އޮސްޓްރޭލިއާގެ އެކި ހިސާބުތަކުގައި ފެތުރެމުންދާ ވަރުގަދަ އަލިފާންގަނޑުތަކުގެ ތެރެއިން ނިއު ސައުތް ވޭލްސް ސަރަހައްދުގައި ރޯވެފައިވާ އަލިފާންގަނޑުތަކުގެ ސަބަބުން، މިދިޔަ ހޯމަ ދުވަހުން ފެށިގެން މިހާތަނަށް 7 މީހެއްގެ ފުރާނަ ގެއްލިފައިވާކަމަށް އެގައުމުގެ ފުލުހުން ބުނެފިއެވެ.
އޮސްޓްރޭލިއާގެ އައްސޭރި ފަށުގައި އޮންނަ ވިކްޓޯރިއާއަށްވެސް ގަދަ އަލިފާންގަނޑު ފެތުރިފައިވާއިރު، މި ހާދިސާގައި އެ ސަރަހައްދުން 200 އެއްހާ ގެ އަނދާއަޅިއަށް ވެފައިވާކަމަށް ޚަބަރު ލިބެއެވެ.
މަސްރަހު ކޮންމެވެސް ވަރަކަށް ހަމައަކަށް އެޅުމުން، ވިކްޓޯރިއާ އިން ނުކުމެވެން އޮންނަ މައި މަގު 2 ގަޑިއިރެއްހާއިރަށް ހުޅުވި ކަމަށާ، އެކަމުގެ ސަބަބުން އެހެން ހިސާބުތަކަށް ބަދަލުވުމަށް ބައެއް މީހުންނަށް ފުރުސަތު ލިބިފައިވާކަމަށް މައުލޫމާތު ލިބެއެވެ. އޭގެ ކުރިން، އެތައް ހާސް ބަޔަކު ހިމާޔަތް ހޯދަމުންދިޔައީ މޫދުގައި ތިބެގެންނެވެ.
ކަންމިހެން އޮތް ނަމަވެސް އަދިވެސް ގިނަ އަދަދެއްގެ ބަޔަކު ވިކްޓޯރިއާ ސަރަހައްދުގައި ތިބިއިރު، އޮސްޓްރޭލިއާގެ ފުލުހުން ވަނީ ކަނޑުމަގުން 1.6 ޓަނުގެ ބޯފެން އެ ސަރަހައްދަށް ފޯރުކޮށްދީފައެވެ.
މިދިޔަ އަހަރުގެ ފަހުކޮޅުން ފެށިގެން އޮސްޓްރޭލިއާގެ އެކި ހިސާބުތަކުގައި ރޯވަމުންދާ ގަދަ އަލިފާންގަނޑުތަކުގެ ސަބަބުން މަރުވި މީހުންގެ ޖުމުލަ އަދަދު މިހާރު ވަނީ 18 އަށް އަރާފައެވެ.
