މަޝްހޫރު 'ޖޭމްސް ބޮންޑް' ފިލްމް ފްރެންޗައިޒްގެ އެންމެ ފަހުގެ ފިލްމު "ނޯ ޓައިމް ޓު ޑައި" ރިލީޒްކުރަން ހަމަޖެހިފައި އޮތް ތާރީޚު ފަސްކޮށްފިއެވެ.
މައުލޫމާތު ލިބޭ ގޮތުގައި ފިލްމު ރިލީޒްކުރުން ފަސްކޮށްފައިވަނީ ގާތްގަނޑަކަށް 7 މަސްދުވަހުގެ މުއްދަތަކަށެވެ. މި ފިލްމު ރިލީޒްކުރުމަށް މިހާރު ހަމަޖައްސާފައިވަނީ މިއަހަރުގެ ނޮވެމްބަރު މަހުގެ 25 ވަނަ ދުވަހުއެވެ. އިނގިރޭސިވިލާތުގައި ފިލްމު ރިލީޒްކުރާނީ ނޮވެމްވަރު 12 ވަނަ ދުވަހު ކަމަށް ޚަބަރު ލިބެއެވެ.
ފިލްމު ރިލީޒްކުރުން ފަސްކޮށްފައިވަނީ ދުނިޔޭގެ އެކި ހިސާބުތަކުގައި ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ސަބަބުންނެވެ.
"ނޯ ޓައިމް ޓު ޑައި"ގެ ޕްރޮޑިއުސަރުން ބުނި ގޮތުގައި، މި ނިންމުމަކީ، ބައިނަލްއަގުވާމީ ފިލްމީ ސިނާއަތުގެ ބާޒަރުގެ ހަރަކާތްތައް ރަނގަޅަށް ދިރާސާކޮށް، ބަލާ ހެދުމަށް ފަހު ނިންމި ނިންމުމެކެވެ. ޕްރޮޑިއުސަރުން މިކަން ހާމަކޮށްފައި މިވަނީ، 'ޑަބަލްއޯސެވަން' އަށް ހާއްސަ 2 ފޭން ސައިޓަކުން މިކަމަށް ގޮވާލަމުން ދަނިކޮށެވެ.
"ނޯ ޓައިމް ޓު ޑައި" އަކީ އިނގިރޭސި ސީކްރެޓް ސާވިސް އޭޖެންޓް 'ޖޭމްސް ބޮންޑް'ގެ ކެރެކްޓަރުން، މަޝްހޫރު ބަތޮލް ޑެނިއަލް ކްރެއިގް ފެނިގެންދާނެ އެންމެ ފަހު ފިލްމެވެ. ކުރިން ހަމަޖެހިފައި އޮތް ގޮތުން ނަމަ މި ފިލްމް ރިލީޒްކުރާނީ އަންނަ އޭޕްރިލް މަހުގެ 3 ވަނަ ދުވަހުއެވެ.
ޗައިނާއާއި ދެކުނު ކޮރެޔާގެ ގިނަ ސިނަމާތަކެއް ބަންދުކޮށް އިޓަލީވިލާތުގައިވެސް ހަރުކަށި ފިޔަވަޅުތަކެއް ތަންފީޒު ކުރަމުންދާއިރު، ކޮވިޑް-19ގެ ސަބަބުން ބައިނަލްއަގުވާމީ ބޮކްސް އޮފީހުން 5 ބިލިއަން ޑޮލަރު މިއަހަރު އުނިވެގެން ދިއުން އެކަށީގެންވާކަމަށް ފިލްމީ ދާއިރާގެ ޚަބަރުތައް ދިރާސާކުރާ މުރާސިލުން ލަފާކުރެއެވެ.
