މިދިޔަ ސެޕްޓެމްބަރު މަހުން ފެށިގެން އޮސްޓްރޭލިއާގެ އެކި ހިސާބުތަކުގައި ރޯވެ، ގަދައަށް ފެތުރެމުންދިޔަ އަލިފާންގަނޑުތައް ހިސާބަކަށް މަޑުޖެހިފައި އޮތުމަށްފަހު އަނެއްކާވެސް އެސަރަހައްދުގައި ގަދައަށް ރޯވެދާނެ ކަމުގެ އިންޒާރު، އޮސްޓްރޭލިއާގެ ކަމާބެހޭ ފަރާތްތަކުން ދިނުމަށްފަހު، އެސަރަހައްދުގައި ދިރިއުޅޭ މީހުން އެހެން ހިސާބުތަކަށް ބަދަލު ވުމަށް ގޮވާލައިފިއެވެ.
ހުސްވި ހަފުތާގައި އަލިފާންގަނޑުގެ ސަބަބުން އެންމެ ބޮޑު ނުރައްކަލެއް ކުރިމަތިވި ވިކްޓޯރިއާ ސްޓޭޓްގައި ކާރިސާގެ ހާލަތު އިއުލާންކޮށްފައި އޮތް އޮތުން، ކުރިއަށް އޮތް 48 ގަޑިއިރަށް ވަނީ އިތުރުކޮށްފައެވެ. އަދި ފުރާނައަށް ނުރައްކަލެއް ނެތި، އެހެން ހިސާބުތަކަށް ބަދަލުވެވެން ތިބި މީހުން އެކަން އެގޮތަށް ކުރުމަށްވެސް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.
އިންތިހާ ހަނަފަސްކަން ކުރިމަތިވެ، ވާރޭވެހުން މަދުވެ، ގަދައަށް ހޫނުވައިޖެހުމުގެ ސަބަބުން އޮސްޓްރޭލިއާގެ އެކި ހިސާބުތަކަށް އަލިފާންގަނޑުތައް ފެތުރެމުންދިއުމާއެކު، އެގައުމުގައި ދިރިއުޅޭ މުސްލިމުން ވަނީ އިސްތިސްޤާ ނަމާދެއްވެސް ކޮށްފައެވެ. ފާއިތުވީ ދެތިން ދުވަހުން އޮސްޓްރޭލިއާގެ އެކި ހިސާބުތަކުގެ މޫސުން ފިނިވެ، ވާރޭގެ އަސަރުކޮށްފައިވާއިރު، އަލިފާން ކޮންޓްރޯލް ކުރުމަށް އަޅަންޖެހޭ ފިޔަވަޅުތައް އެޅުމަށް ފަޔާމަނުންނަށް ފުރުސަތު ލިބުނު ކަން ފާހަގަކުރަންޖެހެއެވެ.
