ލަންކާއަށް ކެއާޕެކޭޖް ފޮނުވަން ގިނަ ބަޔަކު އަވީގައި ކިއޫ ހަދާލައިފިއެވެ.
ކާގޯ ފެލައިޓުތައް މެދުވެރިކޮށް ސްރީލަންކާގައި ދިރިއުޅޭ ދިވެހިންނަށް ކެެއާ ޕެކޭޖުތައް ގިނަ ބަޔަކު ކިއުަގއި ތިބީ، ގްރޭޓާ މޭލެ ބަސް ޓާމިނަލް ކައިރީގައެވެ. މި ކާގޯ ދަތުރުތައް ކުރުމަށް ހަމަޖެހިފައި ވަނީ، މޯލްޑިވިއަން ކަމަށްވުމާއެކު، ކެއާ ޕެކޭޖުތައް ބަލައިގަތުމަށް ހަމަޖެހިފައިވަނީ، ގްރޭޓާ މާލެ ބަސް ސްޓޭޝަނުގައި ހުންނަ މޯލްޑިވިއަން ސިޓީ ޗެކިން އޮފީހުންނެވެ.
ކޮންމެ ހޮނިހިރު ދުވަހެއްގެ ހެދުނު 9:00 އިން މެންދުރު 1:00 ގެ ނިޔަލަށް ކެއާ ޕެކޭޖުތައް ބަލައިގަތުމަށް ހަމަޖެހިފައިވާއިރު، ގްރޭޓާ މާލެ ބަސް ޓާމިނަލް ސަރަހައްދުގައި ގިނަ ބަޔަކު ކިއު ހަދާލާގައި ވަނީ އަވީގައެވެ.
އަވީގައި ކިއު ހަދައިގެން ތިބެ، މިއަދު 11:00ގެ ނިޔަލަށް 666 ކެއާ ޕެކޭޖު މޯލްޑިވިއަންއާ ހަވާލުކޮށްފައިވާ ކަމަށް އެ އެއާލައިނުން ބުނެއެވެ. މީގެ އިތުރުން، ގިނަ ބަޔަކު އަވީގައި ތިބެން ޖެހުމުން، އެކަމުގެ ޝަކުވާތައް ސޯޝަލް މީޑިއާގައި އާންމުވުމާ ގުޅިގެން، އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ ވިދާޅުވީ، ކެއާ ޕެކޭޖު ހަވާލު ކުރުުމުގެ ޕްރޮސީޖާ ރިވިއު ކުރައްވާނެ ކަމަށެވެ.
ގްރޭޓާ މާލެ ބަސް ޓާމިނަލުގައި ކެއާ ޕެކޭޖުތައް ބަލައިގަތުން ކުރިއަށްދާއިރު، ޓާމިނަލް ތެރޭގައި ގޮނޑި ޖަހާފައި ވަނީ އިޖުތިމާއީ ގައި ދުރުކަމަށް ބަލައިގެންނެވެ.
ކާގޯގެ ގޮތުގައި ކެއާ ޕެކޭޖު ފޮނުވޭނީ ވަކި އަދަދެއް ކަމުން، ކެއާ ޕެކޭޖުތައް ފޮނުވަން ހަމަޖެހިފައި ވަނީ ފޯމް ހުށަހަޅާ ތަރުތީބަށް އިސްކަން ދީގެންނެވެ. އަދި ފޯމުގައިވާ މައުލޫމާތަށް ބިނާކޮށް ތަކެތި ލޭބަކް ކުރާއިރު، ލަންކާގެ ހައި ކޮމިޝަނުން މި ތަކެއްޗާއި ހަވަލުވެ، ލިބެންވީ ފަރާތަށް ރައްދުކޮށްދޭނެ ކަމަށް ފޮރިން މިނިސްޓްރީން ބުނެއެވެ.
ކެއާ ޕެކޭޖު ފޮނުވުމާބެހޭ އުސޫލު:
- ކާގޯގެ ގޮތުގައި ފޮނުވެނީ ލަންކާއިން ލިބެންނެތް ބޭހެއް ނުވަތަ އެހެނިހެން ޒަރޫރީ ކަމެއްގައި ފޮނުވާ ތަކެތި
- ކޮންމެ އާއިލާއަކަށް ފޮނުވޭނީ ގިނަވެގެން 15 ކިލޯގެ ތަކެތި
- ކާގޯގެ ގޮތުގައި، ބޭސް (ބޭސްސިޓީއާއެކު)، މަސްދަޅު ކޭސް، ނޫޑްލިސް ކޭސް، މަސް/ފަތް ޕެކެޓު ( ފިހާރަތަކުން ވިއްކާ ޕެކެޓުކޮށް ބަންދުކުރެވިފައިވާ ތަކެތި އަދި ރިހާކުރު (ހަމައެކަނި މިފްކޯ ނުވަތަ އެންޒީ އޮރިޖިނަލް ޕެކިންގައި ހުންނަ ފުޅި)
- ފައިސާ، ރޯމަސް، ކޭކު، ހެދިކާ، މޭވާ އަދި ތަރުކާރީ ކާގޯގެ ގޮތުގައި ނުފޮނުވޭނެ
ފޮރިން މިނިސްޓްރީން ބުނީ، މިކަމުގައި ހުށަހަޅަންޖެހޭ ފޯމު، ކޮންމެ ބުރާސްފަތި ދުވަހެއްގެ ކުރިން ފުރިހަމަކޮށް، އޮންލައިންކޮށް ހުށަހަޅަން ޖެހޭ ކަމަށެވެ. އެ މިނިސްޓްރީން ބުނީ، ތަކެތި ގެންނަންވާނީ މޯލްޑިވްސް ކަސްޓަމްސް އަދި އޭވިއޭޝަން ސެކިއުރިޓީން ބެލުމަށްފަހު ޕެކްކޮށްފައިވާ ފޮށިގަނޑެއްގައި އެޕްރޫވް ފޯމާއެކު ކަމަށެވެ.
ލަންކާއަށް ކާގޯ ފްލައިޓް ދަތުރުކުރުމަށް ހަމަޖެހިފައިވަނީ ކޮންމެ ހަފްތާއެއްގެ އާދިއްތަ ދުވަހެވެ.
