ކޮވިޑް19 އާ ގުޅިގެން މާލޭގެ ގާޑިޔާތައް ވެސް ބަންދުކޮށްފިއެވެ.
މިކަމާއި ގުޅިގެން މާލެސިޓީ ކައުންސިލުން ނެރުނު އިއުލާނެއްގައި ބުނެފައިވަނީ، މާލެ ސަރަހައްދުގައި ކާބޯތަކެތީގެ ހިދުމަތް ދޭ ތަންތަން އާންމުންނަށް ބަންދުކުރުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެންގުމުން އެކައުންސިލްގެ ބެލުމުގެ ދަށުން ހިންގާ ގާޑިޔާތައް ވެސް ބަންދުވާނެ ކަމަށެވެ.
އެ ގާޑީޔާތައް ބަންދުކޮށްފައި ވަނީ ރޭ ދަންވަރު 12:00 އިން ފެށިގެންނެވެ. ކޮވިޑް19 އާއި ގުޅިގެން މާލޭގައި ހިންގަމުންދާ ގާޑީޔާތައް ބަންދު ކޮށްފައިވާއިރު، މާލެ، ހުޅުމާލެ އަދި ވިލިމާލޭގައި ހިންގާ ކެފޭ، ހޮޓާ، ރެސްޓޯރެންޓް ފަދަ އާންމުންނަށް ކާބޯތަކެތީގެ ހިދުމަތްދޭ ހުރިހާ ތަނެއްވަނީ ވަކި ގޮތެއް އަންގަންދެން ބަންދު ކޮށްފައެވެ. ނަމަވެސް އެޗްޕީއޭއިން ބުނީ އެ ތަންތަނުން ޓޭކްއަވޭ އާއި ޑެލިވަރީގެ ހިދުމަތް ފޯރުކޮށްދެވޭނެ ކަމަށެވެ.
ރާއްޖޭގައި ކޮވިޑް19 ކޮންޓްރޯލް ކުރުމަށް ސަރުކާރުގެ ފަރާތުން އަންނަނީ ރައްކާތެރިކަމުގެ ފިޔަވަޅުތައް އަޅަމުންނެވެ. އެގޮތުން ފަތުރުވެރިން ނާއި އަދި މީހުންވެސް އެއް ރަށުން އަނެއް ރަށަށް ދަތުރު ކުރުން މަނާ ކުރުމާއި، މާލޭގައި ކަބޯތަކެތީގެ ހިދުމަތްދޭ ތަންތަން ބަންދު ކުރުމާއި، ރާއްޖޭގެ ހުރިހާ ސްކޫލް އަދި ޔުނިވާސިޓީތަކާއި ކޮލެޖުތައްވެސް ބަންދުކުރުން ހިމެނެއެވެ.
ރާއްޖޭގައި މިހާތަނަށް ކޮވިޑް19 އަށް 13 މީހަކު ޕޮޒިޓިވް ވެފައިވާއިރު، އޭގެތެރެއިން 3 މީހަކު ވަނީ އެ ބަލިން ރަނގަޅު ވެފައެވެ.
