ.
ރާއްޖެއިން ބޭރުގައި ތިބި ދިވެހި އައިލާތަަކަށް ޒަރޫރީ ބޭނުންތަކަށް ބޭނުންވާ ތަކެތި ފޮނުވުމުގެ ގޮތުން ސަރުކާރުން މިހާތަނަށް ވަނީ ލަންކާ، އިންޑިއާ އަދި މެލޭޝިޔާގައި ތިބި އާއިލާތަކަށްވެސް ތަކެތި ފޮނުވުމުގެ ފުރުސަތު ދީފައެވެ. އަދި ބެންކޮކުގައި ތިބި ދިވެހި އާއިލާތަކަށްވެސް މާދާމާ ތަކެތި ފޮނުވޭނެ އިންތިޒާމް ހަމަޖައްސާފައި ވާއިރު ޔޫއޭއީގައި ތިބި ދިވެހިންނަށް މިމަހުގެ 17 ވަނަ ދުވަހު ތަކެތި ފޮނުވޭނެ ގޮތްވެސް ވަނީ ހަމަަޖައްސާފައެެވެ.
