ދުނިޔޭގައި މިވަގުތު ތިބި އެންމެ މުއްސަނދި މީހުންގެ މިލްކިއްޔާތަށް އާމްދަނީގެ ގޮތުގައި މިއަހަރު ތެރޭގައި އެކަނިވެސް 1.2 ޓްރިލިއަން ޑޮލަރު ވަދެފައިވާކަމަށް ބްލޫމްބާގް ބިލިއަނާޒް އިންޑެކްސްއިން ދައްކައިފިއެވެ.
ދުނިޔޭގައި މިވަގުތު ތިބި އެންމެ މުއްސަނދި 500 ބިލިއަނަރުންގެ ނަން ހިމަނައިގެން ބްލޫމްބާގްއިން އެކުލަވާލި ބްލޫމްބާގް ބިލިއަނާޒް އިންޑެކްސް ދައްކާ ގޮތުން، މި އެންމެނަށް މިއަހަރު ލިބުނު އާމްދަނީ ވަނީ 25 ޕަސެންޓް އިތުރުވެފައެވެ.
ވަކިވަކި މީހުންނަށް ބަލާއިރު، ބްލޫމްބާގް ބިލިއަނާޒް އިންޑެކްސް 2019ގެ އެންމެ ކުރިން ޖާގަ ހޯދާފައިވާ މަހުޖަނަކީ އެމެޒޯން ކުންފުނީގެ ސީއީއޯ ޖެފް ބޭޒޯސްއެވެ. އޭނާގެ މިލްކިއްޔާތުގެ އަގު މިހާރު ވަނީ 116 ބިލިއަން ޑޮލަރަށް އަރާފައެވެ. ބޭޒޯސްގެ ފަހަތުން 2 ވަނާގައި އޮތީ މައިކްރޮސޮފްޓްގެ ބާނީ ބިލް ގޭޓްސްއެވެ. އޭގެ ފަހަތުން ބާނާޑް އާނޯލްޓްއާއި، ވޮރަން ބުފޭ އަދި މާކް ޒަކަބާގްއެވެ.
59.5 ބިލިއަން ޑޮލަރުގެ މިލްކިއްޔާތަކާއެކު، އިންޑިއާގެ ރިލާޔަންސް އިންޑަސްޓްރީޒްގެ މުކޭޝް އަމްބާނީ އޮތީ ބްލޫމްބާގް ބިލިއަނާޒް އިންޑެކްސްގެ 12 ވަނަ މަގާމުގައެވެ.
