ދަރިންނަށް ވެކްސިން ދޭން ދެކޮޅު ހެދި ބެލެނިވެރިންނަށް އަންނަ މަހުގެ 22 ވަނަ ދުވަހުން ފެށިގެން ދައުވާ ކުރައްވާނެ ކަމަށް ޕްރޮސެކިއުޓަރު ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް މިހެން ވިދާޅުވީ އޭނާގެ ދަރިފުޅަށް ފުރަތަމަ ޑޯޒްގެ ވެކްސިން ދެއްވުމަށްފަހު ކުރެއްވި ޓްވީޓެއްގައެވެ. އޭނާ ވިދާޅުވީ ދަރިންނަށް ވެކްސިން ދޭން ދެކޮޅު ހެދި ބެލެނިވެރިންނަށް 22 ދުވަސް ފަހުން ދައުވާ ކުރަން ފަށާނެ ކަމަށެވެ.
ޝަމީމް މިގޮތަށް ވިދާޅުވެފައި ވާއިރު، ބައެއް ފަރާތްތަކުން ވަނީ ވެކްސިން ދޭން ދެކޮޅުު ހަދާ ފަރާތްތަކަށް އާސަންދަގެ ހިދުމަށް ނުދިނުމަށްވެސް ގޮވާލާފައެވެ.
ވެކްސިން ޖަހަން އިންކާރު ކުރާ މީހުންގެ ދަރިންނަށް ވެސް ވެކްސިން ދޭނެ ކަމަށް ހެލްތު މިނިސްޓަރު އަބްދުﷲ އަމީން މީގެ ކުރިންވެސް ވަނީ ވިދާޅުވެފައެވެ. އަދި ދެކޮޅު ހަދާ ފަރާތްތަކަށް އަޅަން ޖެހުނު ކޮންމެ ފިޔަވަޅެއްވެސް އަޅުއްވާނެ ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު މިގޮތަށް ވިދާޅުވެފައިވަނީ ރާއްޖެއިން އަލުން ހިމަބިހި ފެނުމާ ގުޅިގެނެވެ. މިހާތަނަށް އަށް މީހަކު ހިމަ ބިހި ޖެހިފައިވެއެވެ.
ރާއްޖޭގައި ހިމަބިހި ފެތުރުން ކޮންޓްރޯލް ކުރުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރަމުންނެވެ. އެގޮތުން މިބަލި ޖެހުމުގެ ފުރުސަތު ބޮޑީ ވެކްސިން ނުޖަހާ ފަރާތްތައް ކަމަށް ވުމާއެކު، ވެކްސިން ނުޖަހާ ތިިބި ފަރާތްތަކަށް ވެކްސިން ދިނުމުގެ ބޮޑު ކެމްޕޭނެއް ވަނީ ފަށާފައެވެ. އަދި ހިމަބިއްސަށް ސްކްރީން ކުރެވޭނެ އިންތިޒާމްތައް ވެސް ވަނީ ހަމަޖައްސާފައެވެ.
މިހާތަނަށް 4449 މީހުންނަށް ވެކްސިން ދީފައިވާނެ ކަމަށާއި، 129 މީހަކު ބައްޔަށް ޓެސްޓުކޮށްފައިވާ ކަމަށް ހެލްތު މިނިސްޓްރީން ބުނެއެވެ. އަދި 497 ސިއްހީ ހިދުމަތްތެރިން ވެސް އެ މިނިސްޓްރީން ވަނީ ތަމްރީނުކޮށްފައެވެ.
