އިންޑިއާގެ ރަށްވެހިކަމުގެ ގާނޫނަށް އިސްލާހު ގެނައުމުގެ ބިލު (ކެބް)ގެ ގާނޫނީ ހައިސިއްޔަތާ މެދު ސުވާލު އުފައްދާ، އެ ބިލާ ދެކޮޅަށް ހުށަހަޅާފައިވާ ޕެޓިޝަންތައް ބަލައިގެންފައިވާ ކަމަށާ، މިމައްސަލައިގެ އަޑުއެހުމެއް، މިމަހުގެ 18 ވާ ބުދަ ދުވަހަށް ތާވަލު ކޮށްފައިވާ ކަމަށް އިންޑިއާގެ އެންމެ މަތީ ކޯޓު ކަމުގައިވާ އެގައުމުގެ ސުޕްރީމް ކޯޓުން ހާމަކޮށްފިއެވެ.
ޣައިރު މުސްލިމުންނަށް އާދަޔާ ހިލާފު މަންފާތަކެއް ލިއްބައިދޭ ގޮތަށް އިންޑިއާގެ ރަށްވެހިކަމުގެ ގާނޫނަށް އިސްލާހު ގެނައުމަށް ހުށަހަޅާފައިވާ ބިލް ނުވަތަ ކެބްއާ ދެކޮޅަށް މިހާތަނަށް ސުޕްރީމް ކޯޓަށް 12 ވަރަކަށް ޕެޓިޝަން ހުށަހަޅާފައި ވާކަމަށް މައުލޫމާތު ލިބެއެވެ.
ކެބް ބުނާ ގޮތުގައި އަފްގާނިސްތާނު، ބަންގްލަދޭޝް އަދި ޕާކިސްތާނުގެ ހިންދޫންނާއި، ސިކުންނާއި، ބުދިސްޓުންނާއި، ފާރިސީއިންނާއި، ޖައިނުންނާ ކްރިސްޓިއަނުންގެ ތެރެއިން ބަޔަކަށް އެމީހުންގެ އަމިއްލަ ވަޒަނުގައި އިހާނެތިކޮށް ހިތަމުންދާ ކަމަށް ބުނެ، 2014 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހުގެ ކުރިން ގަވައިދާ ހިލާފަށް ނަމަވެސް އިންޑިއާއަށް އެތެރެވި ކޮންމެ ޣައިރު މުސްލިމަކީ އިންޑިއާގެ ރަށްވެހިކަމަށް އެދި ހުށަހެޅުމުގެ ހައްގު ލިބިގެންވާ މީހެކެވެ. އަދި އެމީހަކީ ޣައިރު ގާނޫނީ އިމުގެ ތެރޭގައި ހުރި މީހެއް ކަމުގައި ނުބެލެވޭނެ ކަމަށްވެސް ކެބް ބުނެއެވެ.
ކެބްއާ ދެކޮޅަށް އިންޑިއާގެ ސުޕްރީމް ކޯޓަށް އެންމެ ފުރަތަމަ ޕެޓިޝަން ހުށަހަޅާފައިވަނީ އިންޑިއަން ޔޫނިއަން މުސްލިމު ލީގުންނެވެ. މީގެ އިތުރުން އިންޑިއާގެ އިދިކޮޅު ކޮންގްރެސް ޕާޓީގެ އިސް ސަފުގައި ހަރަކާތްތެރިވާ ސިޔާސީ ލީޑަރުންނާއި، އިންޑިއާއިން ނޭޕަލަށް ކުރިން ކަނޑައަޅާފައި ހުންނެވި ސަފީރަކާއި، އިންޑިއާއިން ބަންގްލަދޭޝްއަށް ކުރިން ކަނޑައަޅާފައި ހުންނެވި ހައިކޮމިޝަނަރަކުވެސް ވަނީ ކެބްއާ ދެކޮޅަށް އިންޑިއާގެ ސުޕްރީމް ކޯޓަށް ޕެޓިޝަން ހުށަހަޅުއްވާފައެވެ.
ޕެޓިޝަން ހުށަހެޅުއްވި ފަރާތްތަކުން ވިދާޅުވާ ގޮތުގައި ކެބްއަކީ ހަމަހަމަ ކަމުގެ ހުރިހާ އަސާސަކުން އެއްކިބާވެފައިވާ ބަދަލެކެވެ. އަދި މިއީ އިންޑިއާގެ ގާނޫނު އަސާސީގެ އެންމެ އާސާސީ ސިފަތަކާވެސް ތައާރަޒުވާ ބިލެއް ކަމަށް އެ ފަރާތްތަކުން ދަނީ ބުނަމުންނެވެ.
ކެބްއާ ދެކޮޅަށް އިންޑިއާގެ އެކި ހިސާބުތަކުގައި އާންމު ރައްޔިތުންނާ ކިޔަވާ ކުދިންވެސް ދަނީ މުޒާހަރާކުރަމުންނެވެ. އެގޮތުން އާސާމް ސްޓޭޓްގެ އިތުރުން ވެރިރަށް ދިއްލީއާއި ޓެމިލް ނާޑޫގައިވެސް ވަރުގަދަ މުޒާހަރާކަތެއް އަދިވެސް ދަނީ ކުރަމުންނެވެ.
ހަފުތާއެއްހާ ދުވަހަށް ދިގުލާ ގޮސްފައިވާ މުޒާހަރާތަކާ ގުޅިގެން 6 މީހެއްގެ ފުރާނަ ގެއްލިފައިވާކަމަށް ޚަބަރު ލިބެއެވެ.
