ކޮވިޑް-19އިން ރައްކާތެރިވުމުގެ ގޮތުން އިންޑިއާ 21 ދުވަހަށް ލޮކްޑައުން ކުރުމާ ގުޅިގެން، އިންޑިއާ އިން ރާއްޖެ ނުގެނެވި ހުރި ބޭސް ޝިޕްމަންޓް އަންނަ ބުރާސްފަތި ދުވަހު ރާއްޖެ ގެންނަނަން ފޮރިން މިނިސްޓްރީން ނިންމައިފިއެވެ.
ފޮރިން މިނިސްޓްރީން ބުނީ ބޭސްތައް ރައްކާތެރިކަމާ އެކު، ރާއްޖެ ގެނައުމުގެ މަސައްކަތް އެމްއެންޑީއެފާއި އިންޑިއާގެ ސިފައިން ގުޅިގެން ފަށާފައިވާ ކަމަށެވެ. އެ ބޭސްތައް ނުގެނެވިހުރީ އިންޑިއާގެ އެކި ސިޓީތަކުގައެވެ. އެ މިނިސްޓްރީން ބުނީ ނިއުދިއްލީ، މުމްބާއީ، ޗެންނާއީ އަދި މަދޫރާއީގައި ހުރި އަށް ޓަނުގެ ބޭސް ރާއްޖެ ގެނައުމަށްޓަކައި އިންޑިއަން އެއާފޯސްގެ މަތިންދާބޯޓުތަކުން އެއްތަނަކަށް މާދަމާގެ ވަގުތެއްގައި ގެންދާނެ ކަމަށާއި އަންނަ ބުރާސްފަތި ދުވަހު އިންޑިއަން އެއާފޯސްގެ މަތިންދާބޯޓެއްގައި އެ ބޭސްތައް ރާއްޖެ ގެންނާނެ ކަމަށެވެ.
އެސްޓީއޯއިން ބުނީ އެއި މީގެ ކުރިން އެ ކުންފުނިން އޯޑަރުކޮށްފައިވާ ބޭސް ޝިޕްމަންޓެއް ކަމަށާއި ވަކިން ކޮވިޑް-19އާ ގުޅިގެން ރާއްޖެ ގެންނަން އޯޑަރު ކުރި ޝިޕްމަންޓެއް ނޫން ކަމަށެވެ.
ނުގެނެވި ހުރި ބޭސް އަންނަ ބުރާސްފަތި ދުވަހު ގެނައުމަށް ނިންމާފައިވާއިރު، އިންޑިއާއިން ވަނީ ކޮވިޑް-19އާ ގުޅިގެން ރާއްޖެ އަށް ތިން މަހުގެ ބޭސް ހިލޭ އެހީގެ ގޮތުގައި ދޭން ނިންމައިފައެވެ. ރާއްޖެ އަށް މިކަމުގައި އިންޑިއާ އިން އެހީތެރިކަން ފޯރުކޮށްދިން ނަމަވެސް އެ ގައުމުން ވަނީ ބޭސް އެކްސްޕޯޓު ކުރުން މިވަގުތައް މެދުކަނޑާލައިފައެވެެ.
އިންޑިއާ އިން ރާއްޖެ އަށް ދަނީ ކާބޯތަކެތީގެ އެހީވެސް ފޯރުކޮށްދެމުންނެވެ. ކޮވިޑް-19 އާއި ގުޅިގެން އެގައުމުގެ މެޑިކަލް ޓީމެއްވެސް ދާދިފަހުން ވަނީ ރާއްޖެ އައިސްފައެވެ.
