މިދިޔަ އަހަރުގެ ސެޕްޓެމްބަރު މަހުން ފެށިގެން އޮސްޓްރޭލިއާގެ އެކި ހިސާބުތަކުގައި ރޯވެ ގަދައަށް އަނދަމުންދިޔަ އަލިފާންގަނޑުތައް ހިސާބަކަށް މަޑުޖެހިފައިވާކަމަށާ، މިހާރު ކޮންމެވެސް ވަރަކަށް، ތުނިކޮށް ވާރޭވެހެމުންދާ ކަމަށް ޚަބަރު ލިބިއްޖެއެވެ.
ރޯވަމުންދިޔަ ގަދަ އަލިފާންގަނޑުތައް މަޑުޖެހެން ފެށުމާއެކު، އޮސްޓްރޭލިއާގެ ކަމާބެހޭ ފަރާތްތަކުން ވަނީ ބެދިފައި އޮތް މަގުތައް ކޮންމެވެސް ވަރަކަށް ހުޅުވާ، އަލިފާންގަނޑުގެ ސަބަބުން އެކި ހިސާބުތަކުގައި ތާށިވެފައި ތިބި މީހުން ރައްކާތެރި ހިސާބުތަކަށް ބަދަލު ކުރަން ފަށާފައެވެ.
އާދަޔާ ހިލާފަށް ހޫނުގަދަވެ، ވައި ގަދަވުމުގެ ސަބަބުން މިދިޔަ ހަފުތާ ބަންދުން ފެށިގެން އިންތިހާ ނުރައްކާ ހާލުގައި އޮތް ސަރަހައްދަށްވެސް މިހާރު ފިނިވައި ޖެހެމުންދާކަމަށް މައުލޫމާތު ލިބެއެވެ. ނަމަވެސް މޫސުން ތެތްކޮށް އުތުމުގެ ސަބަބުން، ކޮންޓްރޯލް ކޮށްގެން ހުޅުޖެހުމަށް ހުރަސްތަކެއް ކުރިމަތިވެފައިވާކަމަށް ޚަބަރު ލިބެއެވެ. ކޮންޓްރޯލްކޮށްގެން ތަންތަން ރޯކުރަނީ، އާދަޔާ ހިލާފަށް ހޫނުގަދަވެގެންދާ ވަގުތު އަލިފާންގަނޑު ފެތުރިދާނެ ސަރަހައްދުތައް ކުޑަކުރުމަށެވެ.
އޮސްޓްރޭލިއާގައި ރޯވަމުންދާ ގަދަ އަލިފާންގަނޑުތަކާ ގުޅިގެން ހިނގި އެކި ހާދިސާތަކުގައި މަރުވި މީހުންގެ އަދަދު 24 އަށް އަރާފައިވާކަމަށް ބައެއް މީޑިއާ ރިޕޯޓްތައް ބުނެއެވެ.
އާދަޔާ ހިލާފަށް ހޫނުގަދަވެ، ހޫނުކަން ގަދަ ވައި ޖެހެމުންދިއުމުގެ ސަބަބުން އަލިފާންގަނޑުތައް ކޮންޓްރޯލް ކުރަން ދަތިތަކެއް ކުރިމަތިވިއިރު، ހަނަފަސްކަން ކުރިމަތިވެފައިވާ އޮސްޓްރޭލިއާގެ މުސްލިމުން ވަނީ އިސްތިސްޤާ ނަމާދުކޮށްފައެވެ.
