ބޭރުގެ ގައުމުތަކުން މެލޭޝިއާއަށް އެތެރެވާ ފަތުރުވެރިންނަށް ހާއްސަކޮށްގެން ވެކިން ދިނުމުގެ މަޝްރޫއެއް ކުރިއަށް ގެންދިއުމަށް ހަމަޖެހިފައިވާކަމަށް މެލޭޝިއާގެ ސިއްހަތާ ބެހޭ ވުޒާރާގެ ޑައިރެކްޓާ ޖެނެރަލް ނޫރު ހިޝާމް ޢަބްދުﷲ ވިދާޅުވެއްޖެއެވެ.
މިއީ ގައިން ގަޔަށް އަރާ ނުރައްކާތެރި ބަލިތައް އިތުރަށް ފެތުރުނަ ނުދީ ކޮންޓްރޯލް ކުރުމަށް ކަމަށް ބުނެ އެގައުމުން ކުރިއަށް ގެންދާ މަޝްރޫއެއް ކަމަށް ޚަބަރު ލިބެއެވެ.
މެލޭޝިއާއިން ބުނީ އެގައުމަށް ޒިޔާރަތްކުރާ ފަތުރުވެރިންނަށް ވެކްސިން ދިނުމުގެ މަޝްރޫއު ކުރިއަށް ގެންދާނީ ޔުނިސެފްގެ އެހީތެރިކަމާއެކުގައި ކަމަށާ، ހަރަދު ކުޑަ ނިޒާމެއްގެ ތެރެއިން މިކަން ކުރުމަށް، ފިލިޕީންސްއާއިއެކު މަޝްވަރާތަކެއް ކުރިއަށްދާކަމަށެވެ.
ދުނިޔޭގެ އެކި ކަންކޮޅުތަކުން ދަތުރުކުރާ މީހުންގެ މެދުގައި މެލޭޝިއާއަކީ އެންމެ މަގުބޫލު އެއް މަންޒިލަށްވެފައިވާއިރު، މެލޭޝިއާއަށް އެތެރެވާ ފަތުރުވެރިންގެ ތެރެއިން 20-30 ޕަސެންޓްއާއި ދެމެދު އަދަދެއްގެ ފަތުރުވެރިން އެ ގައުމަށް އެތެރެވަނީ ހެލްތް-ސްކްރީން ފުރިހަމަ ނުކޮށް ކަމަށްވެސް މެލޭޝިއާއިން ބުނެއެވެ. އަދި މިއާއެކު ވެކްސިން ނުޖެހުމުގެ ނުރައްކާތެރިކަމާ ގުޅިގެން ކަންބޮޑުވުންތަކެއް އުފެދޭ ކަމަށްވެސް މެލޭޝިއާއިން ބުނެއެވެ.
ގާތްގަނޑަކަށް 30 އަހަރަށްފަހު ފުރަތަމަ ފަހަރަށް އެގައުމުން ޕޯލިއޯ ކޭހެއް ފެނިގެން ހުސްވި ހަފުތާގެ ތެރޭގައި ވަނީ ރިޕޯޓްކޮށްފައެވެ. މިއާއެކު، މެލޭޝިއާގައި ޕޯލިއޯ ބަލި އަލުން ފެތުރެން ފަށާފައިވާކަމުގެ ބިރުވެރިކަންވެސް ވަނީ އުފެދިފައެވެ.
މެލޭޝިއާގެ މެޑިސިން އެކަޑަމީއިން ދަނީ ވެކްސިން ޖެހުން މަޖުބޫރުކޮށް، އެކަށީގެންވާ މަގުބޫލު އުޒުރެއް ނެތި ވެކްސިން ނުޖަހާ ތިބޭ މީހުންނަށް ހަރުކަށި އަދަބު ދިނުމަށްވެސް ގޮވާލަމުންނެވެ.
