ބަންގްލަދޭޝްގެ ވެރިރަށް ޑާކާގެ ރަށްބޭރުގައި ހިންގަމުންދިޔަ ކާރުހާނާއެއްގައި އަލިފާނުގެ ހާދިސާއެއް ހިނގާ 10 މީހުން މަރުވެއްޖެއެވެ.
ޖާޒީޕޫރު ސަރަހައްދުގައި މި ހާދިސާ ހިނގާފައިވަނީ ލަގްޒަރީ ފޭން ފެކްޓަރީގައި ކަމަށްވާއިރު، މިހާދިސާގައި މަރުވި 10 މީހުންގެ ހަށިގަނޑު ނަގާފައިވަނީ، އަލިފާން ނިއްވާ މީހުންނަށް އަލިފާންގަނޑު ކޮންޓްރޯލް ކުރެވުނު ފަހުން ކަމަށް، ކަމާ ބެހޭ އޮފިޝަލު މުޙައްމަދު ރަޝީދު ވަނީ ތަފްސީލުކޮށްދެއްވާފައެވެ.
މިހާދިސާގައި އިތުރު ބަޔަކަށް އެކި ވަރުގެ ޒަހަމްތައް ލިބިފައިވާކަމަށް ރަޝީދު ވިދާޅުވިއެވެ. ނަމަވެސް އެކަމާ ބެހޭ އިތުރު ތަފްސީލެއް އޭނާ ހާމަކުރައްވާފައެއް ނުވެއެވެ.
ދުނިޔޭގެ މަޝްހޫރު ބްރޭންޑްތަކުންވެސް ހަރަދު ކުޑަކުރުމުގެ ނަމުގައި ކާރުހާނާ ހިންގަނީ ބަންގްލަދޭޝްގައި ކަމަށް ވާއިރު، އެ ގައުމުގައި ހިންގާ ބައެއް ކާރުހާނާތަކަކީ ގާނޫނީ އިމުން ބޭރުން، އެކަށީގެން ނުވާ ދަށް ފަންތީގައި އޮޕަރޭޓް ކުރަމުންދާ ނުރައްކާތެރި ކާރުހާނާތަކެކެވެ.
މިއީ ފާއިތުވީ ހަފުތާއެއްހާ ދުވަހުގެ ތެރޭގައި ބަންގްލަދޭޝްގައި ހިނގި މިފަދަ 2 ވަނަ ހާދިސާއެވެ.
