ރިޔާސީ އިންތިހާބުގައި ލާމަރުކަޒީ ނިޒާމުން ރާއްޖެ ތަރައްގީ ކުރުމަށްވީ ވައުދު ފުއްދޭނީ އެކަން ދަންނަ ބަޔަކަށް ކަމަށާއި އެކަން ދަންނަ ބަޔަކަށް ތިބީ އެމްޑީޕީ އެކަނި ކަމަށް ރައީސް އިބްރާހިމް މުހައްމަދު ސޯލިހް ވިދާޅުވިއެވެ.
ހދ. ކުޅުދުއްފުށީގައި މިހާރު ކުރިއަށްދާ އެމްޑީޕީ ކައުންސިލް އިންތިހާބުގެ ކެމްޕޭން ޖަލްސާގައި ރައީސް ވިދާޅުވީ ކައުންސިލް އިންތިހާބަކީ މުޅިން ތަފާތު އިންތިހާބެއް ކަމަށާއި ސަރުކާރު ޖަވާބުދާރީ ކުރުވުމަށްޓަކައި މަޖިލިސް އެބައޮތް ކަަމަށެވެ.
"އަޅުގަނޑުމެންނާއި ވާދަވެރި ބޭފުޅުން ކައުންސިލް އިންތިހާބު އެބޭފުޅުންނަށް ދެއްވަން އެވިދާޅުވަނީ އަޅުގަނޑަކަށް ނޭންގެ ކީއްކުރަން ކަމެއް،" ރައީސް ވިދާޅުވިއެވެ.
ރައީސް ވިދާޅުވީ ކައުންސިލްގެ ދައުރަކަށް ވާން ޖެހޭނީ ސަރުކާރުން ވެފައިވާ ވައުދުތައް ފުއްދުމުގައި އެހީތެރިވެ އެކަންތައްތައް ތަންފީޒު ކުރުން ކަމަށެވެ. އެކަން ކުރެވޭނީ ސަރުކާރުންވީ ވައުދުތައް ގަބޫލު ކުރާ އަދި އެކަމުގެ ވިސްނުންހުރި ފަރާތްތަކަށް ކަމަށެވެ.
ރައީސް ވިދާޅުވީ އެމަނިކުފާނާއި ރައްޔިތުން ހަވާލުކޮށްފައިވާ ޒިންމާއަކާއި ވާޖިބެއް އެބައޮތް ކަމަށެވެ. އެއީ އެމަނިކުފާނު ވެވަޑައިގެންނެވި ވައުދުތައް ފުއްދުން ކަމަށެެވ. އެކަން ކުރެވޭނީ އެކަން ދަންނަ ބަޔަކަށް ކަމަށްވެސް ރައީސް ވިދާޅުވިއެވެ.
"އަމިއްލަ މީހަކު މަސައްކަތެއް ފެށިއަސް، އަޅުގަނޑު ވިޔަފާރިއެއް ކުރިއަސް ނުނީ އަޅުގަނޑު އޮޑިއެއް ބަނަސް، ގެއެއް ރޭނިއަސް. އަޅުގަނޑު ހޯދަން ބޭނުންވާނީ އެކަން ދަންނަ މީހަކު، އަޅުގަނޑުގެ ވިޔަފާރި ހަވާލު ކުރަން އަޅުގަނޑު ބޭނުންވާނީ އެކަން ދަންނަ އެންމެ ރަނގަޅު މީހާއަށް، އަޅުގަނޑުގެ ގެ ހަދަން ބޭނުންވާނީ އެކަން ދަންނަ ރާނާ މޮޅު މީހަކަށް، އެހެންވީމާ އަޅުގަނޑުވީ ވައުދުތައް ލާމަރުކަޒީ ނިޒާމުން ރާއްޖެ ތަރައްގީ ކުރުމަށް، ރަށް ތަރައްގީ ކުރުމުގެ ވައުދުތައް ފުއްދޭނީ މިކަން ދަންނަ ބަޔަކަށް، އަޅުގަނޑު ދަންނަ ގޮތުގައި މިކަން ދަންނަ ބަޔަކަށް ތިބީ އެމްޑީޕީ،" ރައީސް ވިދާޅުވިއެވެ.
ކައުންސިލްތަކުގެ އިންތިހާބު ބޮޑު ތަނުން އެމްޑީޕީއަށް ބޮޑުތަނުން ކާމިޔާބު ކޮށްދޭންޖެހޭ ކަމަށާއި އެހެން ނޫންނަމަ ސަރުކާރުންވީ ވައުދުތައް ފުއްދުމުގައި ހުރަސްތައް ކުރިމަތިވެގެން ހިނގައިދާނެ ކަމަށެވެ.
ރައީސް ވިދާޅުވީ މަޖިލީހުގެ ބޮޑު އަގުލަބިއްޔަތާއެކު ވެވަޑައިގެންނެވި ވައުދުތައް ފުއްދުމުގައި ވަރަށް ބޮޑުތަން ފަސޭހަވެފައިވާ ކަމަށެވެ. އަދި ސަރުކާރުން ކުރާ ކަންތައްތައް ބަލައި ޒިންމާދާރު ކުރުވުމުގައި ރައްޔިތުން މަޖިލީހުގެ ފުރިހަމަ ދައުރު އެބޭފުޅުން އަދާ ކުރަމުންދާ ކަމަށެވެ.
ރައީސް ވިދާޅުވީ ރާއްޖެ ތަރައްގީ ކުރުމަށް ސަރުކާރާއި މަޖިލިސް އޮތީ އެކުއެކީގައި ކަމަށެވެ. ރައްޔިތުންގެ މަޖިލިސް ހިނގާގޮތް ވަރަށް ސާފުކޮށް އެނގިވަޑައިގަންނަވާ ކަމަށާއި 25 އަހަރު އެތަނުގައި ހޭދަކުރެއްވި ކަމަށެވެ. އަދި ޕާލިއަމަންޓް ގްރޫޕްގެ ލީޑަރެއްގެ ގޮތުގައި 10 އަހަރު ހޭދަ ކުރެއްވި ކަމަށެވެ.
ރައްޔިތުންގެ މަޖިލީހެއް ހިނގާނެ ގޮތް ވަރަށް ސާފުކޮށް އެނގިވަޑައިގެން ހުންނެވި ކަމަށް ރައީސް ވިދާޅުވިއެވެ.
"ހަމައެގޮތަށް މިއަދު އެމްޑީޕީ ޕީޖީ ގްރޫޕްގެ ލީޑަރެއްގެ ގޮތުގައި އެހުންނެވީ ސަރުކާރެއް ވަރަށް ރަނގަޅަށް ހިނގާނޭ ގޮތް ދަންނަ ބޭފުޅެއް، އެއީ ކުރީގެ ރައީސް، މިހާރު ކަންވެފައި މިއޮތީ ކުރީގެ ޕީޖީ ލީޑަރު ރާއްޖޭގެ ރައީސަކަށްވެފަ، ރާއްޖޭގެ ކުރީގެ ރައީސް ޕީޖީ ގްރޫޕްގެ ލީޑަރަކަށްވެފަ،" ރައީސް ވިދާޅުވިއެވެ.
ރައީސް ވިދާޅުވީ ކުރީގެ ޕީޖީ ލީޑަރު ރާއްޖޭގެ ރައީސަކަށްވެފަ، ރާއްޖޭގެ ކުރީގެ ރައީސް ޕީޖީ ގްރޫޕްގެ ލީޑަރަކަށްވުމުން ރާއްޖޭގެ ވެރިކަން އެންމެ ރަނގަޅަށް ކުރެވޭނެ މަގު ފަހިވެފައިވާ ކަމަށެވެ.
