ކ. ގުރައިދޫ ބިން ހިއްކުމުގެ މަސައްކަތް މިއަހަރު ފަށްޓަވާނެ ކަމަށާއި އަދި އެރަށް ކައިރީ ކުޑަ ރަށެއް ހިއްކައިދެއްވާނެ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ކ. ގުރައިދޫއަށް ވަޑައިގެން އެރަށު ހަދާފައިވާ އެމްޑީޕީގެ ހަރުގެ ހުޅުވައިދެއްވައި ރައީސް ވިދާޅުވީ ގުރައިދޫގެ ތަރައްގީއަށްޓަކައި ކޮށްދެއްވާނެ ކަަމަށް ވެވަޑައިގެންނެވި ވައުދުތަކެއް އެބަހުރި ކަމަށެވެ. އެގޮތުން ރިޔާސީ އިންތިހާބަށް އެރަށަށް ކެމްޕޭނަށް ވަޑައިގެންނެވުމުން އެންމެ ބޮޑަށް ދެކެވުނު އެއް ވާހަކައަކީ ބިމުގެ ދަތިކަމުގެ ވާހަކަ ކަމަށެވެ.
"އަޅުގަނޑުމެން މިހާރު ވާނީ މިއަހަރު މިރަށުގެ ބިން ހިއްކުމަށް ބަޖެޓް ކުރެވި އެކަން ފެށުމަށް ތައްޔާރުވެފަ،" ރައީސް ވިދާޅުވިއެވެ.
ރައީސް ވިދާޅުވީ ރަށު ކައުންސިލާ ރައްޔިތުންނާއެކީގައި މަޝްވަރާ ކުރެވި މިހާރު ބިން ހިއްކާނެ ގޮތުގެ ޗާޓް ކުރެހިފައިވާ ކަމަށެވެ. އަދި ބިން ހިއްކިގެން ދާއިރު، އެރަށުގެ ސަހަރާއަށް ލިބިފައިވާ ދަތިކަން ހައްލު ކޮށްދެއްވާނެ ކަމަށެވެ. އަދި އެރަށުގައި ރަނގަޅު ބީޗެއް ހައްދަވައިދެއްވާނެ ކަމަށްވެސް ރައީސް ވިދާޅުވިއެވެ.
"ރައްޔިތުން ތި އެދިވަޑައިގަންނަވާ ގޮތަށް މިހާރު ބިން ހިއްކާ ސަރަހައްދުގައި ބޭރުން ތިބޭފުޅުން ތި އެދިވަޑައިގަންނަވާ ކަހަލަ، ކުޑަ ރަށެއް އިރާދަ ކުރެއްވިއްޔާ އަޅުގަނޑުމެން ހިއްކަ ދޭނަން،" ރައީސް ވިދާޅުވިއެވެ.
ރައީސް ވިދާޅުވީ މިއަހަރު ބޭންކްގެ ހިދުމަތް ފެށިގެން ދާނެ ކަމަށާއި ސްކޫލުގެ އަށް ކްލާސްރޫމްގެ އިމާރާތް ކުރުމުގެ މަސައްކަތްވެސް ފެށޭނެ ކަމަށެވެ. އަދި ސިއްހީ މަރުކަޒު ރަނގަޅަށް ތަރައްގީ ކުރެވި ހިދުމަތް ލިބޭ ގޮތް ހައްދަވައިދެއްވާނެ ކަމަށެވެ.
މާފުށީގެ ބިން ހިއްކުމުގެ މަސައްކަތް މިހާރު ކުރިއަށް ދާކަން ފާހަގަ ކުރައްވައި ރައީސް ވިދާޅުވީ އެރަށު ރައްޔިތުންގެ އެދޭ އެދުމެއް އެބައޮތް ކަމަށެވެ. އެއީ ސުނާމީގެ ކުރިން އޮތް ވަށް މާފުށި އަލުން ހޯދައި ދިނުން ކަމަށާއި މާފުށި ހިއްކިގެން ދާނީ އެގޮތަށް ކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ ކައުންސިލް އެކީގައި ނުކުމެ ކާމިޔާބު ކުރަންޖެހޭ ކަމަށެވެ. އެގޮތުން ކުރަންޖެހޭ މަސައްކަތްތައް ވަރަށް ގިނަ ކަމަށާއި އެކަންތައްތައް ކުރެވޭނީ ސަރުކާރުން ވެފައިވާ ވައުދުތަކާ އެއްގޮތަށާއި ރައްޔިތުންގެ މަޖިލީހުން ފާސްކޮށްފައިވާ ގާނޫނުތަކާއި އެއްގޮތަށް މަސައްކަތް ކުރާ ކައުންސިލްތަކެއް ލިބިގެން ކަމަށެވެ.
ރައީސް ވިދާޅުވީ ރަށްރަށާއި ސިޓީތަކުގެ ތަރައްގީއަށްޓަކައި ކަންތައްތަކެއް ކުރުމަށް ވައުދުވެވަޑައިގެންފައި ވާނެ ކަމަށާއި ވަކި ރަށެއް ތަފާތު ނުކޮށް ހިދުމަތްތައް ދެއްވަން ވައުދުވެވަޑައިގެންފައި ވާނެ ކަމަށެވެ. މިކަންތައްތައް އެންމެ ރަނގަޅަށް ކުރެވޭނީ ގާނޫނީ ގޮތުންނާއި މާލީ ގޮތުން ކައުންސިލްތަކަށް އެބާރުތައް ދޫކޮށްލެވިގެން ކަމަށްވެސް ރައީސް ވިދާޅުވިއެވެ.
"އަޅުގަނޑުމެން މިއަދު މި ހޯދަނީ މިކަން ކުރާނެ ބަޔަކު، މިކަން ކުރެވޭނެ ކަމަށް އަޅުގަނޑުމެން ގަބޫލު ކުރަނީ މިކަން ދަންނަ ބަޔަކަށް، ހަމަގައިމުންވެސް އަޅުގަނޑު ގަބޫލުކުރާ ގޮތުގައި އެމްޑީޕީގެ ތިއްބެވީ އަޅުގަނޑުގެ މި ނިޒާމް ގަބޫލު ކުރައްވާ ބޭފުޅުން،" ރައީސް ވިދާޅުވިއެވެ.
އެ ރަށް ހަދާފަ އެ ފުރައިގެން ދިޔައީ..