މިފަހަކަށް އައިސް ގިނަ ބައެއްގެ މެދުގައި މަގުބޫލުވެފައިވާ އީ-ސިނގިރޭޓް ބޭނުންކޮށްގެން ވޭޕްކުރުމަށް ބޭނުންކުރާ ބައެއް މާއްދާޔައް އެގައުމުގެ ހުރިހާ ހިސާބެއްގައި ބޭނުން ކުރުން، އެމެރިކާއިން މަނާކޮށްފިއެވެ.
އީ-ސިނގިރޭޓްއާއިއެކު ބޭނުންކުރާ ބައެއް ފްލޭވާތައް ބޭނުންކުރުން އެމެރިކާއިން ގައުމީ ފެންވަރެއްގައި މަނާކޮށްފައި މިވަނީ، ވޭޕް ކުރުމުގެ ސަބަބުން ފުރާވަރު އުމުރުގެ ކުދިންނާ ޒުވާނުންތަކެއްގެ ފުއްޕާމެއަށް ނުރައްކާތެރި ބައްޔެއް ޖެހި، އެ ބަލީގައި ގިނަ ބަޔަކު މި ދުނިޔެ ދޫކުރަމުންދާ ދަނޑިވަޅެއްގައެވެ.
އެމެރިކާގައި މަނާކޮށްފައިވަނީ ކާޓްރިޖް އީ-ސިނގިރޭޓްއާއިއެކު ވިއްކާ މިންޓް (އާވި) އަދި ފްރުޓް (މޭވާ)ގެ ޖޫލް ޕޮޑް ފްލޭވާތަކެވެ. ކަންމިހެން އޮތް ނަމަވެސް މެންތޯލްއާއި ދުންފަތުގެ މާއްދާ އެކުލެވޭ އީ-ސިނގިރޭޓް ފްލޭވާތައް އެމެރިކާއިން އަދި މަނާކޮށްފައެއް ނުވެއެވެ.
ވޭޕްކުރުމުގެ ނުރައްކާ އިންތިހާއަށް ބޮޑުވެފައިވާއިރު ދެކުނު ކޮރެޔާ، އިންޑިއާ އަދި ބްރެޒީލް ފަދަ ބައެއް ގައުމުތަކުން މިހާރުވެސް ވަނީ ވޭޕްކުރުމަކީ އެ ގައުމުތަކުގައި މަނާ ކަމެއްކަމުގައި ކަނޑައަޅާފައެވެ. އަދި ޗައިނާއާއި އެނޫންވެސް ބައެއް ގައުމުތަކުންވަނީ ވޭޕްކުރުމަށް ހުއްދަ ދެވޭނެ ވަކި އިންތަކެއް ކަނޑައަޅާފައެވެ. ދިވެހި ރާއްޖެއިންވެސް ވަނީ ވޭޕްކުރުން ކޮންޓްރޯލް ކުރުމަށް މަސައްކަތްތަކެއް ކުރަމަށް ވިސްނަމުންދާކަން މީގެ ދުވަސްތަކެއް ކުރިން ހާމަކޮށްފައެވެ.
