ސިލްސިލާ މުޒާހަރާތަކެއް ކުރަމުންދާ އަވަށްޓެރި އިންޑިއާގެ ބޮޑު ސަރަހައްދެއްގައި މާއްދާ 144 ނުވަތަ ކާފިއުގެ އަމުރު އިއުލާންކޮށް ތަންފީޒު ކުރަން ފަށައިފިއެވެ.
އިންޑިއާގެ ރަށްވެހިކަމަށް އިސްލާހު ގެނައުމުގެ ގާނޫނު (ސީއޭއޭ)އާއި އިންޑިއާގެ ގައުމީ ރަށްވެހިކަމުގެ ދަފުތަރު (އެންސީއާރް)ގެ މައްސަލާގައި އިންޑިއާގައި ކުރިއަށްދާ ސިލްސިލާ މުޒާހަރާތަކުގެ ފޯރި ގަދަވެ، ކުރިމަތިލުންތައް ގިނަވެފައިވާއިރު ކާފިއުގެ އަމުރު ތަންފީޒު ކުރަމުންދާ ސަރަހައްދުތަކުގެ ތެރޭގައި ގިނަ އަދަދަކަށް ދިވެހިންވެސް ދަތުރުކޮށް އުޅޭ ބެންގަލޫރު ފާހަގަކުރެވެއެވެ.
މިއަދު ހެނދުނުން ފެށިގެން ޑިސެމްބަރު މަހުގެ 21 ވަނަ ދުވަހުގެ ނިޔަލަށް ބެންގަލޫރުގައި ވަނީ ކާފިއު އިއުލާންކޮށްފައެވެ. މިކަން މިހެން ކޮށްފައިވަނީ، މިއަދާ މާދަމާވެސް ވަރުގަދަ މުޒާހަރާތަކެއް ބެންގަލޫރުގައި ކުރިއަށް ގެންދިއުމަށް ތާވާލުކޮށްފައި ވަނިކޮށެވެ.
އިންޑިއާގެ ޖިނާއީ އިޖުރާއަތުގެ ގާނޫނުގެ 144 ވަނަ މާއްދާ ބުނާ ގޮތުގައި، އެ އަމުރު ތަންފީޒު ކުރަން ފެށުމާއެކު 5 މީހުންނަށްވުރެ ގިނައިން އެއްތަނެއްގައި އެއްވެ ޖަލީސުންގެ ގޮތުގައި ތިބުމާ، އާންމު އެއްވުންތައް ބޭއްވުމާ، ހަތިޔާރު ހިފާ ގެންގުޅުން އާންމު ރައްޔިތުންނަށް މަނާވެގެންދެއެވެ. 144 އަމުރު ނެރެފައި އޮތް ނަމަވެސް، މަގުތަކުއި ހިނގާބިނގާވެ އުޅުމާ ދަތުރުފަތުރަށް އެއްވެސް ވަރެއްގެ ހުރަހެއް ނުއޮންނާނެ ކަމަށް އިންޑިއާގެ ކަމާބެހޭ ފަރާތްތަކުން ވަނީ ބުނެފައެވެ.
ކަންމިހެން އޮތްއިރު، ސީއޭއޭއާއި ދެކޮޅަށް ޗެންނާއީގައި ކުރިއަށް ގެންދިއުމަށް ތާވަލުކޮށްފައި އޮތް މުޒާހަރާވެސް ކުރިއަށް ނުގެންދެވޭނެ ކަމަށް އިންޑިއާގެ ފުލުހުންވަނީ އިއުލާންކޮށްފައެވެ. އަދި ސީއޭއޭއާއި އެންއާރްސީގެ މައްސަލާގައި މުޒާހަރާއެއް ބޭއްވުމަށް ރާވަމުންދިޔަ ކަމުގެ ކުށުގެ ތުހުމަތުގައި ހައިދަރުއާބާދު ޔުނިވާސިޓީގެ ދަރިވަރުންތަކެއްވެސް އިންޑިއާ ފުލުހުންގެ ބެލުމުގެ ދަށަށް މިހާރު ގެންގޮސްފައިވާކަމަށް ޚަބަރު ލިބެއެވެ.
