ބަލާބެލުމަށް މިއީ ހަގީގަތުގައިވެސް ކޭކުތަކެއް ކަމުގައި ހީވި ނަމަވެސް، މިއީ އެއްވެސް ހާލެއްގައި ފޮނިކާއެއްޗެއް ނޫނެވެ. ނޫޑްލްސް ކޭކް ކިއަނީ ހަމަ ހަގީގަތުގައިވެސް މިއީ ނޫޑްލްސް ބޭނުންކޮށްގެން ތައްޔާރުކޮށްފައިވާ "ކޭކަކަށް" ވާތީއެވެ.
ނޫޑްލްސް ބޭނުންކޮށްގެން ކޭކުގެ މައިގަނޑު ބައިތައް ތައްޔާރުކުރާއިރު، ކޭކު ފަރުމާކޮށްފައި ހުންނަނީ ކުކުޅު ރިހައާއި، ގެރި ރިހައިގެ އިތުރުން ކާށިކިރު ބޭނުންކޮށްގެންނެވެ.
މި ކޭކު ތައްޔާރުކުރަނީ އިންޑޯމީ ނޫޑްލްސް ބޭނުންކޮށްގެންނެވެ. ހެޔޮވަރުގެ މެދުމިނުކެ ކޭކެއް އެޅުމަށް 14 ވަރަކަށް ޕެކެޓު ނޫޑްލްސް ބޭނުންވެއެވެ.
މިއީ އިންޑޮނޭޝިއާއަށް ހާއްސަ އުފެދުމެކެވެ. މިފަހަކަށް އައިސް އިންޑޮނޭޝިއާއަށް ޒިޔާރަތްކުރާ މީހުންގެ މެދުގައިވެސް މިއީ މަގުބޫލު އުފެއްދުމެކެވެ. މީގެ އިތުރުން ކައިވެނި ހަފުލާތަކާ، އެކި ކަހަލަ ޕާޓީތަކުންވެސް މިހާރު ނޫޑްލްސް ކޭކު ދަނީ ޖާގަ ހޯދަމުންނެވެ.
މި ކޭކުގެ ވާހަކަ ސޯޝަލް މީޑިއާގައި އާންމުވީ ދާދި ފަހުން ކަމުގައި ވީނަމަވެސް، އިންޑޮނޭޝިއާގައި ނޫޑްލްސް ކޭކު ތައްޔާރުކުރާތާ މިހާރު 3 އަހަރެއްހާ ދުވަސް ވެދާނެއެވެ.
މިކަމުން ހިތްވަރު ލިބި، ނޫޑްލްސް ޑޯނަޓްވެސް އިންޑޮނޭޝިއާގެ މާކެޓްގައި ދަނީ ބޮޑު މަގުބޫލުކަމެއް ހޯދަމުންނެވެ.
