ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަން ކޮންޓްރޯލް ކުރުމަށް އިންޑިއާއިން ގެންގުޅެމުންދާ ކޮންޓެއިންމަންޓް ޒޯން މޮޑެލްގެ ދަށުން އިތުރު ސަރަހައްދުތަކެއް ބަންދުކުރުމަށް ނިންމައިފިއެވެ.
ކޮންޓެއިންމަންޓް ޒޯން މޮޑެލްއަކީ، ބަލީގެ ނުރައްކާ އެންމެ ބޮޑުވެފައިވާ ސަރަހައްދުތަކެއް ފާހަގަކޮށް އެސަރަހައްދަށް ވަދެނިކުމުގެވުމުގެ ހުރިހާ ހުއްދައެއް ބާތިލުވާ ގޮތަށް ވަކި ސަރަހައްދުތަކެއްގައި ހަރުކަށި ލޮކްޑައުންގެ އަމުރެއް ތަންފީޒު ކުރާ އުސޫލުން ހިންގާ މޮޑެލްއެކެވެ. އިންޑިއާގައި އެންމެ ފުރަތަމަ މިކަން ތަޖުރިބާކާކޮށްފައިވަނީ ރާޖަސްތާނުގައެވެ.
މައުލޫމާތު ލިބޭ ގޮތުގައި ވެރިކަން ކުރާ ދިއްލީގައި 20 ކޮންޓެއިންމަންޓް ޒޯންއެއް ވަނީ ކަނޑައަޅާފައެވެ. ދިއްލީގެ ޑެޕިއުޓީ ޗީފް މިނިސްޓަރު މަނީޝް ސިސޯޑިއާ ވިދާޅުވީ، ކޮންޓެއިންމަންޓް ޒޯންތައް ބަންދުކޮށްފައިވާއިރު އެސަރަހައްދުތަކުގެ ތެރޭގައިވެސް އާންމު އުސޫލުން ނިކުމެ ނުއުޅެވޭނެ ކަމަށެވެ.
އިންޑިއާގެ އެންމެ އާބާދީ ބޮޑު އުއްތަރަ ޕްރަދޭޝް ސްޓޭޓްގައި 104 ސަރަހައްދެއް ކޮންޓެއިންމަންޓް ޒޯންގެ ގޮތުގައި ވަނީ ކަނޑައަޅާފައެވެ. އެ ސްޓޭޓްގެ 15 ސަރަހައްދެއް، މިމަހުގެ 15 ވަނަ ދުވަހުގެ ނިޔަލަށް މުޅިން ބަންދުވާނެ ކަމަށްވެސް ޚަބަރު ލިބެއެވެ.
ޖޯން ހޮޕްކިންސް ޔުނިވާސިޓީގެ ތަފާސް ހިސާބުތަކަށް ބަލާއިރު އިންޑިއާއިން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 5916 އަށް އަރާފައެވެ. އަދި މި ބަލީގައި އެގައުމުން މަރުވި މީހުންގެ އަދަދު 178 އަށް އަރައެވެ.
