ކަނޑައެޅިފައިވާ އަގަށްވުރެ ބޮޑުކޮށް މުދާ ވިއްކައިފިނަމަ ޖޫރިމަނާ ކުރުމަށް ނިންމައިފިއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓް އިން މިއަދު ނެރުނު ބަޔާނެއްގައި ބުނީ، މިވަގުތު ރާއްޖޭގެ އިގްތިސޯދީ ހާލަތަށް ރިއާޔަތްކޮށް، ބައެއް ތަކެތިން އަގު ކޮންޓްރޯލް ކުރުމަށް ނިންމާފައިވާ ކަމަށެވެ. އެގޮތުން އަންނަ ހޯމަ ދުވަހުން ފެށިގެން ބައެއް ތަކެތި ރީޓެއިލްކޮށް ވިއްކޭނެ އެންމެ މަތީ އަގު އިކޮނޮމިކް މިނިސްޓްރީން ވަނީ ކަނޑައަޅާފައެވެ.

އެންމެ މަތީ އަގު ކަނޑައެޅިތަކެތި އަދި މީހުން ދިރިއުޅޭ ހުރިހާ ރަށެއްގައި އެތަކެތި ވިއްކޭނެ އެންމެ މަތީ އަގު:

  • 1 ކިލޯގްރާމް އާދައިގެ ރަތް ފިޔާ - 20 ރުފިޔާ
  • 1 ކިލޯގްރާމް އާދައިގެ އަލުވި - 20 ރުފިޔާ
  • 1 ކިލޯގްރާމް ރީނދޫ މުގު - 45 ރުފިޔާ
  • 1 ހުދު ކުކުޅު ބިސް - 1.80 ރުފިޔާ

އިކޮނޮމިކް މިނިސްޓްރީން ބުނީ، މިއަގުތައް ކޮންމެ ހަފްތާއަކު މުރާޖައާ ކުރެވޭނެ ކަމަށެވެ.

އެ މިނިސްޓްރީން ބުނީ، މި އަގުތަކަށްވުރެ، ބޮޑުކޮށް އަގު ކޮންޓްރޯލްކޮށްފައިވާ މުދަލެއް ވިއްކައިފިނަމަ، ފުރަތަމަ ފަހަރު، އެ ފަރާތެއް ގިނަ ވެގެން 100،000 ރުފިޔާއިން ޖޫރިމަނާ ކުރެވޭނެ ކަމަށެވެ. އަދި ކުށްތަކުރާރު ކުރާ ކޮންމެ ފަހަރަކުވެސް އެ ފަރާތެއް އެންމެ ގިނަ ވެގެން 100،000 ރުފިޔާއިން ޖޫރިމަނާ ކޮށް 6 މަސްދުވަހަށްވުރެ ދިގުނޫން މުއްދަތަކަށް ވިޔަފާރިކުރާތަން ބަންދުކުރުމަށް އެންގޭނެ ކަމަށެވެ.

ހަބަރު އިކޮނޮމިކް މިނިސްޓްރީ