ހެކްޓާ ފެނާންޑޭޒްއާއި އޭނާގެ އާއިލާ ދިރިއުޅެމުންދާ ގޭގެ ފްރިޖުގައި ހުންނަނީ ބޮޑު ތަޅެއް އަޅުވާ، ތަޅުލާފައެވެ. ބަދިގެ ދޮރަކީވެސް ވަކިން ހަރުކޮށް، ތަޅުލެވޭ ގޮތަށް ފަރުމާކޮށްފައިވާ ދޮރެކެވެ. ކަބަޑުތަކުން ފެށިގެން ގޮސް ކާލެވޭ ކޮންމެ އެއްޗެއް ހުންނަ ހުރިހާ ތަނެއް ހުންނަނީ ހެކްޓާގެ އަތުގައި އޮންނަ ހާއްސަ ތަޅުދަނޑިއަކުން ނޫނީ ނުހުޅުވޭ ގޮތް ހަދާފައެވެ.
ހެކްޓާ މިކަން ކުރަނީ ފަހަރެއްގައިވެސް ކާބޯތަކެތިން ވައްކާކުރާތީ އެކަމުގެ އުނދަގޫ ބޮޑުވެ، އެކަމަށް ބިރަކުން ނޫނެވެ. ނަމަވެސް ޕްރޭޑާ-ވިލީ ސިންޑްރޯމްގެ ތަކުލީފުތައް އުފުލަމުންދާ އޭނާގެ ދަރިފުޅުގެ ފުރާނަ ސަލާމަތް ކުރުމުގެ ނިޔަތުގައެވެ.
މީލާދީން 1956 ވަނަ އަހަރު ދެނެގަނެވުނު ޕްރޭޑާ-ވިލީ ސިންޑްރޯމްގެ ޝިކާރައަކަށްވާ މީހުންނަކީ އާދަޔާ ހިލާފު ގިނައިން ކާން ބޭނުންވާ ބައެކެވެ. އެމީހުންނަކީ ދުވަހަކުވެސް ހައިކަން ނުފިލާ ބަނޑުހައިހޫނުކަމެއް އިހުސާސްކުރަމުންދާ ބައެކެވެ. އެއީ ޖެނެޓިކްސްގެ ސަބަބުން މެދުވެރިވާ ހާލަތެއް ކަމަށް ބުނެވެއެވެ.
ހައިކަން ނުފިލާ ބަނޑުހައިހޫނުކަން
ހެކްޓާ ކިޔައިދިން ގޮތުގައި އޭނާގެ 18 އަހަރުގެ ފިރިހެން ދަރިފުޅު، 'ކްރިސް' އަކީ އަބަދާ އަބަދު ނުބަލަހައްޓައިފިނަމަ މަރުވަންދެކަށް އަމިއްލަ މީހާވެސް ކާލާހާ ބަނޑުހައިވާ ކުއްޖެކެވެ. ދަރިފުޅުގެ ހާލަތު ކިޔައިދެމުން ހެކްޓާ ބުނީ، ބަނޑުހައިވެގެން ގޮސް، ކުއްތާ ކާން ހުންނަ އެއްޗިހި ކެއުމާ، ކުނިވަށިގަނޑު ހާވަގައިގެން ކެއުމާ، ދަތް އުނގުޅާ ބޭސްފުޅި އެކީ އެކައްޗަކަށް އަނގައަށް ފިތާލައިގެން ކާލުން ފަދަ ކަންކަންވެސް އޭނާގެ ދަރިފުޅުކުރާ ކަމަށެވެ.
ހެކްޓާ ބުނާ ގޮތުގައި ކޮންމެ އެއްޗަކީވެސް އޭނާގެ ދަރިފުޅަށް ކާއެއްޗެކެވެ. ނަމަވެސް ހެކްޓާ، އޭނާގެ ދަރިފުޅަށް މިހާރު ކާންދެމުންދަނީ އޭނާގެ ސިއްހަތަށް ބަލައިގެން، އެ ދުވަހަކަށް ހަށިގަނޑަށް ބޭނުންވާ މިންވަރު ބަލައިގެންނެވެ. އެގޮތުން ބައެއް ފަހަރު، އަލަނާސި ފޮއްޗަކުންވެސް ފުއްދާލަންޖެހެއެވެ.
ޕްރޭޑާ-ވިލީ ސިންޑްރޯމް
މި ހާލަތު ކުރިމަތިވަނީ ކްރޮމޮޒޯމް 15 ތަކުރާރުވެ ނުވަތަ އުނިވުމުގެ ސަބަބުންނެވެ.
އާދަޔާ ހިލާފަށް ފަލަވުމާ ހަކުރު ބަލި ޖެހި އުމުރު ކުރުވުމުގެ އިތުރުން، މިފަދަ ކުދިންނަކީ ނަފްސާނީ ހެދިބޮޑުވުމުގައި މައްސަލަތަކެއް ހުންނަ ކުދިންނެވެ. އަދި އުޅޭ އުޅުމުގައި ނުވަތަ 'ބިހޭވިއާ'ގައިވެސް މައްސަލަތަކެއް ހުންނަ ކުދިންނެވެ.
މަދުން ނޫނީ ނުފެންނަ ބައްޔެއް
ކްރިސްއަކީ ހުލުގުހެޔޮ ސުލޫކެއްގައި ބޮޑުކުރަމުން އަންނަ ޒުވާނެކެވެ. ނަމަވެސް، ބޭނުންވާ ވަރަށް ކާއެއްޗެއް ނުލިބިއްޖެނަމަ ކަންތައްތައް ވަރަށް ގޯސްވާ ފަހަރުވެސް އާދެއެވެ.
ލޮލިން ކަރުނަ އަޅަމުން އިނދެ ކްރިސްގެ ބައްޕަ ކިޔައިދިން ގޮތުގައި ކްރިސްއަށް ބޭނުންވާ މިންވަރަށް އޭނާއަށް ކާން ނުލިބިއްޖެނަމަ ކެޓަގަރީ 5 ގެ ތޫފާނެއްހާ އޭނާގެ ބާރު ގަދަވެއެވެ. އޭނާ ދާ މަގުގައި ހުންނަ ހުރިހާ އެއްޗެއް ސުންނާފަތިކޮށް ބިމާ ހަމަކޮށްލައެވެ. ކައިރީގައި ތިބޭ މީހުންނަށް ޖިސްމާނީ ގޮތުން ބޮޑެތި އަނިޔާތަކެއް ދެއެވެ. އެހެންކަމުން ބައެއް ފަހަރު އެ ދަރިފުޅު ކޮންޓްރޯލް ކުރުމަށްޓަކައި، ގޮނޑިއެއްގައި އައްސަންޖެހޭ ކަމަށްވެސް ހެކްޓާ ކިޔައިދިނެވެ.
ކްރިސް ފަދަ ޕްރޭޑާ-ވިލީ ސިންޑްރޯމް ހުންނަ ކުދިންނަކީ 24 ގަޑިއިރުގެ އަޅާލުމާ ލޯބި ބޭނުންވާ ފަދައިން، ސިއްހީ ތަޖުރިބާކާރުންގެ އެހީވެސް އިންތިހާއަށް ބޭނުންވާ ކުދިންނެވެ. އެގޮތުން ޑައެޓީޝަނުންނާ ނިއުޓްރިޝަނިސްޓުންގެ އިތުރުން ނަފްސާނީ ބަލިތަކަށް ހާއްސަ ޑޮކްޓަރުންނާ ފިޒިއޯތެރަޕިސްޓުންގެ އެހީތެރިކަންވެސް މިފަދަ ކުދިންނަށް ބޭނުންވެއެވެ.
