މޯލްޑިވްސް ހައްޖު ކޯޕަރޭޝަންގެ އަންނަ މަހުގެ އުމްރާ ދަތުރުތައް ކެންސަލް ކޮށްފިއެވެ.
ކޮރޯނާ ވައިރަސް މެދު އިރުމަތީގެ ގައުމުތަކަށް ވެސް ހަލުވި ކަމާއެކު ފެތުރެމުން ދާތީ އޭގެ ސަބަބުން ސިއްހީ ބަލި މަޑު ކަމުން ސަލާމަތް ވާން ސައޫދީން ވަނީ އެ ގައުމަށް ދަތުރު ކުރުމުގައި ފިޔަވަޅުތަކެއް އަޅާފައެވެ.
މިކަމާ ގުޅިގެން ހައްޖު ކޯޕަރޭޝަނުން ބުނީ، ސައުދީ ރައްޔިތުންނާއި ހަރަމްފުޅަށް ޒިޔާރަތް ކުރާ އެންމެންގެ ސަލާމަތާއި ރައްކާތެރިކަމަށް އެޅި އެ ފިޔަވަޅާއެކު ހައްޖު ކޯޕަރޭޝަންގެ މާޗް އުމްރާ ކެންސަލްކޮށްފައިވާ ކަމަށެވެ.
ހައްޖު ކޯޕަރޭޝަނުން ނެރުނު ބަޔާނުގައި ބުނެފައިވަނީ، މާޗްގެ އުމްރާވެރިން ދެން އަމަލު ކުރަންވީ ގޮތް އެ ކޯޕަރޭޝަނުން އަންގަމުން ގެންދާނެ ކަމަށެވެ. އަދި އުމްރާ ދަތުރާ ގުޅިގެން މާދަމާ ބާއްވަން ހަމަޖައްސާފައި އޮތް ތަމްރީން ބައްދަލުވުން ވެސް ކެންސަލް ކޮށްފައިވާ ކަމަށް ބަޔާނުގައި ވެ އެވެ.
މިއަދު ރާއްޖޭން ވަނީ، އުމްރާގެ އަޅުކަމަށް އެއް ގްރޫޕް ފުރާފަ އެވެ. އެއީ ނަވާ ހައްޖު އެންޑް އުމްރާ ގުރޫޕްގެ ފަރާތުން އުމްރާއަށް ދާ 49 މީހުނެވެ. އެ އެންމެންނަށް ވިސާ ލިބިފައިވާއިރު ފުރުމަށް ހުރަހެއް ނެތް ކަމަށް ސައުދީ އެއާލައިނުން ވެސް ވަނީ އަންގާފަ އެވެ. އެ ގުރޫޕްގެ ފަރާތުން އެޑްވާންސް ޓީމެއް ވެސް ވަނީ ސައުދީއަށް މިހާރު ގޮސްފަ އެވެ.
