އޮސްޓްރޭލިއާގެ އެކި ހިސާބުތަކުގައި ގަދައަށް ރޯވެ އަނދަމުންދާ އަލިފާންގަނޑުތައް ނިއްވާލުމުގެ މަސައްކަތަށް ނިކުމެ އުޅުމުގެ ތެރޭގައި ފުރާނަ ގެއްލުނު ވޮލަންޓިއަރުގެ ހިދުމަތުގެ އަގު ވަޒަން ކުރުމުގެ ގޮތުން އޮސްޓްރޭލިއާއިން ދޭ މެޑަލް އޮފް ބްރޭވަރީ، އޭނާގެ 19 މަހުގެ ފިރިހެން ދަރިފުޅަށް ދީފިއެވެ.
އަލިފާން ނިއްވުމުގެ މަސައްކަތުގައި ހިލޭސާބަހަށް މަސައްކަތްކުރަމުންދިޔަ ވޮލަންޓިއާ ފަޔާމަން، ޖޮފްރީ ކީޓަން، 32ގެ ޖަނާޒާގައި 'މެޑަލް އޮފް ބްރޭވަރީ'އާއި ހަވާލުވި ދަރިފުޅު، ހާވީ ކީޓަން ހުރީވެސް އޭނާގެ ބައްޕަ ލީ ފަދަ ޔުނީފޯމެއް ލައިގެންނެވެ.
ފަޔާމަން ކީޓަންއާއި ފަޔާމަން އެންޑްރޫ އޯޑްވައިޔާ މަރުވީ، ރޯވެފައިވާ އަލިފާންގަނޑަކާ ދިމާލަށް ދަތުކުރަމުންދަނިކޮށް، އެމީހުންގެ ތިބި ލޮރީގެ މައްޗަށް ބޮޑު ގަހެއް ވެއްޓިގެން ހިނގި ހާދިސާގައެވެ.
ކީޓަންގެ ޖަނާޒާ މިއަދު ބާއްވާފައިވާއިރު، އޯޑްވައިޔާގެ ޖަނާޒާ އޮންނާނީ އަންނަ ހަފުތާގެ ތެރޭގައެވެ. އޭނާއަކީވެސް ކުޑަ ކުއްޖެއްގެ ބައްޕައެކެވެ.
އޮސްޓްރޭލިއާގެ ބޮޑުވަޒީރު ސްކޮޓް މޮރިސަންވެސް ބައިވެރިވެވަޑައިގެންނެވި ޖަނާޒާގައި ހާވީ ކީޓަންއަށް 'މެޑަލް އޮފް ބްރޭވަރީ'ގެ ސިއްކަ ހަވާލުކުރީ ނިއު ސައުތް ވޭލްސްގެ ފަޔާ ކޮމިޝަނާ ޝޭން ފިޓްޒްސިމޯންސްއެވެ.
