އިންޑިއާގެ ރަށްވެހިކަމުގެ ގާނޫނަށް އިސްލާހު ގެނައުމުގެ ބިލް (ކެބް)އާއި ދެކޮޅަށް ވެރިރަށް ނިއުދިއްލީގައި ކުރިއަށް ގެންދިޔަ މުޒާހަރާތައް ހޫނުވެ، އާންމު ރައްޔިތުންނާ ފުލުހުންނާ ދެމެދު ވަރުގަދަ ކުރިމަތިލުންތަކެއް ހިންގައިފިއެވެ.
މުޒާހަރާގެ ބައިވެރިން ކޮންޓްރޯލް ކުރުމުގެ ނަމުގައި އިންޑިއާގެ ފުލުހުން ކަރުނަ ގޭހާ، މުގުރުގެ ބާރުގެ ބޭނުންކޮށްފައިވާ ކަމަށް މައުލޫމާތު ލިބެއެވެ. ކަންމިހެން އޮތްއިރު، މުޒާހަރާގެ ބައިވެރިންގެ ތެރެއިން 100 އަށްވުރެ ގިނަ މީހުންނަށް އެކި ވަރުގެ ޒަހަމްތައް ލިބިފައިވާކަމަށްވެސް ޚަބަރު ލިބެއެވެ. ނަމަވެސް މިކަމާ ބެހޭ އިތުރު ތަފްސީލަކާ، ކަށަވަރު ރިޕޯޓްތަކެއް އަދި ލިބިފައެއް ނެތެވެ.
ވެރިރަށް ނިއުދިއްލީގައި ވަރުގަދަ މުޒާހަރާތަކެއް ފަށާފައިވާއިރު، އިންޑިއާގެ އިރުމައްޗާ އުތުރުގެ ސްޓޭޓްތަކުގައި ކެބްއާއި ގުޅިގެން މުޒާހަރާކުރަމުންދާތާ މިހާރު ވަނީ ހަފުތާއެއްހާ ދުވަސް ވެފައެވެ. 5 ދުވަހަށް ދިގުލާ ގޮސްފައިވާ މުޒާހަރާތަކުގައި 6 މީހެއްގެ ފުރާނަ ވަނީ ގެއްލިފައެވެ.
މިމުޒާހަރާތަކާ ގުޅިގެން އިންޑިއާގެ ބައެއް ހިސާބުތަކުގެ އާންމު ހާލަތު ގޯސްވެފައިވާއިރު، ވިލާތުގެ ބައެއް ގައުމުތަކާ އެމެރިކާއިންވަނީ އެ ގައުމުތަކުގެ ރައްޔިތުން އިންޑިއާއަށް ދަތުރުކުރުމުގައި ސަމާލުވުމަށް ގޮވާލާ، ޓްރެވެލް އެޑްވައިޒަރީ ނެރެފައެވެ.
ކެބްއަކީ އަފްގާނިސްތާނު، ބަންގްލަދޭޝް އަދި ޕާކިސްތާނު މަގުން ގަވައިދާ ހިލާފަށް އިންޑިއާއަށް އެތެރެވެފައިވާ ޣައިރު މުސްލިމުންނަށް، އިންޑިއާގެ ރަށްވެހިކަމަށް އެދި ހުށަހެޅުމުގެ ފުރުސަތު ފަހިކޮށްދޭ އިސްލާހެކެވެ.
ހިންދޫ ނޭޝަނަލިސްޓް ބާރްތިޔާ ޖަނާތާ ޕާޓީ ނުވަތަ ވެރިކަން ކުރާ ބީޖޭޕީއިން ބުނަމުންދަނީ މި އިސްލާހަކީ އެ ގައުމުތަކުގައި ދީނީ ހިޔާލު ތަފާތުވުންތަކާއެކު އިހާނެތިކޮށް އަމަލުކުރެވެމުންދާ މީހުންނަށް ރައްކާތެރި މަންޒިލެއް ފަހިކޮށްދޭ އިސްލާހެއް ކަމަށެވެ. ނަމަވެސް މި އިސްލާހުގެ ދަށުން ރައްކާތެރި މަންޒިލެއް އިހުތިޔާރު ކުރުމަށް އިންޑިއާގެ ރަށްވެހިކަމަށް އެދި ހުށަހެޅުމުގެ ފުރުސަތު، މުސްލިމުންނަށް ދީފައި ނުވާ ކަމީ، އެންމެ ގިނަ ބަޔަކު ކަންބޮޑުވުން ފާޅުކުރަމުންދާ މައްސަލައެވެ.
