އާ އަހަރަކަށް ފެށިގެން އައިއިރު އާންމުކޮށް ކުރަމުން އައި ކަންތައްތައް މުޅިން ތަފާތު، އެހެން ގޮތަކަށް ކުރަން ބައެއް މީހުން ވަނީ ދަސްކޮށްފައެވެ. އެގޮތުން މޭވާ ތޮށިން ކުރެވިދާނެ ތަފާތު އެކި ބޭނުންތަކުގެ ފައިދާ ހާސިލުކުރަން ދަސްކުރަން އަދި މާ ލަހެއް ނުވެއެވެ.
ލުނބޯ ތޮށި
އާންމުކޮށް ކައްކާ، ކައި އުޅޭ ބަދިގެއަކުން ލުނބޯ ތޮށިކޮޅެއް އެއްލާލަން ނުޖެހޭ ދުވަހެއް މަދުވާނެއެވެ. ލުނބޯ ތޮއްޓަކީ ގެވެހި ކަންވާރު ސާފުކުރުމުގެ އެކުވެރިޔާއެވެ. ބަދިގޭގައި ހިފާ ގެންގުޅޭ ސާމާނު ސާފުކުރުމުގެ އިތުރުން، އޭގައި މީރުވަހެއް ހަރުލައްވާދޭ އެއްޗަކީ ލުނބޯ ތޮއްޓެވެ. އެންމެ ފުރިހަމަ ގޮތުގައި ލުނބޯ ތޮށީގެ ފައިދާ ހޯދަން އެދޭނަމަ ކުރަޔަކަށް ފެން އަޅައިގެން ކައްކާއިރު އޭގެ ތެރެއަށް ލުނބޯ ތޮށިތައް އަޅައިގެން ކައްކާލާށެވެ.
އާފަލު ތޮށި
އާފަލު ކައި އުޅޭ ގިނަ މީހުންނަކީ އޭގެ ތޮށި ކާ ބައެއް ނޫނެވެ. ގިނަ ފަހަރަށް ތޮށި އުކާލައެވެ. ނަމަވެސް އޭގެ ބަދަލުގައި، އާފަލު ތޮއްޓާ ލުނބޯ ހުތާ، ފެން އެއްކޮށްގެން ހަކުރުކޮޅެއް އަޅައިގެން ކައްކާލާށެވެ. އަދި ރަނގަޅަށް ހިނދި، ޖެލީ ކޮޅެއްހެން ވަންދެކަށް މަޑުގިނީގައި ކައްކަމުންދާށެވެ. މިގޮތަށް ރަނގަޅަށް އޮލަވެ ޖެލީ ކޮޅަކަށް ވުމުން، ފިހުނު ފޮނި އެއްޗިހި ޒީނަތްތެރިކުރަން ބޭނުންކުރާށެވެ.
ދޮން އަނބު ތޮށި
ދޮން އަނބު ތޮއްޓަކީ ހީނުކުރާ މިންވަރަށް އެންޓި އޮކްސިޑަންޓްސްއިން މުއްސަނދި ވެފައިވާ އެއްޗެކެވެ. ފައިބަރާ އެތައް ވިޓަމިނެއްވެސް މީގައި އެކުލެވިގެންވެއެވެ. ކުޑަ ހިތި ކަމެއް ހުއްޓެއް ކަމަކު ދޮން އަނބު ތޮށިވެސް ހަކުރު ފެނުގައި ކައްކާލާށެވެ. އެއިރުން ހުންނާނީ އަނބު ސިރަޕް ތައްޔާރުކުރެވިފައެވެ. ކުޑަކުޑަ ލުނބޯ ހުތްކޮޅެއް އެއްކޮށްލުމުން، އިތުރަށް ފުރިހަމަވާނެއެވެ.
އަވަކާޑޯ ތޮށި
މިއީ ކެވޭނެ އެއްޗެކެވެ. އެކަމަކު ގިނަ ބަޔަކު އަވަކާޑޯ ތޮށި އެއްލާލަނީއެވެ. މި ގޮތަށް އެއްލާލުމުގެ ބަދަލުގައި އަތާ، މޫނުގެ ހަމުގައި އަވަކާޑޯ ތޮށި ހަކާލުމަށްފަހު 15 ވަރަކަށް މިނެޓް ބެހެއްޓުމަށްފަހު ދޮވެލަށާވެ. ހަމަ ޔަގީނުންވެސް ހިތްއުފާކުރަނިވި ނަތީޖާއެއް ފެންނާނެއެވެ.
މިނޫނަސް ކިތަންމެ މޭވާއެއްގެ ތޮށިން ހިފި ދާނެ ކިތަންމެ ފައިދާއެއް އެބަ ހުއްޓެވެ. އެގޮތުން ދޮންކެޔޮ ތޮށިން ހަންގަނޑު އޮމާން ކޮށްދިނުމާ، ހިއްކި ޓޮމާޓޯ ތޮށީގެ ޕައުޑަރުން ޑިޝްތަކަށް އިތުރު ފުރިހަމަކަމެއް ގެނެސްދިނުން ފަދަ ކިތަންމެ ފައިދާއެއް އެބަހުއްޓެވެ.
