ފިރިމީހާ ބަނގުރޫޓުވުމުން ދިރިއުޅުން ކޮޅަށްޖެހީ ފާތިމާގެ ކުކީ ވިޔަފާރިން!

އީރާނުގެ އިރުމަތީ ސަރަހައްދުގައި އޮންނަ ލޫތު ސަހަރާގެ ރަށްފުށު އަވަށެއް ކަމަށްވާ ސީ-ގާލްގައި ދިރިއުޅެމުންދާ ފާތިމާ ސަފަރުޕޫ މިއަދު އޭނާގެ އާއިލާގެ ހުރިހާ ކަމެއް ހަމަޖައްސަމުންދަނީ ކޫކީ ހަދާ، ވިއްކައިގެންނެވެ. އޭނާ މިކަން ފެށީ، ދިރިއުޅުމުގެ ޒަރޫރީ ބޭނުންތައް ފުއްދުމަށް ބޭނުންވާ ފައިސާކޮޅު ލިބޭނެ މަގެއް ހޯދުމުގެ ގޮތުންނެވެ. ނަމަވެސް މިއަދު މިއީ އަވަށު ފެންވަރުގައި ފާތިމާ ފަދަ އިތުރު އެތައް އަންހެނުންނަކަށް ވަޒީފާގެ ފުރުސަތު ލިއްބައިދޭ ބޮޑު ބޭކަރީ ވިޔަފާރިއެކެވެ. މި ވިޔަފާރި ކޮޅަށް ޖެހުމުގައި ފާތިމާއަށް އެންމެ ގާތުން އެހީވަމުންދިޔައީ ކާބޯޓަކެއްޗާ ދަނޑުވެރިކަމާބެހޭ އދގެ އިދާރާ (އެފްއޭއޯ) އާއި އޭނާ ނިސްބަތްވާ މުޖުތަމައުންނެވެ.

ފާތިމާގެ ދިރިއުޅުން އެފުށްމިފުށަށް ޖެހުނީ މީގެ 18 ވަރަކަށް މަސްދުވަސްކުރިންނެވެ. އެއީ އޭނާގެ ފިރިމީހާ ބަނގުރޫޓުވި ހިސާބުންނެވެ. 3 ދަރިން ބެލުމުގެ ހުރިހާ ކަމެއްގެ ޒިންމާ އުފުލަންޖެހުނީ ފާތިމާއަށެވެ. އެހެންނަމަވެސް އޭރު އޭނާއަށް އާމްދަނީ ލިބޭނެ އެއްވެސް މަގެއް ނެތެވެ. އެހާ ދުވަހާ ޖެހެންދެން ފާތިމާގެ ހަމައެކަނި ޒިންމާއަކަށް އޮތީ ގޭތެރޭގެ ކަންކަން ބެލެހެއްޓުމެވެ. ނަމަވެސް ދިރިއުޅުން ވެއްޓުނު އަނދަވަޅުން ނެގުމަށް އާމްދަނީ ހޯދަންޖެހޭކަން ފާތިމާ ގަބޫލުކުރީ ހިތުގެ އަޑިންނެވެ.

ދަސްވެފައި ހުރި ހުނަރަކާ، ލިބެން ހުރި ވަސީލަތްތަކަށް ބެލުމަށްފަހު ފާތިމާއަށް ލިބުނު އެންމެ ރަނގަޅު ހިޔާލަކަށްވީ އީރާނަށް ހާއްސަ ސަގާފީ ކުކީ ތައްޔާރުކޮށްގެން އާމްދަނީ ހޯދުމަށް ލިބުނު ހިޔާލެވެ. ހަރަދުތައް ދެކޮޅު ޖައްސަމުން، ދިރިއުޅުން ކޮޅަށްޖެހިދާނެ ކަމާ މެދު ސުވާލުތަކެއް އުފެދުނު ނަމަވެސް، މި އަޒުމައިގެން ފާތިމާ ކުރިއަށްދިޔައެވެ. ނަސީބުވެސް ފާތިމާގެ އަތުގައި ހިފިއެވެ. އެފްއޭއޯގެ ޕްރޮޖެކްޓަކަށް ފާތިމާ ޝަރުތު ހަމަވިއެވެ. އަކަންވެސްވީ މަސައްކަތަށް ލިބުނު އިތުރު ހިތްވަރަކަށެވެ. މިކަމުގައި ފާތިމާއަށް އެއްބާރުލުން ދެމުންދިޔައީ އޭނާ ނިސްބަތްވާ އަވަށްގަނޑުގައި ދިރިއުޅެމުންދިޔަ އޭނާ ފަދަ އެހެން އަންހެނުންތަކެކެވެ.

ކުކީ ވިޔަފާރީގެ ތެރެއަށް ވަނުމަށް އެހީދޭ ފަންޑުން ފާތިމާ އެންމެ ފުރަތަމަ ނެގީ އެންމެ 100 އެއްހާ ޑޮލަރުގެ ލޯނެކެވެ. އެ ފައިސާއިން އޭނާ ހޯދި ކުޑަ އަވަނަކާ، އެނޫންވެސް އެފަދަ ބައެއް ސަމާނެވެ. ކުޑަކުޑަ ބޭކަރީ ހުޅުވީ އަމިއްލަ ގޭގައެވެ.

ބޭކަރީ ހިނގައިގަތީ ފަތުއަޑުކިޔާފައެވެ. އެއީ ގޭގައި ކުޑަކުޑަ އަވަނަކުން ކުރެވޭނެ ކަމެއް ނޫންކަން ފާތިމާއަށް އެނގުނެވެ. ނަފުސު ހަފުސް ވާ ވަރަށް މަސައްކަތްކުރުމަކީ އެންމެ ރަނގަޅު ގޮތް ނޫންކަންވެސް އޭނާ އަށް އެނގުނެވެ. އެހެންކަމުން އިތުރު މާލީ އެހީ ހޯދައިގެން ފާތިމާ މިސްރާބުޖެހީ އޭނާގެ ބޭކަރީގެ މަސައްކަތްތައް ލުއިފަސޭހަ ގޮތެއްގައި ކުރެވޭނެ އިންތިޒާމުތައް ހަމަޖެއްސުމަށެވެ. އެގޮތުން، ގާ އަތުރައިގެން ހަދާ ޒާތުގެ ބޮޑެތި އަވަން-އުނދުންތައް ހަދަން ފާތިމާ ދަސްކުރިއެވެ. އަދި އެތަކެތި ބޭނުންކޮށްގެން ކުކީ ފިހަންވެސް އޭނާ ދަސްކުރިއެވެ. މީގެ ކުރިން ފަހަރަކު ޓްރޭއެއް ފިހަމުންދިޔަ ފާތިމާ ތައްޔާރުކުރި އަވަން-އުނދުނުގައި އެއްފަހަރާ 7 ޓްރޭ ފިހެވޭ ގޮތް ހެދިއެވެ.

"އިތުރު 2 އަންހެނެއްގެ އެހީތެރިކަމާއެކު ދުވާލަކު 50 ކިލޯގެ ކުކީ މިހާރު އުފެއްދޭ. މިއާއެކު ޖުމުލަ ފައިދާ 70 އިންސައްތަ އިތުރުވެސްވެއްޖެ. ޚަރަދަށް ކަނޑާފަ، ކޮންމެ ދުވަހަކުވެސް ފައިދާގެ ގޮތުގައި 10 ޑޮލަރުވަރު އަހަރެންނަށް ލިބޭ. ﷲ އަށް ޙަމްދުހުރި. މިހާރު އަހަރެންގެ އާއިލާގެ ބޭނުންތައް ފުއްދާދެވޭ. މިހާރު އެބަ ވިސްނަން ބޭކަރީ ބޮޑު ކުރަންވެސް. އިތުރު މެޝިނަރީ ހޯދާ، އިތުރު އަންހެނުންތަކަކަށް ވަޒީފާގެ ފުރުސަތު ހޯދާދޭންވެސް އެބަ ވިސްނަން" ފާތިމާގެ އަދުގެ ހާލަތުގެ ހުލާސާއެއް ދިނެއެވެ.