ސްރީލަންކާއިން ރާއްޖެއަށް އައި "އެލިއޯން" ނަމަކަށް ކިޔާ އުޅަދުން ބިދޭސީއެއްގެ ގައިން ކޮވިޑް-19 އަށް ޝައްކު ކުރެވޭ އަލާތްތައް ފެނިއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، މި މަހުގެ 17 ވަނަ ދުވަހު ސްރީލަންކާއިން ރާއްޖެ އައި "އެލިއޯން" ކިޔާ އުޅަނދަކުން ބިދޭސީއެއްގެ ސާމްޕަލް ނަގާ ޓެސްޓްކުރުމުގެ މަސައްކަތް ކުރިޔަށްގެންދާ ކަމަށެވެ.
މީގެ އިތުރުން އެޗްޕީއޭ އިން ބުނީ އެ ބިދޭސީ މީހާގެ ޓެސްޓްގެ ނަތީޖާ ލިބެންދެން އެ އުޅަނދު ވަނީ މޮނިޓަރިން ހާލަތަކަށް ގެނެވިފައި ކަމަށެވެ.
މިހާތަނަށް އައި އިރު ރާއްޖެއިން މި ބައްޔަށް ޕޮޒިޓިވް ވެފައިވަނީ 13 މީހުންނެވެ. އެއީ ހުސް ބިދޭސީންނެވެ. މިއަދާ ހަމައަށް މި ބަލި ޖެހިފައިވާ މީހުންގެ ތެރެއިން 3 މީޙުން ވަނީ ރަނގަޅުވެފައެވެ. އެހެންކަމުން މިހާރު މި ބައްޔަށް ފަރަުވާ ކުރަމުން ދަނީ ޖުމްލަ 10 މީހުންނެވެ.
ލަންކާއިން ކޮވިޑް-19އަށް ޕޮޒިޓިވްވި މީހުންގެ އަދަދު 73 އަށް އަރާފައި ވާއިރު، 3 މީހަކު ވަނީ ފަރުވާ ހޯދައިގެން ރަނގަޅުވެފައެވެ.
ސްރީލަންކާއަކީ ރާއްޖެއިން ބޭރުގައި އެންމެ ގިނަ އަދަދަކަށް ދިވެހިން ވަޒަންވެރިވެގެން ދިއުޅޭ ގައުމަށް ވާއިރު، ލަންކާ ސަރުކާރުގެ އަމުރުތަކަށް ބޯލަނބާ، ކިޔަމަން ވުމަށް ދިވެހިރާއްޖޭގެ ކަމާބެހޭ ފަރާތްތަކުން ވަނީ ގޮވާލާފައެވެ.
