އުމުރުން އެންމެ 7 އަހަރުގެ މިކޭއިލް އަކާރަކީ ކުރެހުމުގެ ދުނިޔެއަށް މިއަދު އާ ނަމެއް ނޫނެވެ. ދުނިޔޭގެ އެކި ހިސާބުތަކުގައި މިއަދު އަކާރުގެ ކުރެހުންތައް އެތައް ޑޮލަރަކަށް ވިކެމުންދާއިރު، ފޭނުންގެ މެދުގައި އެއީ "ޕްރީސްކޫލް ޕިކާސޯ"އެވެ.
ޖަރުމަނުވިލާތަށް އުފަން އަކާރަށް ލިބިފައިވާ، ކުރެހުމުގެ އާދަޔާ ހިލާފު ދެނެގަނެވުނީ އޮޅުމެއްގެ ތެރެއިން، މީގެ 3 އަހަރެއްހާ ދުވަސް ކުރިންނެވެ. އަކާރުގެ މައިންބަފައިން އޭނާއަށް ކެންވަސްއެއް ގަނެދިނެވެ. އަދި ފަސޭހައިން ކުލަޖައްސާލެވޭ ކަހަލަ ކުލަފުޅިތަކެއްވެސް ހޯދާދިނެވެ. އެ ސަމާނު ގަނެދިނީ ހަމައެކަނި ކުޅޭ ސާމާނު ގަނެދިނުމުގެ ބަދަލުގައި ތަފާތު ކަމެއް ތަޖުރިބާކޮށްދިނުމުގެ ގޮތުންނެވެ. ފަހަރެއްގައިވެސް އަގުބޮޑު ކުރެހުމެއް ކުރަހަފާނެ ކަމަކަށް ނޫނެވެ. ނަމަވެސް ކަންވީ އެހެނެއް ނޫނެވެ. އަކާރުގެ ފުރަތަމަ މަސައްކަތް ފެނި، އޭނާގެ ބައްޕައަށްވެސް ފުރަތަމަ ހީވީ އެ ކުރެހުމަކީ އަކާރުގެ މަންމަ ހަދައިގެން ކުރެހުމެއް ކަމަށެވެ.
ފުރަތަމަ ކުރެހުން އެހާ ފުރިހަމަވީ ނޭނގުމެއްގެ ތެރެއިން ކަމަށް ހީކުރެވުނުކަމަށާ، ނަމަވެސް އަކާރުގެ އާދަޔާ ހިލާފު ފާހަގަވާންފެށީ ދެތިން ކުރެހުމެއް ފުރިހަމަކުރި ހިސާބުން ކަމަށް އޭނާގެ އާއިލާއިން ބުނެއެވެ.
ރަސްމީ ސްކޫލް ދައުރަށް ފެށުމަށް ތައްޔާރުވަމުންދާ އަކާރު މިހާރު ވަނީ ކުރެހުމުގެ މައިދާނުގައި ފައިތިލަ ސާބިތުކޮށްފައެވެ. އެބްސްޓްރެކްޓް އާޓަށް ޝައުގުވެރިކަން ހުންނަ އަކާރަށް ހާއްސަ ސްޓައިލެއްވެސް އޮވެއެވެ. އަކާރުގެ ކުރެހުންތަކަކީ އޭނާގެ ބައްޕަ ބޮކްސިންގް ތަޅަން ގެންގުޅޭ އަންގިލައްވައިގެން ކެންވަސްގައި އެކި ގޮތްގޮތަށް ތަޅައިގެން ކުރަހާ ކުރެހުންތަކެކެވެ.
ތަޖުރިބާކާރުން ބުނާ ގޮތުގައި އަކާރަށް މާ ބޮޑު ފިއްތުންތަކެއް ނުވަތަ ޕްރެޝަރެއް ކުރިމަތިނުކޮށް، އެގޮތުގައި ކުރިއަރާ ދާންވެއްޖެނަމަ އޭނާއަށް އުޖާލާ މުސްތަގުބަލެއް ފެނުމުގެ ފުރުސަތު އެބައޮތެވެ. ނަމަވެސް އަކާރުގެ ފިކުރު ތަފާތެވެ. އޭނާ ފައިވިއްދާފައި ހުރީ ފުޓުބޯޅަ ކުޅުންތެރިއަކަށްވުމަށެވެ.
ތަޖުރިބާކާރުންގެ ބަސް ގަބޫލުކޮށްގެން އަކާރުގެ މައިންބަފައިންވެސް އޭނާއަށް ޕްރެޝަރެއް ނުކުރެއެވެ. އެހެންކަމުން ބައެއް ފަހަރު އަކާރުގެ ފަރާތުން ކުރެހުމެއް ލިބޭވަރު ވަނީ ހަފުތާއަކު އެއްފަހަރު ނުވަތަ މަހަކު އެއްފަހަރުއެވެ. ކޮންމެ ގޮތަކަށް ކަން އޮތް ނަމަވެސް އަކާރުގެ ބައްޕަ މިހާރު މަސައްކަތް ކުރަނީ އަކާރުގެ މެނޭޖަރެއްގެ ގޮތުގައި، އަކާރުގެ ބްރޭންޑް ކުރިއެރުވުމަށެވެ.
ކުރެހުމުގެ ރޮނގުން އެންމެ ފަހުން އަކާރު މަސައްކަތެއް ކޮށްފައިވަނީ ބަޔާން މިއުނިކްގެ ގޯލް ކީޕަރު މެނުއެލް ނޮޔާއާ އެކުގައެވެ. މި ކުރެހުން، 12،000 ޑޮލަރަށް ވިއްކާލާފައިވާއިރު، މި ފައިސާ ހަދިޔާކޮށްފައިވަނީ ކުޑަކުދިންނަށް ހާއްސަކޮށްގެން ނޮޔާ ހިންގާ ހިލޭއެހީދޭ ފައުންޑޭޝަނަކަށެވެ.
