އިންޑިއާގެ އާބާދީގެ ނިސްބަތުން ބައިމަދު ދީންތަކުގެ މީހުންގެ ހައްގުތައް ހިމާޔަތް ކުރުމަށް އެމެރިކާއިން އިންޑިއާއަށް ގޮވާލައިފިއެވެ.
ޣައިރު މުސްލިމުންނަށް އާދަޔާ ހިލާފު ބާރުތަކަކާ ހައްގުތަކެއް ކަށަވަރުކޮށްދޭ ގޮތަށް އިންޑިއާގެ ރަށްވެހިކަމުގެ ގާނޫނަށް ގެނައި އިސްލާހު (ސީއޭއޭ)އާއި ގުޅިގެން އެގައުމުގައި ވަރުގަދަ މުޒަހަރާތަކެއް ކުރިއަށްދާ ވަގުތާ ދިމާކޮށް، އިންޑިއާގެ އޭއެންއައިއަށް ދެއްވި ބަސްދީގަތުމެއްގައި އެމެރިކާ ހާރިޖިއްޔާގެ ތަރުޖަމާނަކު ވިދާޅުވީ، އިންޑިއާގެ ގާނޫނީ އިމުގެ ތެރެއިން ހައްގުތައް ކަށަވަރުކޮށްދީ، ޑިމޮކްރަސީގެ އަސާސްތަކަށް އިހުތިރާމް ކުރުމަށް އިންޑިއާގެ ކަމާބެހޭ ފަރާތްތަކަށް ގޮވާލާ ކަމަށެވެ.
ދީނީ މިނިވަން ދިނުމާ، ހަމަހަމަ ކަމާއެކު އަމަލު ކުރަމުން ދިއުމަކީ އެމެރިކާއާއި އިންޑިއާގެ ޑޮމޮކްރަސީގެ އަސާސެއް ކަމަށްވެސް އެމެރިކާގެ ހާރިޖިއްޔާގެ ތަރުޖަމާނު ވަނީ ވިދާޅުވެފައެވެ. އިންޑިއާގެ މަސްރަހުގައި ކަން ހިނގަމުންދާ ގޮތް ވަރަށް ގާތުން ބަލަމުންދާ ކަމަށާ، ސުލްހަވެރި ކަމާއެކު އެއްވެ އުޅުމުގެ ހައްގާ ހިޔާލުފާޅުކުރުމުގެ މިނިވަންކަމުގެ ހައްގަށް އިންޑިއާއިން އިހުތިރާމް ކުރަންޖެހޭ ކަމަށްވެސް އެމެރިކާއިން ވަނީ ގޮވާލާފައެވެ.
ކަންމިހެން އޮތްއިރު އިންޑިއާގެ ބައެއް ސަރަހައްދުތަކުން އަދިވެސް އޮތީ އިންޓަނެޓްގެ ހިދުމަތް ކަނޑާލާފައެވެ.
