65 އަހަރުން މަތީގެ މީހުންނަކީ ޖިސްމާނީ ގޮތުންނާ ނަފްސާނީ ގޮތުން 'ފިޓް' ނުވަތަ ދުޅަހެޔޮ ބައެއް ކަމުގައި ހަދައި، ކުރިއަށް އޮތް ތަނުގައި ދޮށީ އުމުރުގެ މީހުންގެ ވެލްފެއާއާއި ސިއްހީ ކަންކަމަށް ދައުލަތުން ކުރަންޖެހޭ ޚަރަދުތައް ކުޑަކުރުމުގެ ގޮތުން، ފިންލަންޑްގެ އަވަށަކުން ހާއްސަ މަޝްރޫއެއް ފަށައިގެން ކުރިއަށް އެބަ ގެންދެއެވެ.
ފިންލަންޑްގެ އަވަށެއް ކަމަށްވާ ކުރީއްކާގެ މޭޔަރު އެނާ-ކައިސާ ޕޫސާގެ މޭސްތިރިކަމުގެ ދަށުން ފަށާފައިވާ މި މަޝްރޫއަކީ ދޮށީ އުމުރުގެ މީހުންނަށް ކަސްރަތު ކުރުމަށް މަގުފަހިކޮށްދޭ ޕްރޮގްރާމެކެވެ. މި ޕްރޮގްރާމް އަމާޒު ކޮށްފައި ވަނީ އުމުރުން 65 އަހަރުން މަތީގެ މީހުންނަށް އެއްވެސް އަގަކާ ނުލާ ޖިމް ބޭނުން ކުރެވޭ ގޮތަށެވެ. ޖިމްގައި ތިބޭ އިންސްޓްރަކްޓަރުންގެ އިތުރުން، އެމީހަކަށް ހާއްސަ ކަސްރަތު ޕްލޭންތައްވެސް ފަރުމާކޮށްފައި ވަނީ ދޮށީ އުމުރުގެ މީހުން ކުރަންވީ ކަސްރަތުތައް އެމީހުންނަށް އަންގައިދޭ ފަދަ ގޮތަކަށެވެ.
މި ހިދުމަތަށް ހާއްސަ ކުރެވިފައި ވާ ވައުޗަރުތަކެއް 65 އަހަރުން މަތީގެ މީހުންނަށް ދޫކުރެއެވެ. މި ވައުޗަރުގެ އެހީގައި ޖިމް ހިދުމަތަށް އަހަރު 800 ޔޫރޯ ހަރަދުކުރަން ލިބެއެވެ. ނަމަވެސް ސޯޝަލް ވެލްފެއާގެ ދަށުން ދޮށީ އުމުރުގެ މީހުންނަށް އަހަރެއްގެ މައްޗަށް ކުރާ ހޭދައަށް ބަލާއިރު، އަހަރަކު 8000 ޔޫރޯ ހަރަދު ކުރަން ޖެހޭކަން މޭޔަރު ވަނީ ފާހަގަ ކޮށްފައެވެ. ބޮޑު ބައްޔެއް ވެގެން ހާއްސަ ފަރުވާ ދޭންޖެހޭ ހާލެއްގައި މިއަދަދު 40000 ޔޫރޯއަށް އިތުރުވާކަން އޭނާ ފާހަގަ ކުރެއެވެ. ނަމަވެސް ކަސްރަތު ކުރުމަކީ ބޮޑެތި ބަލިތަކުން ދުރުކޮށްދޭ ކަމަކަށް ވާއިރު، މޭޔަރުގެ ހިސާބު ކިތާބުން ކިތަންމެ ރަނގަޅަކަށްވެސް ފައިދާ ކުރާނެ ކަމަށް ބެލެވެއެވެ.
މިމަޝްރޫއަކީ 2018 ވަނަ އަހަރުގެ ސެޕްޓެމްބަރު މަހުގެ ތެރޭގައި ފެށި މަޝްރޫއެއް ނަމަވެސް މީޑިއާގެ ސަމާލުކަން ލިބިފައި މިވަނީ އަދި ކިރިޔާއެވެ. އަދުގެ ހާލަތަށް ބަލާއިރު، އެހާތަނުން ފެށިގެން މިމަޝްރޫއުގައި ބައިވެރިވެގެން މަސައްކަތް ކުރަމުން އަންނަ ދޮށީ އުމުރުގެ މީހުންގެ ގައިގެ މަސްތަކުގައި ވަރުޖެހުނު މިންވަރު 30 ޕަސެންޓް އިތުރުވެފައި ވާކަމަށް ވެއެވެ. އަދި އެކި ކަހަލަ ބޭސް ބޭނުން ކުރަން ޖެހޭ މިންވަރުވެސް ދަށްވެފައި ވާކަމަށް، ޖިމްއަށް ދާ ދޮށީ އުމުރުގެ މީހުން ފާހަގަ ކުރެއެވެ.
ޖިމްއަށް އައުމުން އެކަނިވެރިކަން ފިލާ ކަމަށާ، އާ ރައްޓެހިންވެސް ލިބޭ ކަމަށް އެމީހުން ފާހަގަ ކުރެއެވެ. އަދި މިކަމުގެ ސަބަބުން ނަފްސާނީ ދުޅަހެޔޮކަމަށްވެސް އެދެވޭ ބަދަލުތަކެއް އަންނަކަން ކުރީއްކާގެ ދޮށީއުމުރުގެ އާބާދީ ބުނެއެވެ.
ދޮށީ އުމުރުގެ މީހުންނަށް ދުޅަހެޔޮ ސިއްހަތެއް ކަށަވަރު ކޮށްދިނުމަށް ކުރީއްކާގައި ހިންގާ ހާއްސަ ޖިމްގައި ބޭނުން ކުރަނީވެސް ހާއްސަ އާލާތްތަކެކެވެ. މި ތަކެތި ފަރުމާކޮށްފައި ހުންނަނީ ދޮށީ އުމުރުގެ މީހުންގެ ހަށިގަނޑަށް ލިބިދާނެ ކުޑަނަމަވެސް އަނިޔާއަކަށް ބަލައިގެންނެވެ.
މި ޖިމްގެ ހޯދާ އެންމެ ދޮށީ މީހާގެ އުމުރަކީ 95 އަހަރެވެ.
