ދުނިޔޭގައި ހަލުވި ކަމާއެކު ފެތުރެމުންދާ އާ ކޮރޯނާ ވައިރަސް މިހާރު ރާއްޖޭން ވެސް ފެނިފައި ވާއިރު، އެ ބަލި ފެތުރުން ހުއްޓުވުމަށްޓަކައި ޗައިނާގެ ސިއްހީ މާހިރުންތަކެއްގެ އެހީތެރިކަން ރާއްޖެއަށް ފޯރު ކޮށްދިނުމަށް އެގައުމުން ނިންމުމުން އެކަމަށް ދިވެހި ސަރުކާރުން ދެކޮޅު ހެދި ކަމަށް އިދިކޮޅުން ތުހުމަތު ކޮށްފިއެވެ.
އެގޮތުން، އިދިކޮޅު ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް މިއަދު ކުރެއްވި ޓްވީޓެއްގައި ވިދާޅުވީ ނޭވާލާ ނިޒާމުގެ ބަލިތަކަށް ހާއްސަ ޑޮކްޓަރުންގެ ޓީމަކާއެކު ބޭސް ރާއްޖެއަށް ފޮނުވަދޭނެ ކަމަށް ޗައިނާ އިން ބުނުމުން، އެކަމަށް ދިވެހި ސަރުކާރުން ނޫނެކޭ ބުނެފައިވާ ކަމަށެވެ. އަދި ސަރުކާރުން އެކަމަށް އިންކާރުކުރި ސަބަބު ސާފު ކޮށްދިނުމަށް ވެސް އޭނާ ވަނީ ގޮވާލާފައެވެ.
ޝިޔާމްގެ އިތުރުން ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުހައްމަދު ސައީދު ވެސް ވަނީ ޝިޔާމްގެ ވާހަކައަށް ބާރު ލިބޭ ބީދައިން ވާހަކަދައްކަވާފައެވެ. އެގޮތުން ސައީދު ވިދާޅުވީ ކޮވިޑް-19 އާ ދެކޮޅަށް ޗައިނާގެ ސިއްހީ މާހިރުންނަށް ލިބިފައިވާ ތަޖުރިބާއާއި ފަންނީ ލަފާ ޔޫރަޕާ ހިއްސާކުރަމުންދާ ދަނޑިވަޅެއްގައި، ރާއްޖެއަށްވެސް އެފަދަ އެހީތެރިކަމެއް ދޭން ތިބި ބަޔަކާއި އެކު މަސައްކަތް ކުރުން މި ދަނޑިވަޅުގައި މުހިންމު ކަމަށެވެ. އަދި ވިދާޅުވީ އެފަދަ އެހީތެރިކަމެއް ޗައިނާއިން ހޯދުމަށް ފޮރިން މިނިސްޓްރީން ކުރަމުން އަންނަ މަސައްކަތަށް އެއްވެސް ބޭފުޅަކު ހުރަސްނާޅުއްވާނެ ކަމަށް އުއްމީދު ކުރައްވާ ކަމަށްވެސް ސައީދު ވިދާޅުވިއެވެ.
އިދިކޮޅުން މިފަދަ ތުހުމަތެއް ކޮށްފައިވާއިރު ކޮވިޑް19 އާ ގުޅިގެން އިންޑިއާ ސަރުކާރުން ރާއްޖެއަށް އެހީތެރިވުމަށް ވަނީ ނިންމާފައެވެ. ރާއްޖޭގައި ހުންނަ އިންޑިއާގެ ހައިކޮމިޝަނުން މިއަދު ނެރުނު ނޫސްބަޔާނެއްގައި ބުނީ މުޅި ކޮވިޑް19 އަކީ މުޅި ދުނިޔެއަށް ފެތުރިފައިވާ ބަލި މަޑުކަމެއް ކަމަށް ޑަބްލިއުއެޗްއޯ އިން ނިންމުމާއި ގުޅިގެން އިންޑިއާއިން ރާއްޖެއަށް އެހީވުމަށް ނިންމާފައިވާ ކަމަށެވެ. އެގޮތުން އިންޑިއާގެ ސިއްހީ މާހިރުންނާއި ހިދުމަތްތެރިންގެ ޓީމެއް ރާއްޖެއަށް ފޮނުވަން ނިންމާފައިވާ ކަމަށް އެ ބަޔާނުގައި ވަނީ ފާހަގަކޮށްފައެވެ.
ރާއްޖެއިން އިންޑިއާއަށް ފޮނުވާ ޓީމުގައި ނޭވާލާ ނިޒާމުގެ ބަލިތަކަށް ހާއްސަ ޑޮކްޓަރުންނާއި ހޭނެއްތުމަށް ހާއްސަ ޑޮކްޓަރުންގެ އިިތުރުން ފިޒީޝަނުން އަދި ލެބްޓްރީ ޓެކްނީޝަނުންވެސް ހިމެނޭ ކަމަށް ހައި ކޮމިޝަނުގެ ބަޔާނުގައިވެއެވެ. މީގެއިތުރުން ކޮވިޑް19 އަށް ފަރުވާ ދިނުމަށް ބޭނުންކުރާ ގިނަ އަދަދެއްގެ ބޭސްތަކެއް ރާއްޖެއަށް ހަދިޔާ ކުރުމަށްވެސް ނިންމާފައިވާ ކަމަށް އެ ބަޔާނުގައިވެއެވެ. މި ބޭސްތަކަކީ އިންޑިއާއިން އެކްސްޕޯޓު ކުރުމަށް މަނާ ކޮށްފައިވާ ބޭސްތަކެކެވެ. ނަމަވެސް އެ ބަޔާނުގައި ބުނީ ބޭސްތައް ރާއްޖެއަށް ހަދިޔާ ކުރުމަށް ނިންމީ އިންޑިއާ އަދި ރާއްޖެއާ އޮންނަ ގާތް ގުޅުމުގެ ސަބަބުން ކަމަށެވެ.
މިހާރު މިގައުމަކުން ނޭގޭނެ ދޮގުހަބަރަކީ ކޮބާކަމެއް އަދި ތެދު ހަބަރަކީ ކޮބާކަމެއް ތަނެއްދޮރެއްނުބަލާ އެބަޔަކު އަނގަޔަށް އައި އެއްޗެއް ގޮވަމުން މިދަނީ.
މީ ތެދުޚަބަރެއް ކަމުގައިވާނަމަ ތިހެދީ ވަރަށްބޮޑުގޯހެއް ސަބަބަކީ ޗައިނާ އެވަނީ މިކަމުން ވަރަށްގިނަތަޖުރިބާ ތައްކޮށް ވަރަށްބޮޑުކާމިޔާބީއެއްހޯދާފަ އެތަޖުރިބާ އެހެންއެއްވެސްބަޔަކަށް އަދިލިބިފައެއްނުވާނެ އުއްމީދުކުރަނީ މިކަންސިޔާސީނުކޮށް ރައްޔިތުންގެ މަންފާއަށްބަލައިގެން ގެންދާނެކަމަށް.