އިންތިހާބާ ދިމާކޮށް މި ސަރުކާރުން ޕީޕީއެމަށް ބިރުދައްކަން ފެށި މަސައްކަތުގައި ކުރީގެ ހައުސިން މިނިސްޓަރު އަދި ޕީޕީއެމްގެ ނައިބު ރައީސް ޑރ. މުހައްމަދު މުއިއްޒުއާ ހަަމައިން ނިންމާ ނުލާނެކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދަޅުވެއްޖެއެވެ.
ލޯކަލް ކައުންސިލް އިންތިހާބު ކައިރިވެފައި ވަނިކޮށް، މާލެސިޓީގެ މޭޔަރުކަމަށް ޑރ. މުއިއްޒު ޕީޕީއެމްގެ ޓިކެޓުގައި ކުރިމަތިލައްވާފައި ވަނިކޮށް އޭނާ ވަނީ ފުލުހަށް ހާޒިރުކޮށްފައެވެ. ޑރ. މުއިއްޒާ ގުޅޭގޮތުން ފުލުހުން ތަހުގީގު ކުރަމުން ގެންދާ މައްސަލައަކީ ނޫމަޑި ރިސޯޓްސް އެންޑް ރެސިޑެންސުން ދިވެހި ސަރުކާރުގެ މައްޗަށް ހުށަހެޅި އާބިޓްރޭޝަން މައްސަލައިގައި އޭނާ އަމަލުކުރެއްވި ގޮތާ ގުޅިގެން އެޓާނީ ޖެނެރަލްގެ އޮފީހުން ހުށަހެޅި މައްސަލައެކެވެ.
'ދަ ޕްރެސް' އަށް މައުލޫމާތު ދެއްވަމުން ޖަމީލު ވިދާޅުވީ، މި ސަރުކާރުން އުޅެނީ ރާއްޖޭގައި ހުރި މިނިވަން މުއައްސަސާތައް ބޭނުންކޮށްގެން ވާދަވެރި ސިޔާސީ ފަރާތްތައް ނައްތާލަން ކަމަށެވެ. އެގޮތުން އެންމެ ފުރަތަމަ މަސައްކަތް ފެށިގެން ދިޔައީ ރައީސް އަބްދުﷲ ޔާމީންގެ ދައުވާއިން ކަމަށާއި މިހާރު ޑރ. މުއިއްޒު ފުލުހަށް ހާޒިރުކޮށްގެން ސީޔާސީ ގޮތުން ނުފޫޒު ފޯރުވަމުން ގެންދާ ކަމަށް ވިދާޅުވިއެވެ.
އަދި ކުރިއަށް އޮތް ލޯކަލް ކައުންސިލް އިންތިހާބުގައި ޕީޕީއެމްގެ ފަރާތުން ވާދަކުރާ ކެންޑިޑޭޓުންނަށްވެސް މި ސަރުކާރުގެ މުއައްސަސާތައް ބޭނުންކޮށްގެން ބިރު ދައްކާނެ ކަމަށް ޖަމީލު ވިދާޅުވިއެވެ.
ޖަމީލް ވިދާޅުވީ ހާއްސަކޮށް އެމްޑީޕީ ވެރިކަަމަށް އަންނަ ފަހަރުތަކުގައި ސަރުކާރުގެ މުއައްސަސާތައް ބޭނުން ކުރާ ކަމަށާއި އެގޮތުން ވެރިކަމުގައި ތިއްބަވާ ބޭފުޅުން ކޯޓުތަކާއި ފުލުހުންގެ އިދާރާ ބޭނުންކުރައްވާ ކަމީ ހިތާމަކުރައްވާ ކަމެއް ކަމަށެވެ.
ލޯކަލް ކައުންސިލް އިންތިހާބާ ދިމާކޮށް މާލޭގެ ކާނިވާ ސަރަހައްދުގައި އެމްޑީޕީގެ ފަރާތުން ބޭއްވި ޖަލްސާއަށް ފާޑުވިދާޅުވަމުން ޖަމީލު ވިދާޅުވީ މިހާރު އެމްޑީޕީއަށް ރައްޔިތުންގެ މަގްބޫލުކަން ނެތްކަން ހާމަވެފައިވާ ކަމަށާއި އެކަން އެނގުމުން ކުއްލިއަކަށް ޑރ. މުއިއްޒުގެ މައްޗަށް ފުލުސް އޮފީސް ބޭނުންކޮށްގެން ހަގީގަތެއްނެތް ސިޔާސީ ދައުވާތަކެއް ކުރަނީ ކަމަށެވެ.
މުއިއްޒު ފުލުސް އޮފީހަށް ހާޒިރުކޮށް ސުވާލުކޮށް ހެދުމުން އަދި މިކަންތައް ނުނިމޭ ކަމަށް ޖަމީލު ވިދާޅުވިއެވެ. ކުރިއަށް އޮތް ތަނުގައި މުއައްސަސާތައް ބޭނުންކޮށްގެން ޕީޕީއެމްގެ ޓިކެޓުގައި ވާދަކުރަމުންދާ ކެންޑިޑޭޓުންގެ ކެންޑިޑެސީއަށް "ލޮޅުން" އަރުވާލައި "ބިރުގަންނަވާލުން" ކުރިއަށް ގެންދާނެ ކަމަށް ޖަމީލް ތުހުމަތު ކުރެއްވިއެވެ.
ދާދި ފަހުން ޑރ. ޖަމީލު ވަނީ ޖޭޕީގެ ވަޓްސްއެޕުން ނުކުމެވަޑައިގެންފައެވެ. ޖަމީލު ދެން ޕީޕީއެމާ ގުޅިވަޑައިގެންނަވާނެ ކަމަށް އަޑުތައް ފެތުރެމުން ގޮސްފައިވީ ނަމަވެސް އެކަން ޖަމީލު ވަނީ ދޮގު ކުރައްވާފައެވެ. މި ކަމާ ގުޅިގެން ޖަމީލު ވިދާޅުވެފައި ވަނީ ޕީޕީއެމަށް ސޮއިކުރައްވާނީ ކޮން އިރަކު ކިހިނެއް ކަމެއް އަދި ވިސްނަވާފައި ނެތް ކަމަށެވެ.
މީގެ އިތުރުން ޖަމީލު ވިދާޅުވެފައި ވަނީ، ކުރިއަށް އޮތްތަނުގައި ރައީސް ޔާމީންގެ ޝާރީއަތުގެ މަސައްކަތްތަކަށް "ފޯކަސް" ކުރައްވާނެ ކަމަށެވެ. އަދި އިދިކޮޅަކީ އޭނާގެ ފަޅިކަމަށް ގަބޫލު ކުރައްވާ ކަމަށާއި އެ ފަޅީގައި ހުންނަވާ ކުރައްވަން ޖެހިވަޑައިގަންނަވާ ކަންކަމުގައި އެހީތެރިވެ ވަޑައިގަންނަވާނެ ކަމަށް ޖަމީލު ވިދާޅުވެފައި ވެއެވެ.
