މަޝްހޫރު ސުޕަމާޓް ޗެއިންއެއް ކަމަށްވާ ވޯލްމާޓްއިން، އާންމުންގެ ތެރެއަށް ގަސްތުގައި ތަންމަކުނު ދޫކުރަމުންދާ މައްސަލައެއްގެ ތަހުގީގު، އެމެރިކާ ފުލުހުން ފަށައިފިއެވެ.
މިމައްސަލަ ބަލަން ފަށާފައިވަނީ، ވޯލްމާޓްއިން އެމެރިކާގައި އޮޕަރޭޓްކުރާ އައުޓްލެޓެއްގެ ތެރޭގައި ހުރި ތަންމަކުނު ކޮންޓޭނަރުތަކެއް އެތަނުގައި މަސައްކަތް ކުރާ މުވައްޒަފަކަށް ފެނުނު ހިސާބުން، ކަމާބެހޭ ފަރާތްތަކަށް އެ މައްސަލަ ހުށަހެޅުމުންނެވެ.
މިއިން އެއް ކޮންޓޭނަރު ފެނިފައިވަނީ ވޯލްމާޓް އައުޓްލެޓަކުން ވިއްކަން ތައްޔާރުކޮށްފައި ހުރި ކުޑަކުދިންގެ ކޯޓެއްގެތެރޭގައި އޮއްވައެވެ. މިއާއެކު މުވައްޒަފު ވަނީ ކަމާބެހޭ ފަރާތްތަކުގެ ސަމާލުކަމަށް އެކަން ގެނެސް، އައުޓްލެޓްގެ ދިރާސާއެއްކޮށްފައެވެ. ދިރޭ ސޫފާސޫތްޕާ ބެހޭ ތަޖުރިބާކާރުންގެ އެހީގައި ކުރިއަށް ގެންދިޔަ ދިރާސާ ތަހުގީގުގައި އައުޓްލެޓް ތެރޭގައި ފިރިހެނުންނަށް ހާއްސަކޮށްފައިވާ ފިޓިންގް ރޫމް ސަރަހައްދުން ތަންމަކުނު ފެނިފައިވާކަމަށް ޚަބަރު ލިބެއެވެ. ނަމަވެސް ވޯލްމާޓްއިންވަނީ އެތަނުގައި ތަންމަކުނު ނޫޅޭނެ ކަމަށް ބުނެފައެވެ.
ތަހުގީގު ކުރާ ފަރާތްތަކުން ބުރަވާ ގޮތުގައި، އިންސާނުންގެ ގައިން ލޭ ބޯ، ނުރައްކާތެރި ތަންމަކުނު، އާންމުންގެ ތެރެއަށް ދޫކުރަމުންދަނީ ގަސްތުގައެވެ.
ކަންމިހެން އޮތްއިރު، މިކަން ކުރަނީ އެކުންފުނީގެ ކާކުކަމެއްވެސް އަދި ހޯދިފައެއް ނުވެއެވެ. އަދި އެމީހަކު އެކަން ކުރަނީ ކީއްވެކަމެއްވެސް ދެނެގަނެވިފައެއް ނުވެއެވެ.
100 އަށްވުރެ ގިނަ ބާވަތުގެ ތަންމަކުނު އުޅޭއިރު އިންސާނުންގެ ގައިން ލޭ ބޮނީ މީގެ ތެރެއިން 2 ބާވަތެއްގެ މަކުނެވެ. މީގެ ތެރެއިން ބައެއް ތަންމަކުނަކީ ލޭ ނުބޮއި އަހަރެއްހާ ދުވަހުވެސް ހިފަހައްޓާލާ ސޫފިތަކަކަށް ވާއިރު، އެމެރިކާގައި މިހާރު އުޅޭ ބައެއް ތަންމަކުނަކީ ސޫފާސޫފި ނައްތާލަން ބޭނުންކުރާ އިންސެކްޓިސައިޑަށްވެސް ނުގުޑާ ސޫފާސޫފިތަކެއް ކަމަށްވެސް ހޯދުންތަކުން ވަނީ ދައްކާފައެވެ.
