އިންޑިއާގައި ހަލުވިކަމާއެކު ކޮވިޑް-19 ފެތުރެމުން ދަނީ ޖަމާއަތް ހަދައިގެން އިސްލާމުންތަކެއް ކުރިއަށް ގެންދިޔަ ދީނީ ހަރަކާތަކާ ގުޅިގެން ކަމަށް އިންޑިއާގެ ބައެއް މީޑިއާތަކުން ފެތުރި ޚަބަރާއެކު، މުސްލިމުންނާ ދެކޮޅަށް އެގައުމުގައި އަނެއްކާވެސް ވަރުގަދަ ހަމަލާތަކެއް އަމާޒުކުރަން ފަށައިފިއެވެ.
އިންޑިއާއިން ކޮވިޑް-19އަށް ޕޮޒިޓިވް ވެފައިވާ މީހުންގެ އަދަދު 2567 އަށް އަރާފައި ވާއިރު، މީގެ ތެރެއިން 300 ކޭހެއް، އެ ބުނާ ޖަމާއަތާ ގުޅިފައި ވާކަމަށް އިންޑިއާގެ އެކި ސްޓޭޓްތަކުން ވަނީ ރިޕޯޓް ކޮށްފައެވެ.
މިދިޔަ ހޯމަ ދުވަހު މި ޚަބަރުތައް ފެންމަތި ވުމާއެކު މުސްލިމުންނާ ދެކޮޅަށް އިންޑިއާގައި އާންމުކޮށް ބޭނުންކުރާ ހޭޝްޓެގްތައް ބޭނުން ކޮށްގެން ސޯޝަލް މީޑިއާގެ އެކި ޕްލެޓްފޯމުތަކުގައި ފުރައްސާރަ ކުރުންތައް ފެށިއެވެ. އެގޮތުން ޗައިނާ އަކީ ވައިރަސް އުފެއްދި ފަރާތް ކަމަށާ، މުސްލިމުންނަކީ އެ ވައިރަސް ބަހަމުންދާ މީހުން ކަމަށް ބުނެ މުސްލިމުންނަށް ފުރައްސާރަ ކުރި ބަޔަކުވެސް އުޅެއެވެ.
ކަންމިހެން އޮތްއިރު ސިކުންގެ ޖަމާއަތަކުން ބޭއްވި ހަރަކާތަކުން ގުޅިގެންވެސް ބަޔަކު ކޮވިޑް-19އަށް ޕޮޒިޓިވް ވެ، އެތައް ހާސް ބަޔަކު ވަނީ ކަރަންޓީނަށް ލާފައެވެ.
