އިންޑިއާގެ ވެރިރަށް ނިއު ދިއްލީގެ ކިރާރީ ސަރަހައްދުގައި މިއަދު ހިނގި އަލިފާނުގެ ހާދިސާގައި 9 މީހުން މަރުވެއްޖެއެވެ.
ވިޔަފާރީގެ އިތުރުން އާންމުން ދިރިއުޅުމަށް ބޭނުންކުރި 3 ބުރީގެ އިމާރާތެއްގައި ހިނގި އަލިފާނުގެ ހާދިސާގައި މަރުވި މީހުންގެ ތެރޭގައި 3 ކުޑަކުއްޖަކުވެސް ހިމެނޭ ކަމަށް ދިއްލީ ފަޔާ ސާވިސްއިން މައުލޫމާތު ދެއެވެ. އެއީ އެއްބަނޑު އެއްބަފާ 3 ކުންދިންނެވެ.
އުމުރުން 10 އަހަރާ، 7 އަހަރާ 6 މަހުގެ ތުއްތު ކުއްޖަކު މިހާދިސާގައި މަރުވިއިރު އެކުދިންގެ މަންމައާއި ބައްޕަވެސް ވަނީ މިހާދިސާގައި މަރުވެފައެވެ.
ރޭ ދަންވަރު ރޯވި އަލިފާންގަނޑު މުޅިން ކޮންޓްރޯލް ކުރެވިފައިވަނީ ފަތިސްވާން އުޅެނިކޮށް ކަމަށް ދިއްލީ ފަޔާ ސާވިސްއިން މައުލޫމާތުދެއެވެ. 3 ފަންގިފިލާއަށް ހުންނަ އިމާރާތުގެ ތިރީބުރި ބޭނުން ކުރަނީ ފޭރާމާ އަންނައުނު ރައްކާކުރާ ގުދަނެއްގެ ގޮތުގައެވެ. ދެން ހުރި ފަންގިފިލާތައް ބޭނުން ކުރަނީ އާންމުން ދިރިއުޅުމަށެވެ.
އަލިފާން ރޯވި އިމާރާތަކީ އަލިފާނުގެ ހާދިސާއެއް ހިނގައިފިނަމަ ބޭނުން ކުރާނެ އެއްވެސް އާލާތެއް ހުރި އިމާރާތެއް ނޫންކަމަށް، ކަމާބެހޭ ފަރާތްތަކުން ބުނެއެވެ. އޮފިޝަލަކު ވިދާޅުވީ އިމާރާތުގެ 2 ވަނަ ފަންގިފިލާގައި ހުރި ސިލިންޑަރެއް ގޮވުމުގެ ސަބަބުން އިމާރާތުން ބައެއް ވެއްޓިފައިވާކަމަށާ، އަލިފާނުގެ ހާދިސާ ހިނގަން މެދުވެރިވި ސަބަބު އަދިވެސް ތަހުގީގު ކުރަމުން އަންނަ ކަމަށެވެ.
މީގެ ދުވަސްކޮޅެއް ކުރިންވެސް ދިއްލީގައި މިފަދަ ހާދިސާއެއް ހިނގާ 40 އަށްވުރެ ގިނަ މީހުންގެ ފުރާނަ ވަނީ ގެއްލިފައެވެ.
