އިއްޔެ ފަރަށް އެރި ދޯނީގެ ކައްޕި ގެއްލިގެން މިކހާރު އެމްއެންޑީޢެފްގެ ޑައިވަރުން ހަރަކާތްތެރިވަމުންދާ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ، ފަރަށް އެރި ދޯނިން ގެއްލުނު މީހާ ހޯދުމުގައި ކޯސްޓް ގާޑް ޑައިވަރުން ދަނީ އެ ސަރަހައްދުގައި ޑައިވް ކުރަމުން ކަމަށެވެ. މިހާތަނަށް ކުރި ޑައިވްއިން އެ ސަރަހައްދުގެ އަޑިން މާސްކަކާއި ބޮކްސާ ވައްތަރުގެ ސޯޓެއް ފެނިފައިވާ ކަމަށް އެމްއެންޑީއެފުން މައުލޫމާތު ދެއެވެ.
ފަރަށް އަރާފައިވާ ދޯންޏަކީ މުދާ އުފުލާ "ޓީޓީއެސް ފާން" ނަމަކަށް ކިޔާ ދޯންޏެކެވެ. އެ ދޯނި ފަރަށް އަރާފައި ވަނީ ކ. ކަގި ކައިރިންނެވެ. މިނ ހާދިސާ ހިނގި އިރު އެ ދޯނީގައި ތިބީ ޖުމްލަ ތިން މީހުންނެވެ. އެއީ 2 ބިދޭސީން ނާއި ދިވެއްސެކެވެ.
ދޯނި ދުއްވަން ހުރި ކައްޕިއަކީ 37 އަހަރުގެ ދިވެހި ފިރިހެނެކެވެ. އޭނާ ގެއްލިފައި ވާކަމަށް އެމްއެންޑީއެފަށް ރިޕޯޓުކޮށްފައި ވަނީ މިއަދުއެވެ. ނަމަވެސް އެ ދޯނި ފަރަށް އަރާފައިވަނީ އިއްޔެގެ ވަގުތެއްގައެވެ. ގެއްލުނު މީހާގެ ފޯނާއި ދަބަސްވެސް ދޯނީގައި އޮތް ކަމަށް އެމްއެންޑީއެފް އިން ބުނެއެވެ.
ފަރަށް އަރައިގެން އުޅޭ ދޯނީގެ ކައްޕި ގެއްލިފައިވާއިރު ދާދި ފަހުން ލޯންޗަކާއި ޑިންގީއެއް އެކްސިޑެންޓްވީ ހާދިސާގައި ބ. އޭދަފުށީ ނަސްރުﷲ އަބްދުﷲ ވަނީ ގެއްލިފައެވެ. އެނާ ހޯދުމުގެ މަސައްކަތް އަދިވެސް އެމްއެންޑީއެފުން ދަނީ ކުރަމުންނެވެ.
