ބައިނަލްއަގުވާމީ ފެންވަރުގައި މުވާސަލާތީ ހިދުމަތް ފޯރުކޮށްދޭ އޮރެންޖް އެސް.އޭ ނުވަތަ ކުރީގެ ނަމުންނަމަ ފްރާންސް ޓެލެކޮމް ކުންފުނީގެ މުވައްޒަފުންތަކެއް އަމިއްލައަށް މަރުވި މައްސަލައާ ގުޅިގެން އެކުންފުނީގެ އިސްވެރިންގެ ގޮތުގައި މީގެ ކުރިން މަސައްކަތްކޮށްފައިވާ 3 މީހަކު ޖަލަށް ލައިފިއެވެ.
2000ގެ އަހަރުތަކުގައި ހިނގާދިޔަ މަރުގެ ހާދިސާތައް ގުޅެނީ މުވައްޒަފުންގެ ނަފްސާނީ ދުޅަހެޔޮކަމަށް ފުރައްސަރާ ކުރާ ފަދަ ގޮތަކަށް އެކުންފުނިން ގެންގުޅުނު ސިޔާސަތުތަކެއްގެ ސަބަބުން ކަމަށް ބުނެވެއެވެ.
ކުންފުނީގެ ވެރިންގެ ގޮތުގައި މަސައްކަތް ކުރި ޑިޑިއޭ ލޮމްބާޑް، ލޫއީ-ޕިޣޭ ވެނެސް އަދި އޮލިވިއޭ ބާބެރޯ ޖަލަށް ލުމުގެ އިތުރުން، މިމައްސަލާގައި އޮރެންޖު ކުންފުނި ވަނީ ގާތްގަނޑަކަށް 83000 ޑޮލަރުން ޖޫރިމަނާވެސް ކޮށްފައެވެ.
މައްސަލަ ބެލި ކޯޓުން މި ހުކުމްތައް އިއްވާފައިވަނީ ކުންފުނީގެ މަސައްކަތް ކުރި 39 މީހެއްގެ ކޭސް މުރާޖައާ ކުރުމަށްފަހުގައެވެ. މީގެ ތެރެއިން 19 މީހަކު އަމިއްލައަށް މަރުވެފައިވާއިރު 12 މީހަކު ވަނީ އަމިއްލައަށް މަރުވާން މަސައްކަތްކޮށްފައެވެ.
މިކަންތައް ހިނގާފައިވަނީ ކުންފުންޏަށް ގެނައި ބަދަލާއެކު 22000 މުވައްޒަފުން ވަޒީފާއިން ވަކިކުރުމަށް އެކުންފުނިން މަސައްކަތް ކުރުމުގެ ތެރޭގައެވެ. ބައެއް މުވައްޒަފުން އާއިލާތަކާ އިންތިހާ ދުރަށް މަސައްކަތް ކުރަން ފޮނުވާލިއިރު އަނެއްބައި މުވައްޒަފުން ބާކީކޮށް، ދަށް ފަންތީގެ މަސައްކަތްތައް ހަވާލުކުރިއެވެ. އަދި 'ބޮޑު ދޮރުން ނުދިޔައީވިއްޔާ ކުޑަ ދޮރުން ނަމަވެސް އެމީހުން އޮފީހުން ބޭރުކުރާނެ' ކަމަށް ލޮމްބާޑް، 2007 ވަނަ އަހަރު ބުނިކަމަށްވެއެވެ.
އޮފީސް ރީސްޓްރަކްޗާ ކުރުމުގެ ސަބަބުން މުވައްޒަފުން ހިތްހަމަނުޖެހުނު ކަމަށް އިއުތިރާފުވި ނަމަވެސް، އެއީ އެމީހުން އަމިއްލައަށް މަރުވާންޖެހޭނެ ސަބަބެއް ކަމަށް ގަބޫލުނުކުރާ ކަމަށްވެސް ލޮމްބާޑް ވަނީ ބުނެފައެވެ.
ޖަލު ހުކުމް އިއްވި 3 މީހުންގެ މައްޗަށްވެސް އިއްވާފައިވަނީ 1 އަހަރު ދުވަހުގެ ޖަލު ހުކުމެކެވެ.
