އިދިކޮޅު ޕްރޮގްރެސިވް ކޯލިޝަން، ޕީއެންސީގެ ރައީސް އަދި ފޮނަދޫ ދާއިރާގެ ކުރީގެ މެންބަރު އަބްދުއްރަހީމް އަބްދުﷲ (އަދުރޭ)ގެ އަނގަ މުއްދަތެއް ނެތް ގޮތަށް ލައްޕަން ޖެހޭ ކަމަށް ވިދާޅުވެ ކުރީގެ ބަންޑާރަ ނާއިބު ފާތިމަތު ދިޔާނާ ސައީދު އަދުރޭއަށް ފާޑު ވިދާޅުވެއްޖެއެވެ.

ދިޔާނާ މިއަދު ކުރެއްވި ޓްވީޓެއްގައި ވިދާޅުވީ "އަބްދުއްރަހީމުގެ އަނގަ ލައްޕަން ޖެހޭނީ މުއްދަތެއް ނެތް ގޮތަށް" ކަމަށެވެ. ދިޔާނާ މިފަދައިން ޓްވީޓު ކުރެއްވީ އިންތިހާބު ފަސް ކުރަން ޖެހޭނީ މުއްދަތެއް ނެތް ގޮތަށް ކަމަށް ރޭ ޕްރޮގްރެސިވް ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި އަދުރޭ ވިދާޅުވުމާ ގުޅިގެންނެވެ.

ބެލެވޭ ގޮތުގައި ދިޔާނާ މިފަދައިން ވިދާޅުވެފައި މިވަނީ އިންތިހާބާއި ގުޅިގެން އަދުރޭ ތަފާތު އެކި ގޮތް ގޮތަށް ވާހަކަ ދައްކަވާތީ ކަމަށް ވެދާނެއެވެ. އެގޮތުން އަދުރޭ ވަނީ ޕީޕީއެމްގެ އޮފީހުގައި ބޭއްވި ޖަލްސާއެއްގައި އިންތިހާބު ފަސް ކުރުމަކީ އެ ކޯލިޝަނުން ބޭނުންވާ ކަމެއް ނޫން ކަމަށާއި އިންތިހާބު ފަސް ކުރުމަށް ތާއީދު ނުކުރައްވާނެ ކަމަށް ވިދާޅުވެފައެވެ. އަދި އިންތިހާބު މިހާރު އޮތް ތާރީހުގައި ބޭއްވުމަށް އޭނާ ގޮވާލެއްވިއެވެ.

ނަމަވެސް އޭގެ އެއް ދުވަސް ފަހުން އަދުރޭ ކުރެއްވި ޓްވީޓެއްގައި ވިދާޅުވީ ހާލަތަށް ބަލާ އިންތިހާބު ފަސް ކުރަން ޖެހިއްޖެ ނަމަ އިދިކޮޅުގެ ތާއީދު ލިބިގެންދާނެ ކަމަށެވެ. އަދި ރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އަދުރޭ ވަނީ ކައުންސިލް އިންތިޚާބު ފަސްކުރަން ޖެހޭނީ ވަކި މުއްދަތެއް ނެތް ގޮތަށް ކަމަށާއި މުއްދަތު އިޢުލާން ކުރަންޖެހޭނީ އާއްމު ސިއްހަތުގެ ކުއްލި ނުރައްކަލުގެ ހާލަތު އުވާލުމުން ކަމަށެވެ. އަދި އަދުރޭ ވަނީ ވިދާޅުވީ އިންތިޚާބުގައި ކެމްޕެއިން ކުރުމުގެ ފުރުސަތު ޕާޓީ ތަކަށް ދޭން ޖެހޭ ކަމަށާއި އަދި އިންތިޚާބު ބާއްވަން ޖެހޭނީ އެއްވެސް ބިރުވެރިކަމެއް، ނެތް މާހައުލެއްގެ ތެރެއިން ކަމަށް ވިދާޅުވެފައެވެ.

އިލެކްޝަންސް ކޮމިޝަނުން މިހާރު ވަނީ ކުރިޔަށް އޮތް ލޯކަލް ކައުންސިލް އިންތިހާބު ފަސް ކުރުމަށް ނިންމާފައެވެ. އެގޮތުން އަންނަ މަހުގެ ހަތަރުވަނަ ދުވަހު ބޭއްވުމަށް ނިންމާފައި އޮތް ކައުންސިލް އިންތިހާބު މިހާރު ބޭއްވުމަށް ނިންމާފައިވަނީ އަންނަ މަހުގެ 18ވަނަ ދުވަހަށެވެ.

އަބްދުއްރަހީމް ސިޔާސީ ޕީއެންސީ ޕީޕީއެމް